Read Southern Rengma Naga JOEL 2 Bible Online

JOEL 2 - Southern Rengma Naga bible

JOEL 2

¹Shügü khunshülo; kenshvu khwen thyüshü, Npugü rincho kenshün Zion gen tsü. Ndünlo, Juda temidan! Npugü jongü le whütse ryüjü laso.

²Tsüle zenkeshemi lo kezen jon lo nmhu kesü kemetsen jon nme thyüti. Tsekhvu rihü danda le ryüjü, kezen hontse kazüthun dan sun gun ryüjü. Tsühontse kethyü thame ndizun, lo tsühontse kethyü thyüsin loho.

³Mah hontseo anyugun le jonyüdan tyübu lahü. Anyugun mhundyü nyu kazü gü le Eden chwi hontse, ai anyugun siki we thakendi kazü kesi hontse. Thame a-nyugun nrhilo hümvu.

⁴Tsüdan le nripe keru hontse, anyugun le terikeru hontse tinhü.

⁵Anyugun le kazüthun dan gen nchwükü kethyü tsüle, terikeru gari ketin hontse; anyugun le mah le jonyü kesirokebin hontse. Anyugun le rihü danda le teri nyu gü titse don-o nda kebin hontse.

⁶Anyugun le kho nnilo temidan le nshvu; temi mhun aphu metsenla.

⁷Anyugun le terikekvunyu hontse me when; anyugun le shüpahü nyu hontse chwida gen kü. Anyugun aphu tsonchü njü sen-o mhundyü ki gü lo anyugun tson le kelu mvu--

⁸nmvue kechanyu tson nyu gü lamvu. Anyugun le teri kekhwen dan nyu yü, lo thame anyugun khinlomvu.

⁹Anyugun le nyida gü nyu kehü yü; anyugun le chwida gen tin; anyugun le kagen kü; lo anyugun le kerühu nyu hontse kafüphe nyu yü.

¹⁰Anyugun le kethün lo kazü le nnu; tsang le ndün. Yhüko lo shye le zenla, lo shyenyü le bensin mvula.

¹¹Npugü le tsangkesen khwen thyü a-rihü dan ka johoshü. A-jokezen shüpahü le chon lo kvusa. Npugü jongü le kenrin thyüpe dihontsela! Segü le tsünyu yhunlo mon?

¹²Npugü le zohü, “N tsokae nyunkelu ketsin thyüo aki ryülo kenyen, kechü, lo chechüo ryülo.

¹³Nnyun kenjün kethyü zensü nnyun sürhenshü; hagun phinya sürhen kethyü le penmvu.” Npugü hagun Sunggigü ki niryülo. A-le bwe lo me shwinjünsa; a-le nyunthon-o a-jo then hü; a-le a-zin tse shaja pe ketsü gü mvuo jüshü titse hü nyo.

¹⁴Npugü hagun Sunggigü le a-nyun sünio jochü pe hagun tsüo shyeni pe kesü thyüshüe shalo hole. Tsüsiki hagun le shyeni lo vainzu pe a-rüshvu loti.

¹⁵Zion kazüthun gen shu gü khunshü; nyün nrün ahza hoshü lo temi kokequen shülo!

¹⁶Temidan kokequenlo; kehun kenshün nme thyü nrün genyu anyugun ketsüshü; peshünyudan zenryü, ntsenyue zenryü lo nyuhonyue sin sunthyü terinyue anyugun ka khelao ryü mvulo shvu.

¹⁷Lothobin lo Kerüshvuka nyu keyütson jaka Npugü tho thyükebin peshükeda nyu le chüo hihontse hilo mvuloshvu: “Ntemi njün shülo, Npugü. Senye kechadan no ‘Hagun Sunggigü le diki hü nla? tse zo-o agun nshwe-o shwinyü nyata.’ ”

¹⁸Tsüsiki Npugü le a-temi dan phin rüchün shü; a-le a-temi shwinjün shü.

¹⁹A-le anyugun kehi kenishü; “A-le shye vainzu lo oliv terzü pe hagun tsü tiso, lo hagun le ketegvu loti. Senye kechadan le hagun nshwen sin loho so.

²⁰Ale tsekhvu rihüdan teso kipon keryü dan tsü khila lo tsüdan peha hüpe kazü kesi ki shü lati. Anyugun mhundyü kehüdan hüpe kesi zida nyu shüla, anyugun siki kehüdan pe Mediterranean zida ki shü lati. Anyugun simin dan le ten lati. Anyugun le hagun gen thyükeshü aphu genyu ale anyugun nke lati.

²¹“Low dan, nshvunya, ai sherhün lo kenyülo Npugü le hagun genyu thyüshü kela aphu genyu.

²²Nyukhudan, nshvunya, tehendan le njvu laso; senbin le a-sha nsha binla, lo khürosha lo vainsha le kesü thyü laso.

²³“Hagun kenyülo, Zion temidan, Npugü hagun Sunggigü le hagun genyu thyükeladan genyu sherhünlo. A-le seryü tsangkenri khi pe hagun tsü laso, a-le tsangseü tsangri pe hagun tsü laso, lo hi mhundyü hontse tseben tsangri-e hagun tsü laso.

²⁴Tha kerabin dan ka shyeni le kesü thyü lati; ter kerabin teki vainzu lo oliv ter le yile ti.

²⁵Hagun nkekeladan pe tsüni lati gükela chen dan ka tsekhvudan le hagun shye tyükela dan tsü. Rihü tsügü nipe hagun ntsun keshü tsüle ale le.

²⁶Ntsoka we hagun le kesüthyü tyüti, tson-o ketegvu loti. Hagun le Npugü hagun Sunggigü shwenti, hagun genyu nduntho thyükeshü gü tsü. Mele atemi nshwe lohoso.

²⁷Tsüsiki, Israel, hagun le ale hagun dan nyu hü letse, lo ale Npugü hagun Sunggigü lo anyeki kecha ndi tse shalo lati. A temi dan le mele anyugun nshwen sin lohoso.

²⁸“Tson kethyü siki ale akapu runpe temi aphu gen shüti: hagun nyenyu peche lo tenue ajo zoti; Peshünyu ju le a-min shati, lo hagun temi seloju le tsemi hyuti.

²⁹Tsü gwünkho ka a kapu runpe gonyu peche lo tenu gen-e shüti.

³⁰“Ale tsang ki lo kazü gen zensü khi shüti; Teziketsun, mah lo mah kekhu nmhakelu kesü hontse ryüti.

³¹Yhüko no zentin la, lo shye le nhon pe tezihontse lati, Npugü jon kedagü lo kenrin kethyü le ryü nrün mün ka.

³²Ai Npugü ka keche hikehü nyu le kenilo lati. Npugü le kezole, ‘Jerusalem nyu kebin peha le tin lati; ale kejülo kelanyu le rhün loti.’ ”