Read Southern Rengma Naga JOEL 3 Bible Online

JOEL 3 - Southern Rengma Naga bible

JOEL 3

¹Npugü le zo hü, “Tsü gwenkho ka ale Juda lo Jerusalem gwakenye kelo senni ryü tsü lati.

²Ale senye aphu kequen loti lo anyugun zenryü Jokera kazü ketejon gü nyu shüti. Tsünyu ale anyugun jokerati anyugun le atemi gen thyükeshü tho aphu genyu. Anyugun le Israel nyu hükezen pe sinrünyi dan ki shüla lo a kazü Israel kenjün khola.

³Anyugun le henkeshwi thyü donnyu hyulo nrün genyu. Anyugun le ponyu lo lünyu jwe pe donyu thyü pe keyüla lo zu min tha nrün genyu.

⁴“Tur lo Sidon, hai aka nyu thyü titse ndobinla, lo Filistia lojvu aphu? Hai le tha peha genyu athani titse binle? Hai tson titselo, ale whütse kethuni shüti!

⁵hai le a rakagi lo suna lo a kenya pvü gü hai kershvuka nyu shüla.

⁶Hai le Juda lo Jerusalem temi tenzen anyugun kazü zen-o nithen ki güo pe Greek nyu ki jwe la.

⁷Ale ntsoka we hagun le anyugun pe jwekela bin dan ka anyugun zenni ryü lati. Hai le anyugun gen thyü kela gü tsü ale hai gen thyü shüti.

⁸Ale hai nyenyu peche lo tenu lope Juda temi ka jwen lati; anyugun le tsüdan pe nithen ki Sabeanyu ki jwen lati. Ale Npugü, tsü zo laso.

⁹“Jo hilope senye dan ka tesha shülo: ‘Teri genyu ndalo; hagun terikekvunyu koshü; hagun shüpahü dan kequenlo-o tsonchüshü!

¹⁰Nnyon-kekhinkhun pe jenthon cha lo tehen ketsevü lope mi chalo. Kvukemvu nyue kenren mvuloshvu.

¹¹Nmhen ryülo, hunkebin senye aphu, tson-o kazü ketejon gü nyu kequenlo.’ ” Npugü, anyugun when nrün genyu n-rihü nishülo.

¹²“Senye dan le gwendolo mvuloshvu, tson-o jokerabin ketejon günyu ryülo. Tsünyu, Npugü Ahile jokerati hunkebin senye aphu.

¹³Anyugun le rigwamvusa; anyugun gwenla logvü gwünkho ka hontse; kedasha kegwen hontse; terasha kethün bin nyu vainzu le chwiryü kemvuthen thün kehü tsü hontse anyugun boshwen lalo.”

¹⁴Temi yie yie le jokerabin ketejon gü nyu bin. Tsünyu Npugü jon gü le whütse ryü lati.

¹⁵Yhüko lo Shye le zen lati, lo shyenyü le bensin mvu lati.

¹⁶Npugü le Zion kazüthun gen nra tsüryü; Jerusalem ki a-khwen le tsangkesen thyü, kazü lo tsang le nni ti. Ai a-le a-temi nolo ti.

¹⁷“Israel, tsüsiki hagun le ale Npugü hagun Sunggigü tsü letse shaloti. Ale A rincho kenshün Zion gen yhun hü. Jerusalem le nyida kenshün nme thyüti; sinrünyi dan le tsü lonila loho.

¹⁸“Tsü gwünkho ka kazüthun dan gen vainlow le sülati, lo rincho aphu gen senru hyuti; zule Juda nyu rinyu aphu kesü thyü lati. Rinyu nmele Npugü kershvuka nyu tsunchwi ti; lo tsüle Akakia kazü ketejon gü ntsenti.

¹⁹“Ijipt le kazü kesi nme thyü lati, lo Edom le kazü gwakemvu thyü lati, anyugun le Juda kazü when lo a-temi kegwa boshvu kethyü genyu.

²⁰Ale mele boshvu kelanyu khün loti; Ale thyüzükelanyu nsen loho. Ai Juda lo Jerusalem le kethonthen bin hüti, lo Npugü ahigü le Zion kazüthun gen yhun hüti.”