Read Southern Rengma Naga AMOS 1 Bible Online

AMOS 1 - Southern Rengma Naga bible

AMOS 1

¹Jo hidan hile Tekoa rünyi nyu Tanyü kekhwenyu nme, Amos jo. Uzziah le Juda raja lo Jeroboam le Israel raja thyü ketseka, kazü nni nrün chenhvu mhundyü Sunggigü le Israel nyu genyu hidan aphu pe Amos hishü.

²Amos le zo, “Npugü le Zion kazüthun kipon nra; a-khwen tsangkesen hontse Jerusalem kipon ryü. Tehen le rügula, lo Karmel kazüthun gen jonyü le nmhabun tsela.”

³Npugü le zo, “Damaska temi dan le mu lo muni laso, tsügenyu ale tsügü genyu shaja pe anyugun tsü tsentsüti. Anyugun le Gilead temi gen anyugun jvu gwamvusa.

⁴Tsügenyu ale mah nipe Raja Hazael le thyükeshü rajabin gü gen shü lo ale raja Benhadad, chwida ro lati.

⁵Ale Damaska nyida khinrun dan vüla lo Aven kazü ketejon nyu keyhun nyu lo Betheden kekvu kesen gü hü lati. Siria temi dan zen-o Kir kazü ki dothyü tinla ti.”

⁶Npugü le zo, “Gaza temi le mu lo munini laso, lo tsügenyu ale shaja pe anyugun tsü tsentsüti. Anyugun le senye apentha zen-o jwe pe Edom temi go thyüla.

⁷Tsügenyu ale mah nipe Gaza nyida chwida gen shüo a-chwida kekhwendan ro lati.

⁸Ale Ashdod lo Ashkelon nyida sokeda hvu hü lati. Ale shaja pe Ekron nyida tsü lo Filistianyu khekela nyu aphu no si lati.”

⁹Npugü le zo, “Tur temi le mu lo muni laso, lo tsügenyu ale shaja pe anyugun tsütsentsüti. Anyugun le senye apentha zen-o Edom kazü ki do thyüla, lo anyugun le kepvüshen gwaketho kethyü tsü thenmvu.

¹⁰Tsügenyu ale mah nipe Tur nyida chwida gen shüo a-chwida kekhwen roshe lati.”

¹¹Npugü le zo, “Edom temi le mu lo muni laso, tsügenyu ale shaja pe anyugun tsü tsentsüti. Anyugun le anyugun tsasizen Israel nyu hü lo shwikenjün pe anyugun himvushü la. Anyugun nyunkenta le a-keni ndi, tson-o tsüno ndi lamvu.

¹²Tsügenyu ale mah nipe Teman nyida gen shüo Bozrah chwida kekhwen roshe lati.”

¹³Npugü le zo, “Ammon temi le mu lo muni laso, lo tsügenyu ale shaja pe anyugun tsü tsentsüti. Anyugun le kazü lokethün nrün genyu terikethyü ka Gilead nyu tenunyu nyuphukepvü nyue sü.

¹⁴Tsügenyu ale mah nipe Rabbah nyida chwida gen shüo a-chwida kekhwen dan roshe lati. Tsüsiki teri jon nyü nra nhu kethyü le binti, lo kega kethyü le tsangkenbu terhi hontse ti.

¹⁵Anyugun rajagü lo a-kedadan le do thyü gü lati.”