Read Southern Rengma Naga AMOS 2 Bible Online

AMOS 2 - Southern Rengma Naga bible

AMOS 2

¹Npugü le zo, “Moab temi le mu lo muni laso, tsügenyu ale shaja pe anyugun tsü tsentsüti. Anyugun le Edom rajagü rudan rühvu mvuo tsüdan rope mahchu thyüla.

²Ale mah nipe Moab kazü gen shüo Kerioth chwida kekhwen roshe lati. Moab temi le shüpahü nyu le shü khun lo teri khwen thyüo nra keshü ka silati.

³Ale Moab so kedagü lo kazü tsünyu sharhi aphu boshvu lati.”

⁴Npugü le zo, “Juda temi le mu lo muni laso, tsügenyu ale shaja pe anyugun tsütsentsüti. Anyugun le a senkethyü jo rühvu mvu lo a johokeshüdan zenmvu laso. Anyugun bonnyu tero kenku dan no anyugun tsontsin kecha laso.

⁵Tsügenyu ale mah nipe Juda gen shüo Jerusalem chwida kekhwen roshe lati.”

⁶Npugü le zo, “Israel temi le mu lo muni laso, tsügenyu ale shaja pe anyugun tsü tsentsüti. Anyugun le gonyu, mepu tholo kehonyu, rhodyüo phaje-e hilomvu nrün nyu pe jwela hü.

⁷Anyugun le kvukemvu nyu lo keche kendinyu kedülao tsünyu rhokedyü chwenshwi lahü. Pechenyu nme lo a-pvü au le gogi nme zen-o serimvula, tson-o azen kenshün bo nrhu.

⁸Kerüshvu bin aphu nyu pechenyu le rhokedyünyu le a-pu thokeshü phi ben-o jü. Anyugun, mele pisa pe anyugun tsü nrün nyu ka zu khi kelo pe anyugun Sunggigü kerüshvuka nyu tsü.

⁹“Ai, a temi dan, hagun genyu ale Amor nyu sedar sen hontse thon, lo teshosen hontse kenko dan nkebula.

¹⁰Ale Ijipt nyu hagun zenchwiryü, chen henzi hagun zen-o kazü kesi nyu gü, tson-o Amor kazü pe hagun hon thyü lotse pe hagun tsü.

¹¹Ale hagun nyu peche peha kejü pe sidyükeshanyu thyü, lo hagun selo peha no Kenshün nyu thyü lotse shü. Tsüle ketsin le mvu la, Israel nyudan? Ale Npugü, tsü zo laso.

¹²Ai hagun le Kenshün nyu no zu tsü, lo sidyükeshanyu no ajo zonya lotsela.

¹³Tsügenyu ale hagun boshwen pe kazü nyu shü lati, tson-o hagun no gari le shye pe a-khvu jon nsusa pvü kehü hontse nrati.

¹⁴Tin nmhenlo kehünyue nrhilo mvu lati; kenko nyu le a-kenko ndila, lo shüpahü nyu le a-npvü a-keyhun-e kenilomvu lati.

¹⁵Levü kepen nyu le a-bin thyülo mvu lati, lo keru gen tin kehü nyu-e rhün loho.

¹⁶Tsüjonyü shüpahü kenkotsin nyu-e a-kanyü hoshü lao tinti.” Npugü le zo laso.