Read Southern Rengma Naga AMOS 3 Bible Online

AMOS 3 - Southern Rengma Naga bible

AMOS 3

¹Israel temi, a-le Ijipt nyu senye apentha zen-o chwiryü keladan, Npugü le hagun rüla zokeshü jo higü nyülo:

²“Kazü senye aphu ka ale sha lo nucha kehü le hagun npvü. Tsühontse kethyü genyu hagun kemudan le ketetsin thyü laso, tsügenyu ale shaja pe hagun tsümvu loshvu.”

³Mihvu le keteno titse ndo mvuo njwe kentsin hü ole?

⁴Shünyho le thame tenlo mvutse chün nyu nra hü ole? Shünyho nyu le tha hyulo mvuo a-kü nyu nho hü le?

⁵Tegü le mele chwa pe nsenkemvu sen ka mila hü ole? Chwa le thame bokhe shümvuo kela hü ole?

⁶Nyida nme nyu terikethyü shu khun shülo temi dan le nshvu mvula hü ole?

⁷Npugü le nishü mvutse kenke le nyida gen ryüla hü ole? Aphusokekvu Npugü le a-kerüchün pe a-gonyu sidyüjo kezonyu teshamvuo thame thyü hümvu.

⁸Shünyho le nho shülo segü le nshvu mvulo gwa tila? Aphusokekvu Npugü le jozoshülo, segü le a-jo zomvula lo mon?

⁹Ijipt lo Ashdod rajabin nyu yhunkehünyu ka zoshülo: “Samaria hunkebin rinchodan ki kequenlo, tson-o tsünyu kevüsa lo thyüzüsa kebin tsü nrishülo.”

¹⁰Npugü le zo, “Temi hidan le thyüzü lo tha gwakemvu thyüo khikelo kanyü pe anyugun kedabin kesü thyübin. Anyugun dihontse joketsin zotiyo shamvu.

¹¹Tsügenyu shwikerüchün nyu le anyugun kazü hunlo-o anyugun chwida boren-o kedabin nyu kanyü dan pvütin lati.”

¹²Npugü le zo, “Tanyükekhwenyu le shünyho le tanyü tentyü kela siki a-phashahvu nmvue a-nyetin nme nti hyulo kehü hontse, Israel temi kerho ntile Samaria nyu noh minketsen gen nngü kebin hyuloti.

¹³Nyülo, lo Jakob tsipwen ka zoshü,” Aphuso Kekvu Npugü le zo.

¹⁴“Ale Israel nyu kemu genyu shaja pe anyugun ketsü jonyü, Bethel ka kershvubin nke lati. Kershvubin a-quen aphu bokholao kazünyu chekü lati.

¹⁵Ale kenda ka lo ntsükerin ka nkelati. Chunhü pe nthyü kenjü kadan le cheo nkelati; ka kedadan aphu nkelati.”