Read Southern Rengma Naga AMOS 5 Bible Online

AMOS 5 - Southern Rengma Naga bible

AMOS 5

¹Israel temi dan, ale hagun gen nyu kesi gen keronlü thyü kebin higü nyü shülo:

²Phousengi Israel le chelaso, Ni solo mvuso! Kazü gen a-khe laso, Lo temi nme-e a-penso mvu laso.

³Aphusokekvu Npugü le zo, “Israel nyu nyida nmele shüpahü ye nme nishwi, ai tsi nme nti le rani ryü; nyida kecha nme le tsi nishü, ai tseryü nti le raniryü.”

⁴Npugü le Israel temi dan ka zo, “Aki ryülo, tsonlo hagun le rhün loti.

⁵Beersheba ki rüshvu titse günya. Bethel nyu ahyulo nrün ndanya-- Bethel le lihikemvu nme thyü lati. Gilgal ki günya a-temi dan le me kazü ki tinla tiso.”

⁶Npugü ki gülo, tsonlo hagun le rhün loti. Hagun le gümvu yatselo, a-le mah hontseo Israel temi dan gen sho tsüryüti. Mah le Bethel temi dan rolati, tsonlo temi nme-e tsübo kemhü lo mvu lati.

⁷Temidan kenjü kekhün lao anyugun sakehü dan, hagun le thyülo binso!

⁸Npugü le shyenyüdan rheshü, Pleiades lo Orion shyenyü. A-le tsangkezen kelupe tsangkeben thyüla hü, lo nhenyu thyüpe kheje thyü lati. A-le zida nyu zü dan koshü tson-o tsüdan ja pe kazü gen shü hü. A-zan le Npugü

⁹A-le kenke zenryüo kekvu nyu lo anyugun chwida kenko gen shühü.

¹⁰Hagun le mele joketsin zo-o ketsinkemvu nkhin kehünyu shwinyü mvuhü.

¹¹Hagun le rhokedyünyu nshwen-o anyugun shyeni khilo hü. Tsügenyu hagun le thyükeshü tsoka kezegwa nyu yhun loho lo hagun le senkeshü vainlow kegwa nyu vainzu tsü loho.

¹²Ale hagun kemu ketesin dan lo hagun le dikho thyü zü layo shabin. Hagun le temi kegwanyu nchün ndyü, jvujwe lo, lo rhokedyü nyu le jokerabin nyu a-kenjü le kebin khinla hü.

¹³Tsügenyu gwenkho gwakemvu tsühontse kethyü ka matse bintin kela le thyükezü nme!

¹⁴Rhünlo nrün genyu gwakemvu gü mvule kenjü gü thyü titse rüchünlo. Tson yatselo nle a-le bin letse zokethyü genyu, Kekvutsin Npugü Sunggigü le nzenhü tsentsüti.

¹⁵gwakemvu ntsü, lo kenjü gü solo, tson-o jokerabin nyu joketsin gü le kvulo nrün nrilo. Npugü le senye hinyu yhunkebin shwinjün shüe lo gwale.

¹⁶Tsügenyu Kekvutsin Npugü le zo, “Nyida gü tsonda nyu che kechü lo nyunkenjün thyüo kenra khwen nyüti. Lowketsünyue me no kesi chechü lotse a-min pe tsükenjü nyu zen-o chechü lotse koti.

¹⁷Vain low aphu nyu chekechü le binti. Ale shaja pe hagun tsü titse ryükejü genyu hidan aphu thyüti.” Npugü le zo laso.

¹⁸Hagun Npugü jon nnyükehü nyu genyu tsüle dihontse kekerü nme thyü tiyo! Jon tsügü le hagun ka nyu kegwa thyü mon? Tsüle hagun genyu tsangkezen jon thyüti, keben thyüloho.

¹⁹Tsü jon tsüle temi nme le shünyho mhundyü tingü thyügwen tenokelo hontseti! Nmvue tsü jon tsüle nmele kaki ryüo a-ben pe kabon gen shüo peri no ndu keshü hontse ti!

²⁰Npugü jon gü le kezen a-me keben senryü loho; tsüle keben ndishü kethyü kezen jon thyüti.

²¹Npugü le zo, “Ale hagun ketsenyü jon dan ntsü hünyo; ale tsüdan nhen loha!

²²Hagun le rope kerüshvu kanyü lo shyeni pe kerüshvu sen-o aki ryüe ale tsüdan lo loho; hagun le arüshvu nrün genyu senru nrhu kenjü dan-e lo loho.

²³Hagun lü thyü nra nya gwen; ale hagun le harp kevü khwen nyü nyümvu laso.

²⁴Tson kethyü gümvu le, joketsin no sinla hükemvu züri hontselo.

²⁵“Israel temi dan, ale Ijipt nyu hagun zen chwiryüo chen henzi kazü kesi nyu hüketse ka hagun gen kerüshvu lo tha hokeshü thame himvu.

²⁶Ai ntsoka we hagun le Sakkuth, hagun tero raja, lo Kaiwan shyenyü tero men dan rüshvukela genyu

²⁷ale hagun zen-o Damaska nyeki kazü nme nyu gü kethyü ka teromen tsüdan pvüo tsünyu gü mvuloshvu.” Npugü, a-zan le Kekvutsin Sunggigü tsüle zo.