Read Southern Rengma Naga AMOS 8 Bible Online

AMOS 8 - Southern Rengma Naga bible

AMOS 8

¹Ale Aphusokekvu Npugü kipon tsemin kecha nme hyu. Tsü nyu Lokhu ka terasha le kebin hyu. Npugü le shün, “Amos, nle nyu hyu bin nla?” Ale a-ka, “Lokhu ka terasha le kebin.”

²Npugü le aka zo, “A temi Israel genyu gwenkho kenkhingü le ryü laso. Ale shaja pe anyugun tsü nrün nyu a-kerüchün süni lohoso.

³Tsü jon nyü rajabin nyu lüdan tsüle kechü khwen thyü lati. Simin le lihika bin lati. Nra mvutse tsüdan pe kewhen lati.”

⁴Higü nyüshülo, hagun, rhokedyü nyu nshwen lo rhokedyünyu nkela titse nda kehünyu dan.

⁵Hagun le hagun npvü hihontse zohü nyo, “Jon kenshün dan le gülao agun shyeni jwenkelo khwen loho. Dicheka Sabbath le gülao agun le ha thyü sola tiyo? Tsüselo ngun le a-min kerche khilo, sükevülo, ngun kesükü ketsin thyü mvuo ngun zen-o hakethyü nyu saloti.

⁶Ngun le thoshe gwakemvue pe a-min kechon ka jwenlo gwa. Ngun le rhokedyünyu, a-pu tholo hükemvu, a-phakü hilo kehonyu hyulo lo a-heipe ngun go thyüti.”

⁷Npugü, Israel Sunggigü le swe shü: “Ale anyugun tho gwakemvu nmhin loho.

⁸tsügenyu kazü le nniti, lo kazü tsünyu temi aphu tson nziti. Kazü tsügü apentha nnu lati; tsüle Nile Züri hontse so lo che binti.

⁹Gwenkho le ryüjü, tsünyu ale yhüko no nhenyu chela lo kazü no nhenyu tsanglvu ka zün lati. Aphu sokekvu Npugü, ale zo laso.

¹⁰Ale hagun shekerhün jon dan pe temi kesi jon hontse lati lo shekerhün lü kelu pe nyun gwakemvu kechü khwen thyü lati. Ale hagun no hagun pe thula lo ronphi ben, tson-o hagun le nyu peche nme nti kebin nyu le nyu tsügü genyu chükebin hontseti. Tsüjon tsüle gwamvu gü keni titi.

¹¹“Ale chenda nipe kazü gü so shü nrün jon le ryüjü. Temi dan le nnyon ti ai ketyüketsü genyu mvu; anyugun le teriti, ai zü tsükenyü genyu mvu. Anyugun le Npugü jo rhodyüti. Aphusokekvu Npugü le zo laso.

¹²Temi dan le teso ki tsügü tesin keti lo npho ki gü nkhün keti hoti. Anyugun le lihikie Npugü jo füti, ai anyugun le hyuloho.

¹³Tsü gwenkho ka selo yhun kegwa peche lo tenue terio ntoti.

¹⁴Samaria terogi zan nyu swe-o, ‘Dan terogi zan nyu; ’ nmvue ‘Beersheba terogi zan nyu’ tson zo-o swe kehü nyu le chelao ni solo mvu lati.”