Read Southern Rengma Naga JONAH 1 Bible Online

JONAH 1 - Southern Rengma Naga bible

JONAH 1

¹Khenyüme Npugü le Amittai nyugü Jona ka zo.

²A-le zo, “Nineve nyida gü ki jo zope tsü ntsun shülo; tsünyu temi le serimvu kebin ale shabin laso.”

³Jona le Npugü kebu titseo tson keba ki tinla. A-le Joppa ki güo tsüki zürun le Spain ki gü titse kebin hyulo. A-le a-kenjwen chün pe tsülao Npugü kebu sen-o Spain ki güla titse bin.

⁴Ai Npugü le tsangkenbu kekvu nipe Zida ki shü, tson-o tsangkenbu le gin ritsin-o zürun gü le jonrenla nrün hontse lola.

⁵Kenjwenyu aphu kershvulao a-npvü pvü a-terogü ka hisola. Tsüselo zürun khvu thyü nshenlo titseo anyugunle kanyü jün pe kewhen sola. Tsü ka Jona le zürun gü quen ki jüsa bin.

⁶Captain gü le a-hyulo-o a-ka, “Nle jüo nyu thyü bin nla? So-o nterogü ka hilo. A-le ngun genyu nyunkenjün thyüo kenishüe logwa le.”

⁷Kenjwenyu le khinyunyu ka, “Segü genyu ngun le kenshvu nyu binlayo whenshwi tile.” Anyugun tsü thyüo Jona zan le chwiryüla.

⁸Tsügenyu anyugun le a-ka, “Agun ka zoshülo! Hi genyu n-nmula kezü le bin ole? Nle hinyu nyu thyübin nla? Nle nyu kazü ki ryüla? N kazü zan le nyula?”

⁹Jonah le zonishü, “Ale Ibrinyu, ale Tsangge kebin Npugü Sunggigü, kazü lo Züda thyükeshü gü rüshvu hü nyo.”

¹⁰Jona le a-le Npugü mhundyü nyu tinjü letse anyugun ka zo. Zürunkejenyu le kershvulao a-ka zo, “Tsüle thyü nshvu kethyü nme sele!”

¹¹Tsangkenbu terhi gü le gwamvu ketsin sola, tsügenyu anyugun le a-ka, “Tsangkenbu terhi khinla nrün genyu agun no ngen nyu thyüla mon?”

¹²Jona le zonishü, “Apen pe zida nyu kewhen shüla lo, tson lo terhi le ndi lati. Akemu genyu hagun le terhi gwakemvu teno binla letse ale shabin.”

¹³Ai zürunkejenyu le jen sen-o züseki chwikethyü ndo-o anyugun kekvu thyü. Ai tsangkenbu terhi le kvuketsin-o thame thyülo mvula.

¹⁴Tsügenyu anyugun le kehithyü nra Npugü ko-o, “O Npugü, agun le nka hibin nle, temi higü pvükehü genyu kesi shaja thyüpe agun tsü nyalo! Npugü, hi aphu nkhvu le; hile ntho le.”

¹⁵Tsüsika anyugun le Jona penlo-o zida nyu kewhen shüla, lo terhi le ma tsela.

¹⁶Higü genyu kenjwenyu dan le Npugü nshvusalao anyugun le kerüshvu thyü pe a-tsü lo a-lothyü titse zoshwi.

¹⁷Npugü johokeshü genyu tsehü keda nmele Jona nyilo la, lo a-le tsehü ginda nyu tsangkeben lo tsangkezen kenshen bin.