Read Southern Rengma Naga TSIPWESWÜ 10 Bible Online

TSIPWESWÜ 10 - Southern Rengma Naga bible

TSIPWESWÜ 10

¹Npugü le Mosa ka zoshü,

²“Temi ko kequen lo kensenbin kerho ka sen nrün genyu rakagi jon pe shu kenyhun chalo.

³Shu kenyhun nren khun thon shülo, temi apentha ryüo ale kehü Phika gü khenpvü ka nhun pfü loti.

⁴Ai shu nme nti khun shülo pfüphun sharhinyu nti ryü nhun pfü loti.

⁵Khun nzü shü lo npho zin nsenkebin kami dan le ketu shü.

⁶Khun nzü keshü kenyhun gü le tesinzin kebin pfüphun dan le ketu shü. Tson-o kensenbin rho nrün genyu khun nzü shüti,

⁷ai temi ko kequen nrün genyu khunthon shüti.

⁸Aaron nyu püshükeda dan no shu khun ti. “Ryükejü gwenkho aphu ka tejvu higü thenti.

⁹Hagun shwikerüchün nyu le hagun wheo hagun kazü nyu teri kethyü ka teri le bin laso tse kethyü shu hidan khun shüti. Lo ale Npugü hagun Sunggigü, ale hagun cheti lo shwikerüchün nyu ben nyu hagun keni shüti.

¹⁰Hagun shekerhün gwenkho ka-Shye keshün nga lo nga kecha ka-- hagun le rope kerüshvu lo kepvüshe kerüshvu hokeshü ka shu khun shüti. Lo ale hagun cheti. Ale Npugü hagun Sunggigü.”

¹¹Temi dan le Ijipt nken kethyü chen hvu ka shye hvu gü jon nki nyü Npugü kehü Phika gü so ge n mhu gü le küla,

¹²tsügenyu Israel nyu le Sinai kazü kesi nyu tsonchü chwi. N mhu gü le ryüo Paran tehen yhunkemvu nyu sun lola.

¹³Anyugun le Npugü le Mosa ka johokeshü hontse tsonchü shü,

¹⁴lo anyugun le bin ketu kethyü aphu ka a-keme. Juda tsipwe no tsonri kethyü phikeden hensin kebin dan le Amminadab nyugü Nahshon hensin nyu a-dandan thyüo tsonchü shü.

¹⁵Zuar nyugü Nethanel le Issachar tsipwe so keda thyü,

¹⁶lo Helon nyugü Eliab le Zebulun tsipwe so keda thyü.

¹⁷Lo Phika gü rholo-o, tsü kepen Gershon lo Merari pfüphun no tsonchü shü.

¹⁸Tsüsika Reuben tsipwe no tsonri kethyü phikeden hensin kebin dan le Shedeur nyugü Elizur hensin nyu a-dandan thyüo tsonchü shü.

¹⁹Zurishaddai nyugü Shelumiel le Simeon tsipwe so keda thyü,

²⁰lo Deuel nyugü Eliasaph le Gad tsipwe so keda thyü.

²¹Lo Levi nyu Kohath pfüphun le Kenshün kanyü pen-o tsonchü shü. Anyugun le kensenbin tilo ntsin Phika gü penso nilo lahü.

²²Tsüsika Efraim tsipwe le tsonri kethyü phikeden hensin kebin dan le Ammihud nyugü Elishama hensin a-dan dan thyüo tsonchü shü.

²³Pedahur nyugü Gamaliel le Manasseh tsipwe so keda thyü,

²⁴lo Gideoni nyugü Abidan le Benjamin tsipwe so keda thyü.

²⁵Kenkhintsin, Dan tsipwe le tsonri kethyü phikeden hensin kebin dan le a-dan aphu rikhun-o Ammishaddai nyugü Ahizer le anyugun keda thyüo a-dandan thyü tsonchü shü.

²⁶Ochran nyugü Pagiel le Asher tsipwe so keda thyü,

²⁷lo Enan nyugü Ahira le Naftali tsipwe so keda thyü.

²⁸Lihikae Israel nyu le kensenbin rho-o kecha ki chwi kethyü ka hihontse a-dan dan thyü hü.

²⁹Mosa le Midiannyu a-mi Jethro nyugü Hobab ka zoshü, “Agun le Npugü le pe agun tsü titse zokeshü bin ki gü jü laso. A-le Israel nyu no gwakenye loti tse johoshü njü, tsü genyu agun zen gülo gwakenyekelo tsü ngun kenjün loti.”

³⁰Hobab le a-jokenishü, “Kemvui, Ale a kazü ki rani gun lati.”

³¹Tsontsin Mosa le zoshü, “Ncheno-e a gun khela nyalo.” “Nle agun le tehenyhunkemvu nyu dika nsen lo gwayo shabin nyo, tsügenyu nle agun tsontsin lo.

³²Nle agun zen hüyatselo agun le Npugü le jochü pe a-gun ketsü aphu ngun kenjün ti.”

³³Temi dan le kazüthun kenshün gü Sinai nken-o jonshen njwen gunla. Npugü Kejozenkelo Khinpha gü le a-zintse anyugun mhundyü ri gü anyugun kensenbin hyulo hü.

³⁴Anyugun le kensenbin nme ka ketu shülo nhennyu Npugü n mhun gü le anyugun so bin hü.

³⁵Lihi gwenkho kae Kejozenkelo Khinpha gü pen-o tsonchü shülo, Mosa le, “Solo, Npugü, nshwikerüchünnyu no nrenru la lo nkenrhinyu hü lalo!” tsonzo shühü.

³⁶Lo tsüle sun lolo a-le, “Npugü, ranio Israel kami yie yie dan ki ryülo!” tsonshü hü.