Read Southern Rengma Naga TSIPWESWÜ 13 Bible Online

TSIPWESWÜ 13 - Southern Rengma Naga bible

TSIPWESWÜ 13

¹Npugü le Mosa ka zoshü,

²“Israel tsipwe tseryü kenyhun dan kami nme ka sharhi nyu nmeme kejü lo-o rüzü nyu thyüo gü ale pe Israel nyu tsü kebin kazü rhi nrün genyu nishülo.”

³Mosa le Npugü jozen-o Paran tehenyhunkemvu nyu sharhinyu ni keshü le hihontse: [Tsipwe] — [Sharhi] Reuben — Zakur nyugü Shammua Simeon — Hori nyugü Shaphat Juda — Jephunneh nyugü Kaleb Isakar — Josef nyugü Igal Efraim — Nun nyugü Hoshea Benjamin — Raphu nyugü Palti Zebulun — Sodi nyugü Gaddiel Manasseh — Susi nyugü Gaddi Dan — Gemalli nyugü Ammiel Asher — Mikail nyugü Sethur Naftali — Vophsi nyugü Nahbi Gad — Machi nyugü Geuel

¹⁶Kazü gü rhi lotse Mosa le nikeshü rüzü nyu dan le hidan hi. A-le Nun nyugü Hoshea zan tho kela pe Joshua thyüla.

¹⁷Mosa le anyugun ni keshü ka hihontse zoshü, “Tesozin nsin-o Kanan kazü tesinzin güo tsüsika rincho ki külo.

¹⁸Tson-o kazü le dihontse yo, temi dikho le tsünyu yhun bin nyo, lo anyugun le nko bin le.

¹⁹Kazü güle gwa le shvuyo, tsünyu keyhun nyu le chwida khwen pe nyida dan hun le kendonyu bin nyo.

²⁰Kazü le bwe le mvuyo lo tesen le yhun bin le mvuyo shalo lo. Lo tsünyu kebin terasha peha senryü lo.” (Tsüle vain le nyen so kela gwenkho.)

²¹Tsügenyu temi dan le tesozin nsin gü Zin tehenyhunkemvu tesinzin Hamath kazü kenchon tesozin khoka Rehob ki kegü tson aphu rhishü.

²²Anyugun le kazü tesin kipon gürio Hebron ka ryülo, tsünyu thungin nyu Anakim tsipwe Ahiman, Sheshai lo Talmai kami dan le yhun bin. (Ijipt nyu Zoan thyükelo mhundyü chen tsenyü ka Hebron rünyi thyülo.)

²³Anyugun le Eshkol ketejon ka ryüo Vainsha chwe nme duthülo, tsüle nsu sao sento pe rhishüo mihvu le pen. Anyugun le Kheratyü lo kherosha ko peha senryü.

²⁴(Israel nyu le tsüka vainsha chweme düthü kelo genyu bin tsügü pe Eshkol ketejon thola.)

²⁵Jon henzi kazü gü rhi tseo rüzü nyu le ranio

²⁶Paran tehenyhunkemvu Kadesh ka Mosa, Aaron lo Israel nyu apentha kiryü. Anyugun le nyu hyuyo zoshü lo terasha gü pe temi da hishü.

²⁷Anyugun le Mosa ka zoshü, “Agun le kazü gü rhi kegun ka tsüle kazü gwasa kethyü hyulo, lo tsünyu terasha peha le hile.

²⁸Ai tsünyu keyhun nyu le kvusa, anyu rünyi le gon sasa lo chwida gwasa pe hun. Tsünyeki temi thungin nyu tsipwe le tsünyu bin le.

²⁹Kazü gü tesinzin le Amelek nyu le bin; lo Kanan nyu le Mediterranean zida kho lo Jordan ri seki yhun bin nle.”

³⁰Kaleb le Mosa ka kenya kebin dan no nramvu la njüo, “Ngun whütse gü kazü tsügü lo lola tile nu; ngun le tsü lolo la wa le,” tson zoshü.

³¹Ai Kaleb zen-o gü kethyü dan le zoshü, “Nmvu, ngun le anyugun hülo kemvui; tsünyu kebin temi dan le ngun nyeki kvu le.”

³²Tson-o anyugun le rhi kethyü kazü gü rüla zo nshvu pe Israel nyu dan nyu shüla. Anyugun le zo, “Kazü tsügü le tsünyu keyhun nyu genyue tyükekü nyhunshü bin mvu lo agun le kehyu nyu aphu kethonkedada le, tson zoshü,

³³lo agun le Anak tsipwe temi thungin nyu le tsünyu kebin hyu. Anyugun nrishüo ngun rüchün keshüle tsekhvu honla gwenzin le.”