Read Southern Rengma Naga TSIPWESWÜ 14 Bible Online

TSIPWESWÜ 14 - Southern Rengma Naga bible

TSIPWESWÜ 14

¹Khensin temi dan le anyugun sheseo chü.

²Anyugun le Mosa lo Aaron ge kenyao zoshü, “Ijipt ki nmvue hika tehen nyu sikela we gwakvu le!

³Nyuthyüo Npugü le agun zen-o kazü tsü gü ki gü jü nla? Mele terinyu agun dushvu lao agun nunyu lo agun nyenyu tün lo kelai. Ijipt ki rani kela le gwakvu mvu ti ole?”

⁴Tson-o anyugun le khinyunyu ka, “Ngun sharhi nme kejü lo-o Ijipt ki rani la tinu!” tson sola.

⁵Tsüselo Mosa lo Aaron au le temi aphu mhundyü nyu kazü nyu nkhün tsüla.

⁶Lo rüzü nyu dan nyu Nun nyugü Joshua lo Jephunneh nyugü Kaleb au le nyungwa mvuo au phi sürhen-o

⁷temi dan ka zoshü, “Agun le rhi kethyü kazü gü le gwaritsin.

⁸Npugü le ngun shwi a-kenyü yatselo, a-le ngun zen tsüki gü kenya kazü lo kazü kebwe tsü pe ngun tsüti.

⁹Npugü ntsun nya lo tsünyu yhun kebin nyu nshvunya. Ngun le nnesa tse anyugun so kvu loti. Npugü le ngun zen hü nyo lo a-le anyugun ntsen kehü terodan nyeki kvulo laso, tsügenyu nshvunya.”

¹⁰Süda apentha tso pe au jon shvula titse so, ai whütse temi dan le Phika gü soge Npugü kehü keben gü hyula.

¹¹Npugü le Mosa ka zoshü, “Temi hidan le dithen ki a-keni bin tila? Ale anyugun dan nyu nduntho kechon thyüshüe anyugun le dithen ki atenyen mvu bin tila?

¹²Ale kenpen nme nipe anyugun nke lati, ai ale nlope anyugun nyeki gonkvu lo kvu kvu kethyü tsipwe nme thyü shü lati!”

¹³Ai Mosa le Npugü ka zoshü, “Nle nkekvu ka Ijipt nyu temi hidan zenchwiryü laso. Nle ntemi ge nyuthyü shüyo Ijipt nyu le nyülo lo,

¹⁴anyugun le tsüpe kazü higü nyu keyhun nyu ka zoshüti. Npugü nle agun zen kehü temi hidan le nyülo, lo n nmhu le agun soge sun kebin nle nhennyu nmhu chwe nyu lo kheje ki mah chwe nyu agun mhundyü rikehü hyu tsentsü laso.

¹⁵Ntso ka nle ntemi aphu boshvu layatselo nzan kechwi rüla nyülo kela tsipwe dan le,

¹⁶nle temi dan zen chwigü nle pe anyugun tsü titse zo kenjü gü tiloho lao tehen nyu anyugun boshvula le tse ti.

¹⁷Tsügenyu Npugü ntsoka nle zokenjü nkekvu pe agun hio thatho thyüshülo tse hibin nle.

¹⁸‘Ale, Npugü, ale anyunta whütse la hümvu, Ale meso njün rio kemu lo gwakemvu kethyü nyu kemu jüshü hü. Tson yatse-e a-pvübon nyu kemu shaja pe a-nyenyu ju nyenyu phushen phuzi ki-e tsümvula hümvu.’

¹⁹Ale nka hi hü nle Npugü, anyugun le Ijipt nken keshü ka ryü ntsoka keti nle anyugun kemu jüpe anyugun tsü keryü hontse kelula hü kemvu nkeso keda nyu temi hidan kemu jüpe tsülo.”

²⁰Npugü le a-jokenishü, “N kehi hontse ale anyugun kemu jüpe tsüti.

²¹Ai ale rhün hü lo kazü sübin ketsin kethyü hontse ale zoshwishü bin nyo,

²²temi hidan nme no yhun bin-o kazü ligü nyu yü loho. Anyugun le ale kehü kebengü hyu, ai anyugun le aseme nini tse lo a-jo zenmvu laso.

²³Anyugun no thame kae ale zo pe anyu pvübon nyu tsü kenjü kazü gü nyu yü loho.

²⁴Ai ago gü Kaleb le a-kerüchün kecha thyü lo asithen pen kelo genyu ale a-zen gü a-le rhi kethyü kazü gü nyu shüti, lo a-tsipwe no kazü gü lolo ti,

²⁵Ameleknyu lo Kanan nyu le ntsoka yhun kebin ketejon nyu. Sendu ki ranio kazü zü le hunkenthün kesa kebin Aqaba den zin tehenyhunkemvu nyu gun lo.”

²⁶Npugü le Mosa lo Aaron au ka zoshü;

²⁷“Temi serikemvu hidan le dithenki age kenya bin tila? Kenya kethyü kechon ale nyülo laso!

²⁸Anyugun ka zoshülo: ‘Ale rhün ketsin thyü kehü hontse ale sweo zobin nle, hagun kehi hontse thyü pe hagun tsüti. Ale Npugü ale zoshü laso.

²⁹Hagun no sio hagun simi no tehen yhunkemvu nyu nrenru lati. Hagun le age kenya kethyü senyu hagun chen nki so nyu nme no kazü ligü nyu yü loha.

³⁰Ale hagun no tsünyu yhun titse zo njü, ai Kaleb lo Joshua au nti a-me hagun nme no yü loho.

³¹Hagun le mele hagun nyenyu tünlo kelai le tsezo ai ale anyugun zen gü hagun le kenikela kazü günyu shüti lo tsüle anyugun bin thyüti.

³²Hagun we tehenyhunkemvu higü nyu si lati.

³³Hagun kemu genyu hagun le sibula kemvuthen hagun nyenyu dan no tehenyhunkemvu nyu nmho-o chen henzi kenjün thyüti.

³⁴Hagun le jon henzi kazü gü rhi kethyü khenyüme genyu chen meme thyüo hagun kemu chün hagun no chen henzi kenjün thyüti. Hagun no a ntsun kethyü kon le nyu yo sha loti!

³⁵Kequen-o a ntsun kebin temi serikemvu dan ge ale hi thyü shüti tse swe bin nyo. Tehenyhunkemvu hika hagun aphu si lati. Ale Npugü, ale zoshü laso.’ ”

³⁶Kazü gü rhi lotse Mosa le nikeshü temi dan le kenku jo sen keryü genyu temi dan le Npugü ntsun la. Tsügenyu Npugü le kenpen pe anyugun ge shüo anyu le sila.

³⁸Rüzü nyu tseryü kenyhun dan nyu Joshua lo Kaleb au nti rhünlo.

³⁹Npugü le nyuzo shüyo Mosa le pe Israel nyu ka zo keshü ka, anyugun nyungwamvuo chüsa.

⁴⁰Anyugun le lonyü nshwe rincho ki rünyi dan hüchwi titseo, “Npugü le ngun ka zo keshü bin gü ki gü titse nda lo laso. Agun le mu la sele,” tsonzo.

⁴¹Ai Mosa le zoshü, “Tsonlo hagun le nyuthyüo ntsoka Npugü jozenmvu hü nla? Hagun le kvulo kemvui le!

⁴²Gü nya. Npugü le hagun zen hümvu, hagun shwikerüchün nyu le hagun nye kvu kelai.

⁴³Hagun le Ameleknyu lo Kanan nyu teno lo hagun le terinyu sikelai, hagun le Npugü jozenmvu kela genyu a-le hagun zen hümvu laso.”

⁴⁴Npugü zen Kejozenkelo Khinpha gü lo Mosa le kensenbin nken mvue, anyugun le nshvumvuo rincho ge küla.

⁴⁵Tsontsin tsünyu yhun kebin Ameleknyu lo Kanan nyu le anyugun nye kvu lao anyugun hü gü Hormah tila.