Read Southern Rengma Naga TSIPWESWÜ 15 Bible Online

TSIPWESWÜ 15 - Southern Rengma Naga bible

TSIPWESWÜ 15

¹Npugü le pe Mosa tsüshü

²Israel nyu no a-le pe anyugun tsü titse kebin kazü günyu then nrün tejvu dan.

³Methu tse, tanyü tse, tanyü nmvue tenyü rope kerüshvu thyü pe Npugü ketsü nmvue zoshwishü kenjü thyüpen kethyü kerüshvu nmvue n npvü nkenyü ka kerüshvu nmvue a-zin thyü kehü nga ka kerüshvu, ketyüketsü kerüshvu hidan rün Npugü le a-kenyü.

⁴Ligü higü tanyü nmvue tenyü rope kerüshvu thyü pe Npugü ketsü güle senru nme genyu shye kerüshvu tho kilogram nme pe oliv terzü liter nme kerhün kethyü lo vainzu liter nme tse senryüti.

⁶Tanyü tse nme pe kerüshvu thyülo oliv terzü liter nmeo peha pe tho kilogram kenyhun kerhün pe ketyüketsü kerüshvu thyülo,

⁷vain zu liter nmeo peha sin-o. Kerüshvu hidan rün Npugü le a-kenyü.

⁸Tanyü tse nme pe rope kerüshvu nmvue zoshwishü kenjü kerüshvu nmvue kepvüshe kerüshvu thyüpe Npugü tsülo,

⁹Shye kerüshvu tho kilogram kenshen pe oliv terzü kilogram kenyhun kerhün pe shülo,

¹⁰vainzu liter kenyhun kesin-o. Kerüshvu rün higü Npugü le a-kenyü.

¹¹Tsüle Methu tse, tanyü tse, tanyü nmvue tenyü nme genyu tsü hontse shüti.

¹²Senru nme nyesin pe rüshvu yatselo kesin pe rüshvu kehü dan ko tsü kendüo chon kenye ti.

¹³Israel nyu sunnyü nyu ligü higü ketyüketsü pe a-rün kegwa thyüpe Npugü tsü tiya tselo hi thyüti.

¹⁴Lo kachün hagun dan nyu bin tin kelanyu nmvue jon keshanyu hagun dan nyu yhun kebin nyue ketyüketsü a-rün kegwa thyüpe Npugü tsü tiya tselo, a-ko tejvü tsü keme tse thyüti.

¹⁵Ryükejü gwenkho aphu nyu hagun lo kachün hagun dan nyu yhun kebin nyu ge-e tejvü gü le keme tse bin ti. Npugü mhundyü nyu hagun lo anyugun-e kenme;

¹⁶hagun lo anyugun-e tejvü lo thyüzen nrün le kenme.

¹⁷Npugü le pe Mosa tsüshü

¹⁸Israel nyu no a-le pe anyugun tsüti tse kebin kazü gü nyu then nrün tejvü dan.

¹⁹Tsünyu yhun chwikeryü chwü ketyü ka, tsü peha khikho pe Npugü tsüti.

²⁰Hagun le tensü tsen kethyü ka shye keshün pe tensü tsenlo keri gü tsü pe Npugü tsüti. Hagun le shye nyu kelo ka khishü kehü jvü hontse hi khishü ti.

²¹Ryükejü gwenkho aphu nyu hagun le tensü tsen kelo ka jwe kerüche higü pe Npugü tsülati.

²²Peha le shamvuo Npugü le pe Mosa tsü keshü tejvü dan peha zenmvu la.

²³Lo siki temi dan le Npugü le joho pe Mosa ketsü lihie thyümvu la.

²⁴Temi dan le shakemvu genyu thyüzü layatselo, anyugun le methu tse nme pe shye lo vainzu tse pe Npugü le a-rün a-kenyü kehü rope kerüshvu thyüti. Tsünyeki kemugenyu tenyü tse nme pe kerüshvu thyüti.

²⁵Püshükeda gü le temi dan genyu rora thyü lao anyugun kemu jüpe tsüti, anyugun le shamvuo thyüzü la lo anyu kemu genyu ketyüketsü kerüshvu senryü Npugü tsüti.

²⁶Israel nyu apentha lo kachün anyu dan nyu yhun kebin nyu aphu kemu jüpe tsüti, anyugun aphu shamvuo thyüzü kela genyu.

²⁷Temi nme le shamvuo mu lalo a-le a-kemu genyu tenyü lü chenme nyu hoshü ti.

²⁸Püshükeda gü le kershvubin ge temi gü kemu thyükenshün kethyü rora thyü lao a-kemu jü pe tsüti.

²⁹Israel nyu sunnyü nyue lo kachün metse shamvuo thyüzü kela nyu aphu tejvu higü le kenme ti.

³⁰Ai Sunnyü nyue lo kachün metse ronchvü tse mu kela gü we, a-le Npugü nshwe laso, tsügenyu a-dushvu lati,

³¹a-le ronchvü tse Npugü jo nyümvuo a-johokeshü borho kela genyu. A-le sikela tsü le a-npvü a-ge.

³²Israel nyu le tehenyhunkemvu nyu kehü ka gwengwa temi nme le Sabbath jon nyu senlü bin-o hyulo.

³³A-zen-o Mosa, Aaron lo temi apentha mhundyü nyu ryü,

³⁴a-lope nyuthyü mvulo shvuyo sha petsü kemvu genyu me no a-khwe bin.

³⁵Tsontsin Npugü le Mosa ka zoshü, “Temi gü boshvu la mvuloshvu; kensenbin tegwenki süda no tso pe jonshvu lati.”

³⁶Tson-o Npugü le johokeshü hontse süda le a-zen chwigü kensenbin tegwen ki tso pe jonshvula.

³⁷Npugü le Mosa ka johoshü,

³⁸Israel nyu ka zoshü lo: “Hagun phi teka tejvü khio nikenzi shü külo. Ryükejü gwenkho aphu nyu hagun le hihontse thyüti.

³⁹Hagun no tejvü gü hyu keshü ka a johokeshü aphu rüchün lo, tson-o hagun le akipon ranio hagun kenyü yhüdyü thyütinla mvu nrün genyu.

⁴⁰Tüjvü dan ge hagun le ale johokeshü aphu then mvulo keshvu hagun no rüchün loti, lo hagun le ahon thyü shü loti.

⁴¹Ale Npugü, hagun Sunggigü: Ale hagun Sunggigü thyü titse Ijipt nyu hagun zen chwiryü. Ale Npugü.”