Read Southern Rengma Naga TSIPWESWÜ 16 Bible Online

TSIPWESWÜ 16 - Southern Rengma Naga bible

TSIPWESWÜ 16

¹Levi tsipwe Kohath kami nyu Izhar nyugü Korah le Mosa sharhi ntsun lola. Lo Reuben tsipwe ka Eliab nyu Dathan lope Abiram hvu lo Peleth nyugü On lo Israel nyu süda le kejü keshü sharhi mele shasa kehü nyu 250 tse le sin lola.

³Anyugun le Mosa lo Aaron au mhundyü nyu kequen lo-o au ka zoshü, “Hai le rüche ritsin laso! Ngun süda aphu Npugü hon, lo Npugü le ngun aphu zen hü nyo. Tsonlo, Mosa nle nyuthyüo n npvü n lope Npugü temi dan so shü hü nla?”

⁴Mosa le jo hinyü kelo ka kazü nyu chetsü gü kehi thyüshü.

⁵Tson-o a-le Korah lo a-sikethen nyu dan ka zoshü, “Lonyü ki Npugü le segü le a-hon yo tsin shüti; a-le segü le a-hon yo a-le kejü kelo gü no a-kershvubin ka a-kho nni ryüti.

⁶Lonyü ki nle lo nsikethen nyu dan makhun khilo njüo magi kenhon lo tharünkegwa pe shü sen-o kershvubin ka ryülo. Tson-o Npugü le ngun di gü kejü loyo shwishüti. Hagun Levinyu le rüche ritsin kela nyu le!”

⁷

⁸Mosa le Korah ka zo. “Nyü lota hagun Levinyu!

⁹Hagun kerüchün le Israel nyu Sunggigü le süda dan nyu hagun khikho kecha thyü pe a-kho nnilo, Npugü Phika gü nyu lothathyü lo temi süda lothyü kebin tsüle thakeshe nme letse rüchün bin le?

¹⁰A-le nno lo Levinyu kecha aphu no kerühvu higü hyulo, lo hagun le ntso ka püshükeda ko khilo titse bin nle!

¹¹Nle lo nsikethen nyu le Aaron ntsun kebin tsüle ketsin thyü hagun le Npugü ntsun bin nyo.”

¹²Tson-o Mosa le me nipe Dathan lo Abiram au ko ai au le, “Ayi le ryü kemvui!

¹³Nle Ijipt ki kazü kebwe kegwa nyu agun zen ryüo tehenyhunkemvu nyu agun dushvu la titse kethyü hi nti rünyu mvu ole? Nle agun so Npu thyüni titse ole?

¹⁴Nle ketsin thyü agun zenryüo kazü kebwe nmvue vain low pe agun tsü titse mvu le agun sa bin nyo. Ayi le ryü kemvui!”

¹⁵Mosa le anyuntao Npugü ka zoshü, “Temi hidan le sen keryü kerüshvu nme lonya. Ale anyugun nme ge a-zükemvu thyümvu; ale anyugun gada nme-e khilo lamvu.”

¹⁶Mosa le Korah ka zoshü, “Sendu ki nle lo nsikethen temi 250 dan le Npugü kehü Phika ka ryümvu loshvu; Aaron ko tsüka bin ti.

¹⁷Hagun nme me tse a-makhun khilo njüo tharünkegwa pe tsü ge shüo sen kershvubin ka ryülo.”

¹⁸Tson-o temi nme me tse makhun ka magi kenhon lo tharünkegwa pe tsüge shü sen-o Mosa lo Aaron au zen Phika gü khenpvü ka solo.

¹⁹Lo Korah le süda apentha zenryüo Phika khenpvü ka Mosa lo Aaron kentsunlo. Npugü kehü keben le whütse süda apentha yhühyu thyüshü,

²⁰tson-o Npugü le Mosa lo Aaron au ka zoshü,

²¹“Temi hidan siki gü lalo, ale anyugun nke lati.”

²²Ai Mosa lo Aaron au le nkhün tsügü kazü rün-o, “O, Sunggigü, kerhün ronzin aphu khishü kehü gü. Temi nme le mu lalo nle süda apentha ge nnyunta ti ole?”

²³Tsontsin Npugü le Mosa ka zoshü,

²⁴“Temi dan no Korah, Dathan lo Abiram phika nyu tinlalo tse zoshülo.”

²⁵Tson-o Mosa le Israel sharhi dan zen-o Dathan lo Abiram au ki gü.

²⁶A-le temi dan ka zoshü, “Temi serikemvu hihvu ka kho nni nya lo au hon tha lihie kesü nya. Tson mvuyatselo au kemu aphu genyu hagun pe au sin-o sho sen tin lati.”

²⁷Tsügenyu anyugun le Korah, Dathan lo Abiram dan phika nyu tin la. Dathan lo Abiram au le au nunyu lo au nyenyu dan zen-o au khenpvü ka sobin.

²⁸Mosa le temi dan ka zoshü, “Npugü le ano tha hidan aphu thyü lotse anishü lo a npvü akenda ka ale tsüdan thyümvu tse kethyü hagun le sha loti.

²⁹Temi hidan le Sunggigü kipon shaja peha hyulo mvuo mekesi hontse siyatselo Npugü le anishümvu.

³⁰Ai Npugü le nyülo hükemvu tha thyüo kazü le pe shüo anyugun lo anyuhon aphu tepünyün lo lao anyu kerhün kesi kazü ki tsenla yatselo, temi hidan le Npugü nkhin la tse hagun le shaloti.”

³¹A-le jozo thüshü nyemhun Dathan lo Abiram au hensin kazü le koshü

³²tson-o au, au kaminyu lo Korah lo sikethen nyu aphu anyugun hon kesin-o kazü le tepünyün lola.

³³Tsühontse anyugun kerhün anyugun honsin-o kesi kazü güki gunla. Kazü gü le anyugun kemihen lao anyugun hyu mvula.

³⁴Israel nyu tsüka kebin nyu aphu anyugun kechü khwenyü shüo kehü tinla. Anyugun le nrasen-o, “Tinlo! Kazü gü le ngun ko tepünyün lola loshvu!”

³⁵Lo Npugü le mah nishüo tsüle nnyü chwiryüo tharün kegwa ro kebin temi 250 dan rola.

³⁶Npugü le Mosa ka zoshü,

³⁷“Püshükeda gü Aaron nyugü Eleazar ka zoshüo no temi rokela dan lazo makhun nyu kebin magi dan pe kechaki kezen lalo makhun dan le nshün kethyü genyu.

³⁸Tsüdan sen Npugü kerüshvubin nyu keryü ka nshünla. Anyugun kemu genyu sikela dan makhun khilo-o jon kerüpvü pe kershvubin kesen thyülo. Tsüle Israel temi genyu petsülo mvu lo kenshvu le kebin zansü nme thyüti.”

³⁹Tson-o Eleazar püshükeda gü le makhun dan khilo-o jon kerüpvü pe kershvubin kesen thyülo.

⁴⁰Hile Aaron tsipwe kemvu we temi nme kershvubin ka ryüo tharünkegwa rope Npugü ki shülo keshvu Israel nyu genyu petsü lo mvulo keshvu nme. Kemvu we Korah lo atemi dan hontse a-nke lati. Npugü le Eleazar ka johokeshü Mosa le zo keshü hontse hi aphu thyülo.

⁴¹Tsüsinyü temi apentha Mosa lo Aaron au ge kenyao, “Hai le pugü temi peha dushvu laso.” tsonzoshü.

⁴²Anyugun aphu kehun-o Mosa lo Aaron au ge kenya kethyü sika anyugun le ranio Phika kipon shwi shü laryü nmhu le tsü jeh pfü kebin lo Npugü le kehü keben le chwi keryü hyulo.

⁴³Mosa lo Aaron au le gü Phika gü mhundyü nyu solo,

⁴⁴lo Npugü le Mosa ka zoshü,

⁴⁵“Temi hidan dan nyu tesen tinla lo, ale tsüka anyugun nke lati!” Tsontsin au le kazü nyu nkhün tsüla,

⁴⁶lo Mosa le Aaron kazoshü. “N makhun khilo-o kershvubin nyu magi kenhon pe shü lo njüo tharünkegwa peha pe a-so shülo lo. Tson-o whütse tsü sen gü anyugun thyükenshün kethyü rora thyü lalo. Whütse! Npugü nyunkenta le soryüo temi le npen bin laso.”

⁴⁷Aaron le a-jozen-o a-makhun khisen-o temi le kehun kebin dan nyu gü. A-le kenpen gü le bin kela hyulo njüo tharünkegwa pe magi ge shülo-o temi dan thyükenshün kethyü rora thyüshü.

⁴⁸Hile kenpen gü khinla, lo a-le kerhün nyu lo kesinyu jaka so lola.

⁴⁹Korah le kenya kethyü ka sikelanyu swümvuo kenpen higü ka temi 14,700 le sila.

⁵⁰Kenpen gü khinlao Aaron le Phika khenpvü ka Mosa ki rani ryüla.