Read Southern Rengma Naga TSIPWESWÜ 17 Bible Online

TSIPWESWÜ 17 - Southern Rengma Naga bible

TSIPWESWÜ 17

¹Npugü le Mosa ka zoshü,

²“Israel nyu temi dan no kami sharhi nme ka nmeme tseo thün tseryü kenyhun pe ntsü lo tse zoshülo. A-zan a-thün ge thulo

³lo Levi tsipwe sunka sen keryü gü le Aaron zan thulo. Kami sharhinyu nme ge thün nme no tsüka binti.

⁴Tsü sen gü ale kehü Phika günyu ale hagun teno kehü bin Kejozenkelo Khinpha mhundyü nyu shüla lo.

⁵Lo ale kejülo kela gü thün le sen chwiryü ti. Hihontseo ale Israel nyunge kenyazin kehü dan khin lati.”

⁶Tson-o Mosa le Israel nyu ka zoshüo anyugun sharhinyu nmele thün nme me khishü, tsipwe nme ka nme, aphu le tseryü kenyhun, lo Aaron thün ko pe kerhün bin.

⁷Mosa le thün tsü aphu pe Phika günyu Kejozenkelo Khinpha gü mhundyü ka shüla.

⁸Sendu gü Mosa le Phika ki gü laryü, Levi kami sunka sen keryü Aaron thün gü le senchwiryü kela hyulo. Tsüle senchwi ryü pun-o almond sha le nyen bin!

⁹Mosa le thün tsü aphu khipe Israel nyu hishü. Nyuhontse layo hyu shüo anyugun le a-thün thün khini lola.

¹⁰Npugü le Mosa ka zoshü, “Aaron thün tsü khini pe Kejozenkelo Khinpha gü mhundyü ka shü lalo. Kevükehü Israel nyu no anyugun le kevümvu la mvulo siti tseo petsü lo nrün genyu.”

¹¹Npugü le zokeshü hontse Mosa le tsü thyülo.

¹²Israel nyu le Mosa ka zoshü, “Tsonyatselo tsüle agun genyu a-keniso!

¹³Ligü higü phika kho nni keryü gü-e simvu loshvu yatselo, agun aphu no sila ti ole!”