Read Southern Rengma Naga TSIPWESWÜ 18 Bible Online

TSIPWESWÜ 18 - Southern Rengma Naga bible

TSIPWESWÜ 18

¹Npugü le Aaron ka zoshü, “Nle, nnyudan lo Levinyu le ale kehü Phika günyu tha lihie thyüzü kela khvu pvü mvuloshvu; ai nle lo nnyudan npvü püshükeda thonyu thyüzü kela khvu pvüti.

²N shvunye Levi tsipwe no, nle lo nnyudan le Phika günyu tha kethyü ka nkeche nrün genyu zen ryülo.

³Anyugun le nlothyü lo phika günyu thatho thyüti, ai anyugun no Kenshün Bin gü nmvue kershvubin gü nyu kenshün kanyü kesü nya. Tson yatselo anyugun lo n-e no siti.

⁴A nyugun no nzen-o thathyü lo phika günyu mvulo keshvu aphu thyüti, ai kechanyu we nme no hagun kho nni ryü nya.

⁵A nyunkenta no Israel nyu ge niryü mvu nrün genyu, nle lo n nyudan nti Kenshün Bin lo kershvubin nyu thatho dan thyülo.

⁶Israel nyu dan nyu hagun Levi shvunye kejü pe jwe nme hontse pe hagun ketsü gü tsü le ale. Anyugun no phika günyu thatho thyü nrün genyu, anyugun thyü kenshün pe akishü laso.

⁷Ai nle lo nnyudan nti le kershvubin lo Kenshüntsin Bin nyu püshükeda thodan thyüti. Ale püshükeda jünketho pe hagun tsü kela genyu hidan hile hagun khvu. Kechanyu ligü higü kenshün hon dan kho nni ryülo siti.”

⁸Npugü le Aaron ka zoshü, “Rüchünlo, tha kerüche pe aketsü rope kerüshvu thyü kemvudan aphu ale pe ntsü bin nyo. Ale tsü pe kethonthen nle lo ntsipwe dan tsü laso.

⁹Pe kershvubin ge rola kemvu Kenshüntsin hon dan hile nhon: Shyeni pe kerüshvu, kemu genyu kerüshvu lo thyüzükela genyu kerüshvu. Kenshün kerüshvu hon pe aketsü lihie nle lo nnyu dan hon.

¹⁰Nle bin kenshün ka hidan tyümvulo shvu, pechenyu nti tyü logwa; hile nge nyu nshün.

¹¹“Tsünyeki, Israel nyu le tha kerüche pe aketsü aphu nhon. Ryükejü gwenkho aphu ka ale tsü pe nle, nnyu peche lo tenu dan tsü bin nle. N kami nshün kebin nyu aphu tsü tyü logwa.

¹²“Chenkechwi Israel nyu le oliv ter, vainzu lo shyeni keri kegwatsin pe aketsü aphu ale pe ntsü bin nle:

¹³Tsü aphu nhon. N kami nshün kebin nyu aphu tsü tyü logwa.

¹⁴“Israel nyu dan nyu thyü kenshün pe atsü kela aphu nhon.

¹⁵“Temi nmvue senru-e nyuri gü Israel nyu le pe aketsü aphu nhon. Ai temi nyuri gü nle rhini mvuloshvu lo nyukhu nshün kemvudan nyuri gü ko rhini mvu loshvu.

¹⁶Ntsenyu dan shyeme ka a-mi le mele sen kehü haka rakagi pvün thyüo hei ni lo lati.

¹⁷Ai methu, tanyü lo tenyü nyuri dan we hei ni kemvui: tsü le ahon lo tsüpe kerüshvu thyüti. Tsüdan zi pe kershvubin nyela lo a-keshvu rope ketyüketsü rün kegwa thyü pe aki shülo.

¹⁸Kerüshvu kerüche ka a-nyü lo a-pha nzhü gü le nhon.

¹⁹“Ryükejü gwenkho aphu nyu Israel nyu le pe aketsü aphu ale pe nle, nnyu peche lo tenu dan tsü bin nle. Hile ale nle lo ntsipwe zen-o borholokeho kejozenkelo nme thyüshü laso.”

²⁰Npugü le Aaron ka zoshü, “Nle gwe nrün kenya hyu loho, lo Israel nyu kazü njün nme no bin loho. Ale Npugü, nle senmvulo keshvu tsüle ale.”

²¹Npugü le zoshü, “Israel nyu le pe aketsü jün tseryü jün me tsü ale pe Levinyu tsü laso. Hile anyugun le ale kehü Phika günyu lotha kethyü chün.

²²Israel kechanyu no Phika gü karyüo a-chün le kesi hyula mvu nrün genyu ryü nya.

²³Ntsoka gerho Levinyu nti phika gü nucha lo tsünyu mvulo keshvu aphu pvülo ti. Hile hagun tsipwe genyu kethonthen tejvu nme thyüti. Levi nyu le Israel nyu dan nyu gwe nrün kenya no bin loho,

²⁴Israel nyu le jüntseryü ka jünme pe aketsü ale anyugun no anyu hon thyü lotse pe tsü kela genyu. Tsügenyu ale anyugun no Israel nyu dan nyu gwe nrün kenya no bin loho tse zoshü laso.”

²⁵Npugü le Mosa ka johoshü,

²⁶Levinyu ka zoshü lotse: “Npugü le hagun no hagun hon thyü lotse khishü kebin Israel nyu ka jüntseryü ka nme hyu lolo, tsüka jüntseryü ka nme pe Npugü tsü mvu loshvu.

²⁷Kerüche khi keshü higü hile loketsü gü le chenshün nmvue vain zu keshün pe kerüshvu a-keme tse rüchün ti.

²⁸Hihontse nko Israel nyu ka jüntseryü ka nme hyukelo aphu nyu jüntseryü ka nme Npugü hon tsü khishü ti. Nle Npugü genyu kerüche hikhipe püshükeda gü Aaron tsüti.

²⁹Nle hyukelo ka kegwatsin khishü.

³⁰Nle kegwatsin khishü lao low ketsü gü le hoshü kela siki a-sen ntsen lo kehü hontse a-sen ntsenlo.

³¹Nle lo nkami le a-sen tsü lihikae tyü logwa, tsüle phika günyu nlotho kethyü chün genyu.

³²Nle kegwatsin pe Npugü tsü kebin thennle tsü ketyü ka mula loho. Ai kegwatsin pe Npugü tsü kemvu ka tsü tyüo Israel nyu le pe Npugü ketsü kenshün hon nrhu lanya,” tson yatselo nno silati.