Read Southern Rengma Naga TSIPWESWÜ 22 Bible Online

TSIPWESWÜ 22 - Southern Rengma Naga bible

TSIPWESWÜ 22

¹Israel nyu le ketuo Jordan npho zin Moab nyu kazü ketejon Jeriko kentsun ka nsenlo.

²Moab nyu raja Zippor nyu gü Balak le Israel nyu le Amor nyu ge thyü keshü lo Israel nyu dikho le hüyo nyülo,

³njüo a-e lo a-temi aphu nshvu sala:

⁴Tson-o Moab nyu le Midian nyu sharhidan ka, “Thon mvutse danda higü le methu tse le shonphu lvukela hontse ngun kehun hi aphu nke kelai so.” Tsügenyu raja Balak le

⁵lilo nipe Amaw kazü nyu Eufrates züri khoka Pethor nyu kebin Beor nyu gü Balaam ko shü. Anyugun le Balak ka jolo higü sen gü a-ka zoshü: “Ale nno shanyü kebin le Senye nme apentha Ijipt nyu chwiryü bin nyo; anyugun le liki hiki aphu hen-o agun kazü lo lo kela kenshvu le bin ale.

⁶Anyugun le agun nyechon, tsügenyu ryüo asunka shochün pe tsü lalo. Tson yatselo agun le anyugun nyeki kvulao a kazünyu anyugun hüshwi lati. Nle jochü shülo mele jochü pfülo, lo nle swetsü lalo mele shochün pfüla kehü ale sha bin nle.”

⁷Tson-o Moab nyu lo Midian nyu sharhi dan le me swetsü nrün chün sen-o Balaam ki gü Balak jolo pe a-ka, zoshü.

⁸Balaam le anyugun ka zoshü, “Ntsoje hika binlo, lo senduki Npugü le nyu zoshüyo ale pe hagun ka zoshüti.” Tsügenyu Moab nyu sharhi dan le Balaam zen bin tinla.

⁹Sunggigü le ryü Balaam ketsoshü, “Nzen kebin hile dikipon nyu la?”

¹⁰Tsontsin a-le, “Moab raja Balaam le nipe aki shü bin nle,

¹¹Ijipt ki keryü temi dan le kazü apentha hen lo laso. Tsü genyu a-le ano anyugun swetsü la njüo a-le anyugun zen kegao hüshwila nyü bin nle.”

¹²Sunggigü le Balaam ka zoshü, “Temi hidan zen gü nya lo Israel nyu dan swetsü nya anyugun le ajochü pfü kehü genyu.”

¹³Lonyü gü Balaam le Balak lilo dan ki gü zoshü, “Hagun kaki rani gun lalo; Npugü le ano hagun zen gü nyalo tsekela genyu.”

¹⁴Tson-o anyugun le rani Balak ki ryüo Balaam le anyugun zen ryümvule tsela le tse zoshü.

¹⁵Tsontsin Balak le kerigü nyeki teshwe kepfünyu temi chon kvu nishü.

¹⁶Anyugun le Balaam ki gü Balak jolo higü pe a-tsü shü: “Nchenoe thame no nketekhi la nyao aki ryülo.

¹⁷Ale nchün thyüsa shüti lo nle nyu zoyo tsü thyü shüti. Nchenoe ryü agenyu temi hidan swetsü lalo.”

¹⁸Ai Balaam le a-jokenishü, “Balak le a-rajabin nyu suna raka aphu pe atsü lae, ale tha keshetsin nyue Npugü a Sunggigü johokeshü zenmvulo nrün ndi.

¹⁹Ai kechadan hontse hagun cheno-e ntsoje binlo, Npugü le tha peha aka zosin tile nmvuyo shalo nrün genyu.”

²⁰Tsüje Npugü le ryü Balaam ka zoshü, “Temi hidan le nno anyuzen gun lotse nketso ryübin yatselo gwendo lo-o anyuzen gunlo, ai ale nka nyu zoshü yo tsü nti thyülo.”

²¹Tson-o lonyü gü Balaam le a-gada ge dun-o Moab nyu sharhi dan zen gun.

²²Balaam le gü kejü genyu Sunggigü le a-nyunta la, Balaam le a-gonyu mihvu zen a-gada gen dun-o güjü, tsüka Npugü lokethyü nyu nme le tsonda nyu so-o tsonkhin lola.

²³Gada le tsangge lokethyü güle jenthon sen-o tsonda nyu so kebin hyu shüo, tson tebao low nyu yüla. Balaam le a-gada vüo zen niryü tsonda nyu shüshü.

²⁴Tsontsin Npugü lokethyü güle vain low kenyhun jaka lizin hizin tsokhwe le kebin tson kenrün nme ka so lola.

²⁵Gada güle tsangge lokethyü gü hyushüo tson teba gü tsokhwe ge Balaam pha senla. Balaam le a-gada gü vü nishü.

²⁶Tsangge lokethyü güle nigü tsünye ka lizin hizin nrhilo keshvu bin nme ka sobin.

²⁷Gada le tsangge lokethyü gü hyu shüo jü tsüla. Balaam le anyuntao a-thün pe Gada gü vüso.

²⁸Tsontsin Npugü le jo zolo kegwa kekvu pe gada gü tsü shüo tsügü le Balaam ka zoshü, “Ale nge nyuthyü shüo? Nle hi gwenshen ge avü bin la sela?”

²⁹Balaam le a-jo kenishü, “Nle a nchün ndyü keshü genyu! Ale jenthon sen kehü we ndushvu la nrün.”

³⁰Gada le a-jokenishü, “ale nle nkeyhunthen dun kehü ngada tsü mvu ole? Ale himhundyü nge hihontse hü ole?” A-le a-jokenio, “Nmvule.”

³¹Tsüselo Npugü le Balaam no tsangge lokethyü gü le a-jenthon sen-o tsüka so kebin hyulo; tsontsin Balaam le chetsü gü kazü nyu nkhünrün tinla.

³²Tsangge jolo gü le Balaam ka, “Nle nyuthyüo hi gwünshen ge ngada vü la? Nle kenjwen higü thyü zümvu kethyü genyu ale ntson khin titse ryüle.

³³Ai ngada le ahyulao gwenshen ge tson teba la. Tsonmvu yatselo ale ndushvu lao ngada kenishüla nrün.”

³⁴Balaam le a-jokenishü, “Ale mulaso. Nle tsonnyu so-o a ntsun kebin ale shamvu; ai ale gü zümvu yatselo kaki rani la tile.”

³⁵Ai Tsangge lokethyü gü le zoshü, “Temi hidan zen gülo, ai ale nno nyu zolo tseshü yo tsü nti zolo.” Tson-o Balaam le anyugun zen gun.

³⁶Balaam le ryükejü Balak le nyülo njüo gü Moab terhi ki Arnon züri seki Ar nyida ka a-teno.

³⁷Balak le a-ka zoshü, “Nyuthyüo ale me nishü keri gü ka ryümvula? Ale nchün thyü kekü pe ntsü lomvu ado tse rüchün ole?”

³⁸Balaam le a-jokenishü, “ale ryüla mvu ole? Ai ale nyu kekvu le bin mon? Sunggigü le ano nyu zolo tseshüyo ale tsü zo keloi gwenzin.”

³⁹Tson-o Balaam le Balak zen-o Huzoth nyida nyu gunla,

⁴⁰tsünyu Balak le methu lo tanyü dushvuo thyü peha pe Balaam lo a-zen kehü sharhi dan tsüshü.

⁴¹Tsüsinyü lonyü gü Balak le Balaam zen-o Bamoth Baal ki kü, tsüka bin-o Balaam le Israel nyu peha hyu.