Read Southern Rengma Naga TSIPWESWÜ 23 Bible Online

TSIPWESWÜ 23 - Southern Rengma Naga bible

TSIPWESWÜ 23

¹A-le Balak ka zoshü, “Hika a genyu kershvubin tsenyü thyü shüo, methu tse tsenyü lo tanyü tse tsenyü senryü atsü shülo.”

²Balak le Balaam le a-ka zokeshü hontse thyülo njüo Balaam au methu tse lo tanyü tse nme me pe kershvubin nme ge rüshvu shü.

³Tson-o Balaam le Balak ka zoshü, “Nle hika rope kerüshvu khoka sotse, Npugü le ateno tile nmvue yo ale shwishüti. A-le nyu pe atesha shüyo ale nka zo shüti.” Tsonshüo a npvü rincho sun nme ge küla,

⁴Sunggigü le a-teno shü. Balaam le a-ka zoshü. “Ale kershvubin tsenyü thyüshüo methutse lo tanyü tse nmeme pe kerüshvu thyüshü laso.”

⁵Npugü le Balaam no nyuzo tiyo a-kazoshüo a-jo pe Balak ka zoshü lotse a-ni ni shüla.

⁶Tson-o a-le rani ryü Balak le Moab nyu sharhi dan aphu zen-o rope kerüshvu khoka so kebin hyulo.

⁷Balaam le sidyüjo hi zoshü: “Moab nyu raja Balak le Siria, lo npho kazüthun kipon azenryü. ‘Ryü agenyu thazo shülo’ tse a-le zoshü. ‘Shochün pe Israel nyu tsü lalo.’

⁸Sunggigü le shochün pe tsü kemvu ale dihontse shochün pe tsü lomon Nmvue Npugü le nke lati tse zokemvu ale dihontse zolo mon?

⁹Tsonye ketetso ki bin-o ale anyugun hyu; Rincho thun ge bin-o anyugun shwishü. Anyugun le anyu npvü yhun kebin senye; Anyugun le senye kecha nyeki jochü pfü kebin shabin nyo.

¹⁰Israel tsipwe le kenphü hontse-- Anyugun le chonritsin-o swülo buho. Sunggigü temi nme hontse akeyhun jon no a-keni thyüta; Ano kemitsin gü hontse anyun bweo sita.”

¹¹Tsontsin Balak le Balaam ka zoshü, “Nle age nyuthyü shü la? Ale nno shochün pe ashwikerüchün nyu tsü lotse nzen hika ryü, ai nle jochü pe anyugun tsü gwenzin laso.”

¹²A-le zonishü, “Npugü le ano nyu zolo tse shü yo ale tsü nti zolo kegwa gwenzin.”

¹³Tsüselo Balak le Balaam ka zoshü, “Ryü azen bin kecha nme ka gülo tsünyu bin-o Israel nyu peha nti hyu logwa. Tsüka bin-o agenyu shochün pe anyugun tsü lalo.”

¹⁴Tson-o a-zen Zophin low ki gü Pisgah kazüthun sun ge shülo. Tsünyu ko a-le kershvubin tsenyü thyülo njüo methutse nme lo tanyütse nme tse pe kershvubin nmeme ka rüshvu shü.

¹⁵Balaam le Balak ka zoshü, “Nle rope kerüshvu khoka so tselo, ale lika gü Sunggigü teno ti.”

¹⁶Npugü le Balaam teno-o a-no nyuzo tiyo zoshüo, a-jolo pe Balak ka zoshü lotse a-nini shüla.

¹⁷Tson-o a-le raniryü Balak le Moab nyu sharhi dan zen-o rope kerüshvu bin ka so kebin hyulo. Npugü le nyuzo shüyo Balak le ketsoshü,

¹⁸lo Balaam le sidyüjo hi zoshü: “Ryülo Zippor nyugü Balak, Lo ale nyu zotiyo nyülo.

¹⁹Sunggigü le temi hontse nku hümvu; A-le a-nyunkelu la kehü temi hontse mvu. A-le nyu zoshüyo tsü thyühü; A-le zoshü, lo tsü thyüla hü.

²⁰Ano jochü shü lo tse aka zoshü, Sunggigü le jochü pe tsü binlo, ale tsü rani keloi mvu.

²¹Ale Israel sidyü hyu Hengwa kemvu nmvue kenjün kethyü nme da ryü jü mvu. Npugü anyu Sunggigü le anyu zen hü; A-le anyugun raja le tse anyugun le zo sen hü.

²²Sunggigü le Ijipt nyu anyugun zen chwiryü; A-le teronyu gu tse hontse anyugun genyu mezen kenren hü.

²³Jadu nmvue temvuo Israel nyu senye ntsun keloi ndi. Ntsoka temi le Israel nyu rüla zo-o, ‘Sunggigü le nyuthyü shüyo shwishü!’ tsonti.

²⁴Israel senye le shünyho kekvu hontse: Tsüle a-le thyü tenkelo gü sürhen tyü, Lo a-zi tsü nzeü lo kemvuthen rüyü hümvu.”

²⁵Tsontsin Balak le Balaam ka zoshü, “Nle shochün pe Israel nyu tsümvu letse laso, tson-e jochü pe anyugun tsü nya!”

²⁶Balaam le a-jokenishü, “Npugü le aka zo keshü lihie ale thyüti tse ale nka zoshü mvu ole?”

²⁷Balak le zoshü, “Ryülo, ale nzen gü bin kecha nme ka shü tile. Sunggigü le nno bin tsüka agenyu shochün pe anyugun tsülo tse bin ado.”

²⁸Tson-o a-le Balaam zen-o kazü kesi gü kentsun Peor kazüthun sun ge kü.

²⁹Balaam le a-ka, zoshü, “Hika agenyu kershvubin tsenyü thyüshüo methutse tsenyü lo tanyü tse tsenyü senryü a-tsüshülo.”

³⁰A-le kezo hontse Balak le thyüshüo methutse nme lo tanyü tse nme tse pe kershvubin nme me ka rüshvu shü.