Read Southern Rengma Naga TSIPWESWÜ 24 Bible Online

TSIPWESWÜ 24 - Southern Rengma Naga bible

TSIPWESWÜ 24

¹Ntsoka we Balaam le Npugü le a-no jochü pe Israel nyu tsünyü kebin shala, tsügenyu a-le himhundyü hontse a-wheshwi mvula. A-le kazü kesizin rani ryüo

²Israel nyu le tsipwe a-dandan thyü nsen kebin hyushü. Sunggigü kapu gü le a-ketsen-o

³a-le sidyüjo hi zoshwishü: “Beor nyu gü Balaam jo, Hyu tsentsü lo kegwa temi gü jodan,

⁴Sunggigü le nyuzo bin yo nyülo kegwa gü. Kekvutsin Sunggigü kipon tsemi ki Ayhütyü le shünshvu tse hyu.

⁵Israel nyu Phika dan le zegwari,

⁶Palm bin le don pe kethon thyü kebin, Nmvue züri seka chwi hontse, Npugü le aloes bin sen kenjü, Nmvue zü khoka sedar bin dan hontse.

⁷Anyugun le tsangkenri hyusa loti Lo a-tsi pe zü kegwa ka senti. Anyugun raja le Agag nye gon kvuti, Lo a-keda thyü ngon nmhun shüti.

⁸Sunggigü le Ijipt nyu anyugun zenryü; A-le teronyu gu tse hontse anyugun genyu mezen kenren. Anyugun le anyugun kenrhinyu ten tyü loti, Tsüdan ru boren, lo anyugun tho bose lati.

⁹Senye gü le shünyho kekvu hontse; Tsüle jü bin lo temi nme a-kesun nshvu. Ligü higü jochü pe Israel ketsü gü le jochü pfü loti, Lo ligü higü shochün pe Israel ketsü gü le shochün pfü ti.”

¹⁰Balak le anyuntao a-jenthün thyülo njüo Balaam ka zoshü, “Nno shochün pe a kenrhinyu tsü lotse ale nkoshü, ai ntsoka hi gwenshen ge nle jochü pe anyugun tsü bin so.

¹¹Ntsoka nka ki gun la! Ale nchün thyü pe ntsü titse zoshü ai Npugü le nno nchün hyulo nrün nkhin laso.”

¹²Balaam le a-jokenishü, “Nle lilonyu nipe aki keshü dan ka ale zoshü laso

¹³nle n raja kanyu suna raka aphu pe atsü-e ale thame akenda thyüo Npugü johokeshü zenmvu lo nrün ndi. Npugü le ano nyu zolo tse shüyo ale tsü nti zoti.”

¹⁴Balaam le Balak ka zoshü, “Ale atemi ki rani gun jü laso, ai ale gü kemvu ka, siki Israel nyu le ntemi ge nyuthyü shü tiyo nno pütsü lolo tse shü bin nle.”

¹⁵Tson-o a-le sidyüjo hi zoshü: “Beor nyugü Balaam jo, Hyu tsentsü lo kegwa temi gü jodan,

¹⁶Sunggigü le nyu zo shüyo nyülo Lo ketetso Tsin ki keryü thakesha hyu lo kehü gü. Kekvutsin Sunggigü kipon tsemi ki a-yhütyü shünshvu tse hyu.

¹⁷Ale ryü kejü ki nrishü Lo ale Israel senye hyu. Raja nme, shye keben hontse kethyü nme le senye tsügü ge soryü ti. A-le Comet hontse Israel ge chwi ryüti. A-le Moab nyu sharhi dan vüren lati. Lo Seth temi dan aphu vüshe lati.

¹⁸A-le Edom nyu a-shwikerüchün dan so kvu loti Lo anyugun kazü pe a-hon thyü loti. Israel le kvu kebin ka.

¹⁹Israel senye le anyugun kedü lati Lo nsen kebin kenkhin tsin gü-e nke lati.”

²⁰Tsüselo Balaam le tsemi ki Amelek nyu hyuo sidyüjo hi zoshü: “Amelek nyu le senye aphu dan nyu kekvu tsin, Ai kenkhin ki tsü le kethonthen nke lati.”

²¹Tsemi ki a-le Ken nyu hyuo sidyüjo hi zoshü: “Nle yhun kebin bin tsü le kenshvu ndi, Tegü seü le tsonye heki kebin hontse,

²²Ai hagun Ken nyu nke lati Assiria nyu le hagun ten pe a-do thyü tinla ti.”

²³Balaam le sidyüjo hi zoshü: “Tesozin kequen kebin hile temi dikipon nyula?

²⁴Mekehü nyu le Saipros kipon runzen ryüti Anyugun le Assiria lo Eber lolo lati, Ai anyugun ko kethonthen nke ni lati.”

²⁵Tson-o Balaam le nda lo-o rani a-kaki günla lo Balak ko a-npvü a-tson nyu gunla.