Read Southern Rengma Naga TSIPWESWÜ 25 Bible Online

TSIPWESWÜ 25 - Southern Rengma Naga bible

TSIPWESWÜ 25

¹Israel nyu le Akakia ketejon nyu nsen kebin ka Moab nyu tenunyu zen-o keyüla sola.

²Tenunyu tsüdan le anyugun kope Moab nyu tero kerüshvu keho nyu shü. Tson-o Israel nyu le tyütsü lo tero gü rüshvu.

³Peor ka Baal. Tsügenyu Npugü le anyugun ge anyunta lao

⁴Mosa ka zoshü, “A jozen-o Israel sharhinyu aphu zenryü nhennyu hüshvu lalo tson yatselo ale temi dan ge anyunta sinmvu lati.”

⁵Mosa le kerathü nyu dan ka zoshü, “Hagun nmeme tse a-tsipwe ka Peor Baal kerüshvu nyu a phu dushvu lalo.”

⁶Israel nyu le Npugü kehü Phika khenpvü ka chü kebin ka, Mosa lo anyugun apentha mhundyü nyu Israel nyu nme le Midia nyu tenunyu nme zen-o a-phika nyu ryü.

⁷Tsontsin püshükeda gü Aaron nyu Eleazar nyu Phenihas le hyu shüo kehun nyu so gü mi nme khilo-o,

⁸au then yügü a-mi pe au mihvu nren jen kesüla. Hihontseo kenpen le Israel nyu nke kebin khinla,

⁹ai kenpen higü le temi yie nki pezi boshvu laso.

¹⁰Npugü le Mosa ka zoshü,

¹¹“Phenihas le thyü shü kela genyu, ale Israel nyu ge anyunta sin mvu laso. A-le anyeki tero lihie kerüshvu tsü nyhen loho kela genyu, ale anyunkenta ka anyugun nke mvula.

¹²Tsügenyu ale ryükejü gwenkho aphu nyu a-zenkejozen bin nle tse a-ka zoshülo.

¹³A-le lo a-tsipwe no kethonthen püshükeda thyüti, a-le akentsun nyu nhen loho lo temi dan kemu jükeshü senryü kethyü genyu.”

¹⁴Midianyu tenu gi kesin-o boshvu kela Israel nyu gü zan le Salu nyugü Simeon tsipwe ka kami pe gü Zimri.

¹⁵Tenu gi zan le Kozbi. Tsügi a-pvü Zur le Midianyu tsipwe nme ka sharhi gü.

¹⁶Npugü le Mosa ka zoshü,

¹⁷“Midianyu hüo nke lalo,

¹⁸Peor ka anyugun le hagun sa pe gwakemvu thyükela lo Peor ka kenpen gwenkho ka boshvu kelagi Kozbi tse genyu.”