Read Southern Rengma Naga TSIPWESWÜ 27 Bible Online

TSIPWESWÜ 27 - Southern Rengma Naga bible

TSIPWESWÜ 27

¹Josef nyu Manasseh, Manasseh nyu Machir, Machirnyu Gilead, Gilead nyu Hepher, Hepher nyu Zelophehad, Zelophehad nyugi ju le Mahlah, Noah, Hoglah, Milkah lo Tizrah.

²Anyugun le gü Mosa, püshükeda gü Eleazar, sharhi dan, lo süda apentha mhundyü nyu Npugü kehü Phika gü khenpvü ka so lo-o zoshü,

³“Agun pvü le a-nyu peche nme ndi tse tehen yhunkemvu nyu si laso. A-le Korah sikethen dan le Npugü ntsun kethyü dan nyu tsü hümvu; ai a-kemu genyu sikela gwenzin.

⁴Tsügenyu agun pvü le a-nyu peche ndi letseo Israel nyu dan nyu a-zan no chwiryümvu la ti ole? Agun pvü shvunye dan nyu agun jün khishülo.

⁵Mosa le anyu le kenya kebin gü pe Npugü mhundyü ka shü.

⁶Tsontsin Npugü le Mosa ka zoshü,

⁷“Zelophehad nyugi ju le zo kebin tsüle a-zü le; anyugun pvü shvunye dan nyu anyugun hon pe tsülo. Anyugun no a-hon gwenlo:

⁸Israel nyu ka temi nme le a-nyu peche ndio silalo a-nyu tenugi no akenya gwenti tse zoshü lo.

⁹Lo a-nyu tenugie ndi yatselo a-tsasikezen nyu le gwenti.

¹⁰A-le a-tsasikezen ndi yatselo a-pvü tsasikezen nyu le tsü gwenti.

¹¹A-le a-tsasikezen ndi nmvue a-nyo-a-da ndi yatselo a-shvunye a-khokeni tsin gü le tsüpe a-hon thyülo lati. Ale, Npugü, ale nka johokeshü hontse Israel nyu le hi pe tejvü thyüo thenti.”

¹²Npugü le Mosa ka zoshü, “Abarim kazüthun gü ge kü gü ale kazü pe Israel nyu tsü kebin gü shwishülo.

¹³Nle tsü nri keshü siki ntsa Aaron hontse silati,

¹⁴hai mihvu nren Zin tehenyhunkemvu ka a johokeshü ntsun kela genyu. Hai le Meribah nyu süda apentha a ge kenyo kethyü ka, anyugun mhundyü nyu a kenshün kekvu shamvula.” (Meribah tsü le Zin tehenyhunkemvu Kadesh ka zü kenthün.)

¹⁵Mosa le kehi thyü shü.

¹⁶“Npugü Sunggigü, kerhün ronzin aphu khishü kehü gü, temi nme kejü pe no temi dan tsonri lotse ale hi hü nle

¹⁷lo terinyu anyugun ketsen lo-o ntemi dan no tanyü a-kekhwe kendi hontse mvu nrün genyu.”

¹⁸Npugü le Mosa ka, zoshü, “Nun nyugü Joshua, kapu gü le a-ge kebin gü zen lo-o nben pe a-pe ge shülo.

¹⁹Tson-o a-no püshükeda gü Eleazar lo süda apentha mhundyü nyu solo-o anyugun aphu mhundyü nyu a-le nsun thyüti tse zoshwi shülo.

²⁰Lo Israel nyu süda apentha no a-jozen nrün genyu nkekvu peha pe a-tsüshü.

²¹Püshükeda gü Eleazar le Urim lo Thummim sen-o akendo shaloti lo a-le tsü then ti. Hihontseo Eleazar le tha aphu ka Joshua lo Israel nyu süda apentha tsontsin ti.”

²²Mosa le Npugü le aka johokeshü hontse thyülo. A-le Joshua no Püshükeda gü Eleazar lo süda apentha mhundyü nyu solo.

²³Tson-o Npugü le johokeshü hontse Mosa le a-ben pe Joshua pe ge shüo Joshua le a-sun kethyü gü le tse zoshwi shüla.