Read Southern Rengma Naga TSIPWESWÜ 28 Bible Online

TSIPWESWÜ 28 - Southern Rengma Naga bible

TSIPWESWÜ 28

¹Npugü le Mosa ka johoshü

²a-no Israel nyu senthyü shüo Sunggigü le a-kenyü kehü ketyüketsü kerüshvu dan gwenkho to ka pe a-tsü nrün genyu.

³Pe Npugü tsü nrün ketyüketsü kerüshvu le hidan hi: Khenyütsen rope kerüshvu, a-ge tetsin kendi tanyü chenme nyu kenyhun.

⁴Lonyü tanyü nme lo ngwün gü tenyü nme,

⁵shye pe kerüshvu genyu tho kilogram nme pe oliv ter kegwatsin liter nme kerhüo rüshvuti.

⁶Hile Sinai kazüthun ge rüshvu teri shüo khenyütsen rope rüshvu kehü a-rün Npugü le a-kenyü nrün ketyüketsü kerüshvu gü.

⁷Lo tanyü keri gü kesin-o vainzu pe kerüshvu genyu kershvubin ka vainzu liter nme pe jashü mvu loshvu.

⁸Ngwün gü tanyü kenyhun gü pe vainzu kesin-o lonyü gü hontse rüshvu ti. Tsüko Npugü no a-rün kenyü nrün ketyüketsü kerüshvu nme.

⁹Sabbath jon nyü tanyü a-ge tetsin nme kendi chenme nyu tse kenyhun, shyepe kerüshvu genyu tho kilogram kenyhun pe oliv ter kerhün lo vain zu tse pe rüshvu ti.

¹⁰Khenyütsen vain zu kesin-o rüshvu kehü nyeki Sabbath tsenyü rope kerüshvu higü thyüti.

¹¹Shye tsen jonkeri ka rope kerüshvu thyü pe Npugü tsüti: Methu tsebwe kenyhun, tanyü tse nme, tanyü tse chenme nyu tsenyü, tsü aphu tetsin kendi mvu loshvu.

¹²Lo shye pe kerüshvu le oliv terzü pe kerhün-o methu tse nme genyu tho kilogram kenshen lo tanyü tse nme genyu kilogram kenyhun;

¹³lo tanyü nyu nme genyu kilogram nme. Rope kerüshvu hidan hile, a-rün no Npugü kenyü kethyü ketyüketsü pe kerüshvu.

¹⁴Lo vainzu pe kerüshvu le, mathu tse genyu liter kenyhun, tanyü tse genyu leter nmeo peha lo tanyü nyu genyu liter nme tseti. Hile chen ka shye jon keri aphu ka rope kerüshvu jvu le.

¹⁵Khenyütsen vainzu pe sin-o rope kerüshvu thyü kehü nyeki tenyü tse nme pe kemu genyu kerüshvu thyüti.

¹⁶Shye keri gü jonryü pezi nyü Npugü kerühvu ka Nkenkela Nga nda soti.

¹⁷Jonryü pvün nyü binzen lo-o jontsenyü nga ti, lo tsü jaka kebushükemvu tensü nti tyüti.

¹⁸Nga jonkeri nyü kequen-o rüshvuti, lo thatho nme thyü loho.

¹⁹Tsünyü a-ge tetsin nme kendi methu tsebwe kenyhun, tanyü tse nme lo tanyü tse chenme nyu tsenyü tse pe ketyüketsü pe kerüshvu hontse rope Npugü ki shüti.

²⁰Lo Shyeni pe kerüshvu oliv ter pe kerhün kethyü tho methutse nme genyu kilogram kenshen, tanyü tse genyu kilogram kenyhun,

²¹lo tanyü nyu nme genyu kilogram nme pe shüti.

²²Lo tenyü tse nme kope kemu genyu kerüshvu thyüti, hihontseo temi dan thyü nshün kelo rora thyüti.

²³Lonyütsen rope kerüshvu thyü kehü nyeki hidan hi thyüti.

²⁴Jon tsenyü hihontse, a-rün Npugü le a-kenyü nrün ketyüketsü pe kerüshvu thyüti. Khenyütsen rope kerüshvu lo vainzu pe kerüshvu nyeki kerüshvu hi gü thyü sinti.

²⁵Jon tsenyü nyü kequen-o rüshvuti lo thatho nme thyü loho.

²⁶Logvü nga jon kerinyü hagun le chenshün pe Npugü tsü kethyü ka kequen-o rüshvu ti, lo thatho nme thyü loho.

²⁷Lo a-ge tetsin nme kendi methu tsebwe kenyhun, tanyü tse nme lo chen me nyu tanyü tse tsenyü tse pe a-rün Npugü no a-kenyü nrün rope kerüshvu thyüti.

²⁸Shyeni pe kerüshvu, oliv ter lo kerhün kethyü tho methu tse nme genyu kilogram kenshen, tanyü tse genyu kilogram kenyhun

²⁹lo tanyü nyu nmeme genyu kilogram nme tse pe rüshvuti.

³⁰Lo tenyü tse nme kope kemu genyu kerüshvu thyüti, hihontse temi dan thyü nshünkelo rora thyüti.

³¹Khenyü tsen rope kerüshvu lo shyeni pe kerüshvu thyü kehü nyeki hidan lo vainzu pe kerüshvu thyüti.