Read Southern Rengma Naga TSIPWESWÜ 30 Bible Online

TSIPWESWÜ 30 - Southern Rengma Naga bible

TSIPWESWÜ 30

¹Mosa le jo hidan pe Israel nyu tsipwe sharhi dan ka zoshü.

²Temi nme le tha peha pe Npugü tsü titse zoshwi shü nmvue tha peha a-kekhe lo titse swe bin yatselo a-no a-jo borho nya ai ale thyü titse keshü aphu thyü mvuloshvu.

³Lünyu a-pvü kanyu yhun binzun kethyü nme le tha peha pe Npugü tsü titse nmvue tha peha ka a-kekhe lo titse zoshwi keshü,

⁴a-pvü le nyü loe thame ketekhi mvu yatselo tsügi le a-le zoshwi nmvue swe keshü tsü aphu thyümvu loshvu.

⁵Ai a-pvü le tsü rüla nyü kelo ka a-khin layatselo, a-le tsü thyümvue gwa. A-pvü le a-khin kela genyu Npugü le tsügi kemu jü shüti.

⁶Tenunyu kalu kemvu nyu nmele shachvü tse nmvue rüchün petsü shü mvuo nmvue tha peha ka a-kekhelo titse zoshüo kalu la,

⁷lo a-nyepvü le tsü rüla nyü kelo ka a-khin kemvu we a-le zoshwi keshü nmvue swe kenjü aphu thyü mvulo shvu.

⁸Ai a-nyepvü le tsü rüla nyü kelo ka a-khin layatselo, a-le tsü thyümvue gwa. Npugü le a-kemu jü shüti.

⁹Maginyu nmvue a-nyepvü le khekela nyu we a-le zoshwi keshü nmvue tha peha ka a-kekhe loti tse keshü aphu thyü mvu loshvu.

¹⁰Kalu kelanyu nme le swe nmvue tha peha ka a-kekhe loti tse zoshwi shü yatselo

¹¹a-nyepvü le tsü rüla nyü kelo ka a-khin kemvu we ale swe nmvue zoshwi keshü aphu thyümvu lo shvu.

¹²Ai a-nyepvü le tsü rüla nyü kelo ka a-no tsü thyü nya lotse a-khin la yatselo a-le tsü thyümvue gwa. A-le a-keswe thyü titse kebin a-nyepvü le khin kela genyu Npugü le tsügi kemu jü shüti.

¹³Tsügi le keswe nmvue zoshwi keshü lihie a-nyepvü le a-no thyülo nmvue khinla lo kegwa kenjü le bin nyo.

¹⁴Ai a-le keswe gü nyü kelo sendu gü thame khin mvu yatselo tsügi le swe nmvue zoshwi keshü tsü aphu thyü mvu loshvu. A-le tsü nyü kelo jon nyü khin kemvu tsüle a-kenda laso.

¹⁵Ai a-le kenkhin ki keswe gü pe a-konkendi thyü lalo swe shüo zenmvu kela khvu gü a-le pfü ti.

¹⁶Hile tenunyu kalu mvuo a-pvü kanyu kebin nyu nmvue kalu kela nyu nme le swe kethyü rüla genyu Npugü le tejvu pe Mosa tsü keshü.