Read Southern Rengma Naga TSIPWESWÜ 31 Bible Online

TSIPWESWÜ 31 - Southern Rengma Naga bible

TSIPWESWÜ 31

²“Midiannyu ge Israel nyu khün lolo. Nle tson kelo siki sila ti.”

³Tsügenyu Mosa le temi dan ka zoshü, “Midiannyu le Npugü ge nyuthyü shüyo, tsügenyu anyugun when-o shaja pe anyu tsü nrün genyu teri ndo lo.

⁴Terithyü nrün genyu Israel nyu tsipwe nme ka temi ye me nishülo.”

⁵Tson-o tsipwe nme ka temi yie me kejüshüo aphu kesin le temi yie tseryü kenyhun le teri genyu ndalo la.

⁶Lo Mosa le püshükeda gü Eleazar nyugü Phenihas no anyugun so keda thyüo kenshün kanyü dan lo zansü khipe anyugun tsü nrün genyu shu khilo-o anyugun nipe terinyu shü.

⁷Npugü le Mosa ka johokeshü hontse anyugun le Midian nyu when-o pechenyu aphu dushvula,

⁸Midian nyu raja minpvün: Evi, Rekem, Zur, Hur lo Reba dan-e sin. Lo Beor nyugü Balaam ko dushvu la.

⁹Israel nyu le Midian nyu tenunyu lo ntsenyu dan tenlo, lo anyugun senru lo kenya aphu khilo la,

¹⁰lo anyugun nyida dan lo kensenbin a phu rola.

¹¹Anyugun le ten kelo do lo senru aphu kesin,

¹²sen-o Moab nyu kazü ketejon Jordan perezin Jeriko ka Mosa, Eleazar lo Israel nyu temi süda gü kiryü.

¹³Tsontsin Mosa, Eleazar lo süda sharhinyu aphu kensenbin nken chwigü rihü dan teno.

¹⁴Tsüka Mosa le terinyu rani keryü yie so, lo tsi so kedanyu dan ge anyunta la.

¹⁵Tson-o a-le anyugun ka, “Nyu genyu hagun le tenunyu aphu kerhün zen hü nla?

¹⁶Rüchünshüta, Peor ka tenunyu hidan le Balaam senkethyü then-o temi dan tsonri sen-o Npugü kenyükemvu thyü la. Tsügenyu kenpen senryü Npugü temi dan geshü.

¹⁷Tsügenyu ntsoka pechenyue lo tenunyu-e peche tenu jvu thyü kela nyu ligü higü dushvu lalo,

¹⁸ai hagun genyu tenunyu, lünyu phusen dan no rhün bin ta.

¹⁹Lo hagun me dushvu kela nmvue kesimi kesü kela nyu aphu jon tsenyü kensenbin tegwenzin bin mvuloshvu. Jonshen lo jon tsenyü nyü tseka n npvü nthyü kenshün lo lo nle ten kelo gi ko thyü kenshün lo.

²⁰Lo phinya, thyügi, tenyühü nmvue tesen lihie thyü kenshün la mvu loshvu.”

²¹Eleazar Püshükeda gü le terinyu rani keryü temi dan ka zoshü, “Hile Npugü le pe Mosa tsü keshü tejvü dan le

²²Lihie rola hü kemvu, suna, rakagi, lazo, tegi, tin nmvue gin pe mah nyu shüo thyü kenshün la mvuloshvu. Lo kecha lihie zü pe nshünkemvu thyü kenshün la mvuloshvu.

²³

²⁴Jon tsenyü nyü hagun phinya thula mvuloshvu; tsonlo hagun le nshün lao kensenbin nyu yüryü logwa.”

²⁵Npugü le Mosa ka zoshü,

²⁶“Nle lo Eleazar hai sharhi nyu dan zen gü tha tenkelo lihie do lo senru sin-o swülo.

²⁷Tson-o kenjün pe jünhvu thyüo jünme pe shüpahü dan tsü lo kecha gü pe temi süda gü tsülo.

²⁸Lo shüpahü dan jün kipon do, methu, gada, tanyü lo tenyü-e tsi pvün ge nme me rani pe khajana thyü pe Npugü tsülo.

²⁹Tson-o Npugü jün tsü pe püshükeda gü Eleazar tsü shülo.

³⁰Lo temi süda gü jün kipon do, methu, gada, tanyü, lo tenyü-e henpvün ka nme me khipe, Phika gü ntsen kehü Levi nyu dan tsüshü.”

³¹Tson-o Mosa lo Eleazar au le Npugü le nyu johoshü yo tsü thyülo.

³²Shüpahü dan le tenkelo a-nyu npvü khilo kela nyeki kebin le hikho: tanyü--675,000, tenyü--72,000, Methu--61,000, gada--30,500, lo lünyu phusen--32,000.

³³

³⁴

³⁵

³⁶Jün hvu ka jün me shüpahü dan hon le tanyü lo tenyü 337,500 katsü Npugü khajana le 675; shüpahü dan jün methu 36,000 katsü Npugü khajana le 72; shüpahü dan jün gada 30,500 katsü Npugü khajana le 61; shüpahü dan jün lünyu phusen 16,000 katsü Npugü khajana le 32.

³⁷

³⁸

³⁹

⁴⁰

⁴¹Tson-o Npugü le johokeshü hontse Mosa le khajana pe Npugü ketsü tsüpe Eleazar tsüla.

⁴²Süda gü jün le shüpahü dan hon kenme: tanyü lo tenyü 337,500, methu 36,000, Gada 30,500 lo lünyu phusen 16,000.

⁴³

⁴⁴

⁴⁵

⁴⁶

⁴⁷Hika hi Npugü le johokeshü hontse Mosa le henpvün ka nmeme pe Npugü Phika ntsen kehü Levi nyu dan tsüla.

⁴⁸Tsüsika rihüdan zen gü kethyü kedanyu ju le Mosa ki ryüo

⁴⁹“Kedagü, agun hensin shüpahü dan swü laryü nme-e nmhen mvule.

⁵⁰Tsügenyu agun le khikelo suna, ronye, bukerhe, pin, benkhi, nye lo tyü dan senryü bin nle. Agun le agun keyhun min thyüpe Npugü tsü bin nyo, a-no agun ntsen hü nrün genyu.”

⁵¹Tson-o Mosa lo Eleazar au le suna pe kethyü ronye dan tsü khilo.

⁵²Kedanyu dan le khi keshü aphu le kilogram tsihvu pen kesa.

⁵³Kedanyu kemvu dan we anyugun le hyukelo tsü khilo la.

⁵⁴Tson-o Mosa lo Eleazar au le Npugü no Israel nyu temi ntsen lo nrün genyu suna gü sen gü Phika gü ki shüla.