Read Southern Rengma Naga TSIPWESWÜ 32 Bible Online

TSIPWESWÜ 32 - Southern Rengma Naga bible

TSIPWESWÜ 32

¹Reuben lo Gad tsipwe le senru kechon bin. Anyugun le Jazer lo Gilead kazü le senru genyu gwasa nrün hyu keshü ka,

²gü Mosa, Eleazar lo sharhi kechanyu dan ka zoshü,

³“Npugü le Israel nyu che shüo nkhen kelo--Ataroth, Dibon, Jazer, Nimrah, Heshbon, Elealeh, Sibmah, Nebo lo Beon rünyi dan lojvü hile senru genyu gwa mabin, lo agun le senru kechon le bin.

⁵Tsügenyu hagun cheno-e agun no Jordan züri nken gü nyao kazü higü pe agun no agun hon thyüta.”

⁶Tsontsin Mosa le anyugun jokenishü, “Hagun tsasikezen nyu le terinyu gülo hagun le hika bin tinla nyü bin ole?

⁷Israel nyu le Jordan pfüthüo Npugü le pe anyugun ketsü kazü nyu gü kejü hagun le nyuthyüo anyugun nyunthyü nkun ti tse hü nla?

⁸Hagun pepvünyu dan ko ale Kadesh Barnea ka anyugun nipe kazü rhi kethyü ka tsühontse thyüla.

⁹Anyugun le Eshkol kazü ketejon keti gü kazü gü hyushü, ai raniryüo temi dan nyun thyü nkun pe no Npugü le khishü kela kazü gü nyu yümvula.

¹⁰Tsünyü Npugü le anyuntao zoshwishü:

¹¹‘Anyugun le ajozen kemvu genyu Ijipt nyu chwikeryü ka chen nki lo tsü so nyu nme no ale zo pe Abraham, Isak lo Jakob tsü kenjün kazü gü nyu yü loho tse ale swe laso.’

¹²Npugü jozen kelo Keniz nyu Jephunneh nyugü Kaleb lo Nun nyugü Joshua au nti a-me kechanyu swe tsüla.

¹³Npugü le Israel nyu ge a-nyunta lao a-kenyükemvu thyü kela shenhe tsügü apentha sibula kemvuthen anyugun no chen henzi tehenyhunkemvu nyu hola.

¹⁴Lo ntsoka hagun shenhe keshün le hagun pepvünyu sunka kemu thyüo Npugü nyunkekhü senryü Israel nyu ge shüni titse ndo bin nyo.

¹⁵Hagun Reuben lo Gad temi dan le Npugü sithen mvu layatselo a-le temi hidan aphu khe pe tehenyhunkemvu nyu nke nilati, lo tsüle hagun ge.”

¹⁶Anyugun le ryü Mosa ka zoshü, “Agun khin nya, agun no tso khwe pe agun senru dan hun la lo agun nyenyu genyu chwida khwe la terilo.

¹⁷Tson-o agun le Israel nyu zen gü anyugun hon thyü nrün kazü günyu anyugun le bin lo kemvuthen rio teri thyüti tse ndo bin nle. Tsüjaka agun nyenyu dan no kazü higü nyu temi dan benka yümvulo nrün genyu chwida hun kela nyida nyu bin tile.

¹⁸Israel kechanyu aphu kazü a-jün hyulo la kemvuthen agun le ranio agun kaki ryüla loho.

¹⁹Lo agun le hiki Jordan npho zin agun jün hyulo kela si genyu Jordan lizin anyugun dan nyu thame loloho.”

²⁰Mosa le anyugun jokenishü, “Hagun le zokebin ketsin yatselo hika Npugü mhundyü ka teri nyu gü nrün ndolo.

²¹Hagun teri temi aphu Npugü zokezen nyu Jordan pfüthü gü Npugü le ngun shwikerüchün nyu so kvu lola kemvuthen anyugun wheo

²²kazü gü lolo lati. Tsüsiki hagun le rani ryü logwa hagun le Npugü lo Israel nyu ge hagun le zoshwishü kenjü thyü pen kela genyu. Tsonyatselo Jordan npho zin hile hagun hon tse Npugü le sha loti.

²³Ai hagun le zoshwi shüo then mvuya tselo Npugü mhundyünyu mu bin nyo. Lo hagun kemu genyu shaja hyuloti, tsü genyu thyü zü nya.

²⁴Tsügenyu hagun nyida dan thyülo lo hagun senru dan hunla, ai hagun le nyu zoshwi shü njü yo thyülo!”

²⁵Tsontsin Gad lo Reuben temi dan le zoshü, “Kedagü, nle zo keshü hontse agun le thyüti.

²⁶Agun nu, agun nyu, agun tanyü, agun thu dan no Gilead nyida dan ka bin tseti

²⁷ai Npugü jokezen nyu agun aphu terinyu gü titse ndo bin nle. Nle zokeshü hontse agun le Jordan pfüthü gü teri thyüti.”

²⁸Tsügenyu Mosa le ahza hi pe Eleazar, Joshua lo Israel sharhi kecha dan tsüshü:

²⁹“Gad lo Reuben temi dan le Jordan pfüthüo Npugü johokeshü then-o teri thyü titse ndo bin lo anyugun keche sen-o hagun le kazü gü lolo yatselo Gilead kazü gü pe anyugun tsülo.

³⁰Ai anyugun le Jordan pfüthü gü mvuo hagun zen teri thyü yatselo anyugun ko hagun zen-o Kanan kazü nyu anyugun jün hyu loti.”

³¹Tsontsin Gad lo Reuben temi dan le a-jokenishü, “Kedagü, Npugü le johokeshü hontse agun le thyüti.

³²Npugü johokeshü then-o kanan kazü nyu chwigü teri thyüti, tson-o hika Jordan npho zin agun hon no bin ti.”

³³Tson-o Mosa le Amornyu raja Sihon, Bashan raja Og au kazü, nyida dan lo tsü kehun aphu zo pe Gad, Reuben lo Manasseh tsipwe ponha tse tsüla.

³⁴Gad tsipwe le chwida le kebin nyida Dibon, Ataroth, Aroer,

³⁵Atroth Shaphan, Jazer, Jogbehah,

³⁶Beth Nimrath, lo Beth Haran dan thyü ketse nilo.

³⁷Lo Reuben tsipwe le Heshbon, Elealeh, Kiriathaim,

³⁸Nebo, Baal Meon (zan higü kelula,) lo Sibmah hidan thyü ketse nilo. Anyugun le thyü ketse nikelo nyida dan zan keshün thola.

³⁹Manasseh nyugü Machir kami le gü Gilead hüo tsünyu kebin Amornyu hülao tsü nkhen lola.

⁴⁰Tsügenyu Mosa le Gilead pe Machir kami tsülao anyugun le tsünyu yhun tinla.

⁴¹Manasseh nyugü Jair kami le rünyi peha wheo lolo la njüo a-zan tho pe “Jair rünyi dan” tse tholo.

⁴²Nobah le Kenath lo tsü rünyi dan lolo njüo tsü zan tho pe Nobah tse la.