Read Southern Rengma Naga TSIPWESWÜ 33 Bible Online

TSIPWESWÜ 33 - Southern Rengma Naga bible

TSIPWESWÜ 33

¹Israel nyu le Mosa lo Aaron au sharhi hensin Ijipt nken chwi keryü ka kensenbin dan zan le hi hontse.

²Npugü le johoshüo anyugun le nsen kelo bin ka Mosa le bin gü zan thu lohü.

³Chen tsügü shye kerigü jonryü pvün nyü Nkenkelo nga keri gü sinyü Israel nyu le Ijipt nkenshü. Ijipt nyu yhühyu nyu Npugü le anyugun ntsen-o Rameses nyida nken chwila,

⁴tsüdan le Npugü le dushvu kela anyugun nyu peche nyuri dan sun bin. Hihontse thyüo Npugü le a-le Ijipt nyu tero dan nyekvu tse tsin shü.

⁵Israel nyu le Rameses kheo ryü Sukkhoth ka nsen lo.

⁶Tsüsika kazü kesi tenyu Etham ka nsenlo.

⁷Tsünyu ranio Baal Zephon npho zin Pi Hahiroth ka ryüo Migdol khoka nsenlo.

⁸Anyugun le Pi Hahiroth nken-o kenhon zida pfüthü sentse kazü kesi Shur nyu ryü; tsünyu jonshen tsonchü ryüo Marah nyu nsenlo.

⁹Tsünyu bin-o Elim ka gü lo tsünyu zülvu tseryü kenyhun lo kvubin hentsenyü le kebin genyu tsü ka nsenlo.

¹⁰Anyugun le Elim kheo gü Suez zükenchon khoka nsenlo.

¹¹Tsüsika gü Sin kazü kesi nyu nsenlo.

¹²Tsüka gü Dophkah nyu nsenlo,

¹³lo tsüsika Alush ka bin.

¹⁴Tsüsika Refidim nyu gülo, tsünyu anyugun le zü tsükelo bin ndila.

¹⁵Refidim nyu bin-o Hor kazüthun ka gü bin hidan ka nsenlo: Sinai kazü kesi, Kibroth Hattaavah (nmvue “Kenrin Sika,”) Hazeroth, Rithmah, Rimmon Perez, Libnah, Rissah, Kehelathah, Shepher kazüthun, Haradah, Makheloth, Tahath, Terah, Mithka, Hashmonah, Moseroth, Bene Jaakan, Hor Haggidgad, Jotbathah, Abronah, Eziongeber, Zin tehenyhunkemvu kazü (tsüle Kadesh) lo Edom nyu kazü teka Hor kazüthun.

³⁸Npugü le johokeshü hontse püshükeda gü Aaron le Hor kazüthun ge küla. Israel nyu le Ijipt nken chwikeryü chen henzi gü shye pvün ka jon keri nyü a-keyhun chen 123 ka a-le sila.

⁴⁰Kanan tesin kipon kebin Arad nyu raja gü le Israel nyu le ryü kejü rüla nyülo.

⁴¹Hor kazüthun ka gü Moab nyu kazü ketejon keti Israel nyu le bin hidan ka nsenlo: Zalmonah, Punon, Oboth, Moab nyu kazü nyu Abarim nke kenjü, Dibon Gad, Almon Diblathaim, Nebo kazüthun khoki Abarim kazüthun dan ki, Jeriko kepen ki Jordan züri pere kipon Moab nyu kazü ketejon ki, Beth Jeshimoth lo Akakia ketejon au jaki tse.

⁵⁰Jordan züri pere zin Moab nyu kazü ketejon nyu Jeriko kepen ki Npugü le

⁵¹Israel nyu no then mvulo keshvu hidan pe Mosa tsüshü: “Hagun le Jordan pfüthüo Kanan nyu yü lolo,

⁵²hagun le tsünyu keyhun nyu aphu hü la mvuloshvu. Anyugun le tso lo tegi pe teromen kethyü dan lo kershvubin aphu nke la mvu loshvu.

⁵³Tson-o kazü gü khinlo-o tsünyu binlo, ale tsü pe hagun tsü kebin genyu.

⁵⁴Henkeshwi thyüo kazü keda gü pe tsipwe lo pfüphun keda gü tsü lo keshe pe keshe gü tsü tseo kenjün lo.

⁵⁵Ai hagun le kazü tsünyu keyhun nyu hüla mvulo, tsünyu khe kenjü dan le hagun yhütyü jen lo hagun khoka tsehü hontse hagun kevü lo hagun ntsun ti.

⁵⁶Hagun le anyugun hüla mvulo, ale anyugun nke lati tse rhi kebin hontse hagun nke lati.”