Read Southern Rengma Naga TSIPWESWÜ 35 Bible Online

TSIPWESWÜ 35 - Southern Rengma Naga bible

TSIPWESWÜ 35

¹Jordan pere zin Moab nyu kazü ketejon Jeriko kepen ka Npugü le Mosa ka zoshü,

²“Levinyu no yhun nrün genyu nyida lo nyida kehun shai peha pe tsü shülo tse Israel nyu ka zoshülo.

³Nyida hidan le Levinyu hon thyüo anyugun le tsünyu yhunti. Lo shai gü le anyugun Methu lo senru kecha aphu genyu.

⁴Shaifü güle nyida chwida ngwen ka gü keti le meter 450 ti,

⁵tson-o nyida gü le a-lvu nyu lo a-te lizin hizin meter 900 le bin ti.

⁶Temi peha le shamvuo me boshvu lalo gü sun lo nrün genyu hagun le nyida tsero pe Levinyu tsüti. Tsünye ki nyida kecha henzi kenyhun pe tsülo.

⁷Shai sin-o, kerhün keshü le nyida henzio tetse.

⁸Kazü keshe keda shwio tsipwe nmeme ka Levinyu nyida dan le chwiryüti.”

⁹Npugü le Mosa ka zoshü

¹⁰Israel nyu ka zoshü lotse: “Hagun le Jordan züri pfüthüo Kanan kazü nyu yükelo ka,

¹¹temi nme le shamvuo me boshvu lalo no gü sunlo nrün nyida dan kejü ti.

¹²Sikela gü shvunye nyu le khünzo titse keso ka a-no kenshvu ndio bin lo nrün genyu. Süda mhundyü a-jün keramvu tse temi dushvu kela pe nmu kebin gü dushvu nya.

¹³Nyida tsero kejü lo.

¹⁴Jordan npho zin kenshan lo Kanan kazü nyu kenshen tse.

¹⁵Israel nyu lo tesin hagun dan nyu bin tinkelanyu nmvue jon keshanyu kebin nyu genyue Nyida hidan hipe sun kelo rünyi thyüti. Ligü higü shamvuo me boshvu lalo tin-o hidan nme ka gü logwa.

¹⁶Tsonyatse-e temi nme le tegi nmvue tso nmvue tesen sen temi peha boshvu layatselo, ale me boshvu kela genyu mula so, a-no si mvuloshvu.

¹⁹Sikela gü shvunye a-kho kenitsin gü le me boshvu kela gü dushvu la mvuloshvu. A-le tsügü hyu lolo a-boshvu lati.

²⁰Temi nme le temi peha shwirüchün-o chenketo nmvue tha peha pe jonshvu la

²¹nmvue a-ben pe vüshvu lalo a-le me boshvu kela genyu a-no si mvu loshvu. Sikela gü shvunye a-kho kenitsin gü le me boshvu kela gü boshvu la mvuloshvu. A-le tsügü hyu lolo boshvu lati.

²²“A-le shwikerüchün genyu mvu ai shamvuo chen pe jon nmvue tha shwe pe jon shvu la.

²³Nmvue hyumvue tso shwe pe a-le nthyü nnyü titse bin kemvu lo a-shwikerüchün nyu kemvu peha jonshvu la.

²⁴Tson kethyü ka süda güle sikela gü khenzo titse kebin a-shvunye dan mvule me boshvu kela gü nopen shü mvuloshvu.

²⁵Süda gü le sikela gü shvunye dan ben nyu me boshvu kela gü kenishüo no rani-o a-le sun kelo nyida gü nyu gü lo mvu loshvu. Tson-o tsü gwenkho ka püshü kengun thyü kebin gü le sila kemvu then a-le tsünyu yhun mvuloshvu.

²⁶Me boshvu kela gü le a-le tin gü sun kelo rünyi gü nken chwio

²⁷sikela gü shvunye le ahyu lo njüo a-boshvu lae khün kezo tho tsüle me bokeshvu mvu.

²⁸Me boshvu kela gü tsüle a-le sunkelo rünyi nyu bin-o püshü kengun gü kesi ti mvu loshvu, ai tsüsiki we a-le rani a-ka ki gun logwa.

²⁹Hagun le lika hika yhun hüe hagun lo hagun nyenyu le tejvu hi then ti.

³⁰“Me boshvu kela pe nmu kethyü nyu temi mihvu nmvue tsü nye kechon shahyu le bin lo boshvu la logwa; ai shahyu nme nti genyu temi nme boshvu lo nrün ndi.

³¹Me bo keshvu nyu boshvu la mvu loshvu. A-le pisa pe tha lao shaja hi nrhilo nrün di.

³²Temi nme le tin-o sunkelo rünyi ki gü lalo, Püshü Kengun gü le sikemvu ka a-le tha-o rani a-kaki ryülo nrün ndi.

³³Hagun le tsü thyüyatselo, hagun le yhun kebin kazü gü nrhu laso. Me bokeshvu nyu le kazü gü nrhu lahü, lo me bokeshvu gü no sishü kemvu we a-le kazü dika me boshvu layo kazü tsü gü rora thyü kenshün kelo tson ndi.

³⁴Ale Npugü, ale Israel nyu temi dan nyu yhun kebin genyu, hagun le yhun kebin kazü gü nrhu nya.”