Read Southern Rengma Naga TSIPWESWÜ 36 Bible Online

TSIPWESWÜ 36 - Southern Rengma Naga bible

TSIPWESWÜ 36

¹Josef tsipwe Manasseh nyu, Machir nyugü Gilead kami ka sharhi dan le Mosa lo sharhi kecha nyu dan karyü.

²Anyugun le zoshü, “Npugü le hagun no henkeshwi thyüo ka zü gü kenjün pe Israel nyu temi dan tsü shülo tse johoshü. A-le hagun no agun shvunye gü Zelophehad hon pe a-nyugi ju tsü shülo tse kethyü ko a-johoshü.

³Ai rüchün shüta, anyugun le tsipwe kecha ki kalu tin lalo, anyugun hon le tsipwe tsü hon thyü lati, tson yatselo agun jün thyü keshü tsü le rho kelai.

⁴Jubilee cheen a-hon jwe kela aphu ranio nduka a-npu nyu ben nyu yüla, tson-o Zelephehad nyugi ju hon le kethonthen anyu le kalu kela tsipwe hon sin lalo agun tsipwe we nke lati.”

⁵Tsügenyu Mosa le Npugü kanyu johokeshü hi pe Israel nyu tsüshü. A-le zoshü, “Manasseh tsipwe le kezo tsü le njü,

⁶tsügenyu Npugü le zokeshü le Zelophehad nyugi ju le anyu le segü ka kalu nyü yo anyugun kenda, ai anyugun tsipwe ka mvu loshvu.

⁷Israel nyu aphu a-hon le a-tsipwe nyu bin ti.

⁸Israel nyu tsipwe dan nyu tenu nyu ligü higü a-hon kebin nyu le tsipwe tsügü nyu kalu mvu loshvu. Hihontseo Israel nyu nmeme tse a-pvübonnyu hon gwen ti,

⁹lo gwen nrün kenya le tsipwe nme ka kelao kecha ki gülo nrün ndi. Tsipwe nme me tse a-hon senzin bin ti.”

¹⁰Tson-o Zelophehad nyugi ju Mahlah, Tirzah, Hoglah, Milkah, lo Noah ju le Npugü le Mosa ka johokeshü hontse anyugun shvunye ka kalu kü.

¹²Anyugun le Josef nyugü Manasseh pfüphun ka kalu-o anyugun hon no anyugun pvübon hon nyu binlo.

¹³Hile Jordan pere zin Moab nyu kazü ketejon Jeriko kepen ka Npugü le Israel nyu genyu tejvü lo then nrün hidan pe Mosa tsüshü.