Read Southern Rengma Naga TSIPWESWÜ 4 Bible Online

TSIPWESWÜ 4 - Southern Rengma Naga bible

TSIPWESWÜ 4

¹Npugü le Mosa ka zoshü

²Levi tsipwe Kohath pfüphun kako lo kamimi thyüo temi swü,

³lo Npugü kehü Phika günyu tha thyülokegwa pechenyu chen shenryü kagü henpvün keti jaka nyu aphu zan thu lolo tse shü.

⁴Anyugun tho le thatho kenshün tsin dan.

⁵Johidanhi Npugü le pe Mosa tsüshü. Kensenbin kela kethyü ka, Aaron lo anyudan le Phika günyu yüo, Kejozenkelo Khinpha gü mhundyü nyu süden kebin phigü khishe pe Khinpha gü hen lati.

⁶Lo thyügi kegwa pe tsü jelao phi kenzi pe a-so hen la njüo kepenvü pe a-hensin rhishü lati.

⁷Anyugun le phi kenzi pe tensü pe Npugü kerüshvu miz gü hen lao khundan, tharünkegwa keshü khundan, kerüshvu khundan lo vainzu pe kerüshvu honpen dan aphu pe a-ge shü lati. Miz gü ge tensü no bin zin ti.

⁸Anyugun le phi kenhon pe hi aphu so hen lao thyügi kegwa pe tsü jela lo kepenvü pe a-hensin rhishü lati.

⁹Anyugun le phi kenzi pe makenbenbin lo makhin dan, ketsevü, kepenkhun, lo olivterzkeshü hon dan aphu hen lati.

¹⁰Anyugun le thyügi kegwa pe tsü lo tsükanyü aphu jelao pe kepenbin nme ge shü lati.

¹¹Tsüsika anyugun le phi kenzi pe suna pe kethyü kershvubin gü hen lo-o thyügi kegwa pe jela njüo kepenvü pe a-hensin rhishü lati.

¹²Anyugun le kenshün bin nyu kesen lalü aphu pe phikenzi ka jwe pe thyügi kegwa pe jela njüo pe kepenbin nme ge shü lati.

¹³Anyugun le kershvubin gü nyu jonbü khü lao phi kemeren pe a-so hen lati.

¹⁴Kershvubin nyu kera ka sen kehü: maketsevü, hükesü, kekhüvü, khunda dan lo kanyükecha aphu pe tsüge shü lati, Anyugun le thyügi kegwa pe je lao kepenvü pe a-hensin rhishü lati.

¹⁵Kensenbin kela kethyü ka, Aaron lo anyudan le kenshün hon dan lo tsünyu kanyü dan je kü la lo Kohath pfüphun nyu no ryüo tsü pen ti. Kohath pfüphun nyu no kenshün hon dan kesü nya, anyugun sila loshvu. Lihi kae phika gü sentin kethyü tha hidan hile, Kohath pfüphun le thyüti.

¹⁶Aaron Püshükeda gü nyugü, Eleazar le Phika gü apentha makhin genyu ter, tharünkegwa, shyepe kerüshvu, yünkehü ter lo thyükenshün pe Npugü tsü kela phika günyu kebin aphu shwi ti.

¹⁷Npugü le Mosa lo Aaron au ka zoshü

¹⁸“Kohath nyu pfüphun nyu no

¹⁹Kenshün hon dan kho nni ryüo sila nya. Hihontse mvu nrün genyu Aaron lo anyudan no yügü anyugun nmeme tho lo no nyu pen tiyo zoshü mvu loshvu.

²⁰Ai Kohath nyu le Phika gü nyu yügü Püshükeda dan le kenshün hon dan sentin nrün genyu nda nron kebin hyushü lo anyugun le si lati.”

²¹Npugü le Mosa ka zoshü

²²Levinyu Gershon pfüphun kako lo kaminyu temi swülo,

²³lo Npugü kehü Phika günyu thathyü lo kegwa pechenyu chen shenryü ka gü henpvün keti jaka nyu aphu zan thu lolo tse zoshü.

²⁴Tha hidan kepen le anyugun jün:

²⁵Phika gü, kanyu zin kehü, ka tegwezin kehü, katsun ki kehen thyügi kegwa gü, khenpvü kesunphi,

²⁶Phika lo kershvubin kamhun kesunphi lo rondan, kamhun khenpvü kesunphi dan lo tha hidan pe shü kethyü ka kesen kanyü aphu. Tha hidan hi genyu mvulo keshvu aphu anyugun le thyüti.

²⁷Mosa lo Aaron au le Aaron lo anyudan le pe Gershon nyu no thyü lo pvü lo tse keshü dan shwiti.

²⁸Phika nyu thatho hidan hile Gershon pfüphun le ketsen ti. Anyugun le Püshükeda gü Aaron nyu gü Ithamar hensin nyu hidan thyüti.

²⁹Npugü le Mosa ka zoshü Levinyu Merari pfüphun kako lo kaminyu temi swülo,

³⁰lo Npugü kehü phika günyu thathyülo kegwa pechenyu chen shenryü ka gü henpvün keti jaka aphu zan thu lolo tse zoshü.

³¹Phika gü karun, kapha, kachon lo kachon phasin,

³²lo kachon, kachon phasin, ketsevü lo phika gü kamhun kehun ron dan lo tsü tunso kehü kanyü aphu kepen tsü le anyugun tho. Temi nme le kanyü zan nmeme kepen tsü le a-tho.

³³Hidan hile Phika gü lotho nyu Merari pfüphun jün: anyugun le Püshükeda gü Aaron nyugü Ithamar hensin nyu tha hidan pen ti.

³⁴Npugü le jozokeshü hontse Mosa, Aaron lo anyugun dan nyu sharhi dan le Levi pfüphun kenshen, Kohath, Gershon, lo Merari dan swülo. Anyugun le tsipwe kochwikeryü lo kami thyüo Npugü kehü Phika günyu thathyülo kegwa pechenyu chen shenryü ka gü henpvün keti janyu aphu zan thukelo le hihontse: [Pfüphun] — [Temi] Kohath — 2,750 Gershon — 2,630 Merari — 3,200 Kerhün: — 8,580

⁴⁹Npugü le Mosa ka johokeshü hontse temi nmeme zan thu lo; lo Npugü le Mosa ka johokeshü nyu nmeme lotho nmvue a-le pen nrün a-jün tho pe tsüshü.