Read Southern Rengma Naga TSIPWESWÜ 5 Bible Online

TSIPWESWÜ 5 - Southern Rengma Naga bible

TSIPWESWÜ 5

¹Npugü le Mosa ka zoshü,

²“Israel nyu dan no kensenbin nyu, nyuleketyünyu nmvue a-mige tsun kehünyu lo ligü higü simin kesüo nshünmvu kela nyu hüla lo tse zoshülo.

³Anyugun no ale atemi dan nyu yhunkehü kensenbin gü nrhu la mvu nrün genyu nshünkemvu dan hi nishwi lalo.”

⁴Tsontsin Israel nyu le a-jozen-o kensenbin nyu tsüdan aphu hüla.

⁵Npugü le pe Mosa tsüshü

⁶Israel nyu genyu tejvü hidan pe. Ligü higü Npugü jozen mvuo peha ge a-zümvu lalo,

⁷a-le a-ge a-zümvu kela gü ka a-kemu zoshwila lo a-mi aphu lo tsünyeki jüntsi ka nki pe tsümvu loshvu.

⁸Ai temi tsügü le sila lo a-mi pe tsülo kegwa a-shvunye a-khokeni ndi yatselo, püshükedanyu genyu tsüpe Npugü tsü lati. A-mithyü nrün higü hile thyüzü kela gü genyu tenyütse pe thyükeshün jvü kethyü nyeki kesin.

⁹Lo Israel nyu le tha kerüche pe Npugü ketsü lihie anyugun le pe püshükeda digü tsüshü yo tsü gü hon.

¹⁰Püshükeda gü le mele pe a-ketsü gü tsü lo loti.

¹¹Npugü le Mosa ka johoshü

¹²tejvü hidan hi pe Israel nyu tsüshü lotse. Me nunyu nme le serimvuo temi kechanyu zen zhüo a-npvü a-nrhu la letse rüchün kenshvu le bin logwa. Ai a-nu le kebu kebin genyu a-nyepvü le shato mvu lo shahyu nme ndi lo tsügi le serimvu kebin ten lomvu. Nmvue me nyepvü nyu nme le a-nu le serikemvu thyümvue rüchün nshvubin.

¹⁵Lihi thyü-e temi gü no a-nu zen püshükedagü ki ryüti. A-le kerüshvu thyü nrün barley tho kilogram nme senryüti, ai a-le oliv ter nmvue tharün kegwa jape a-so shü loho, tsüle ketsin gü shalo nrün genyu a-nyepvü le rüchün kenshvu ka kerüshvu thyü kebin nme.

¹⁶Püshükeda gü le tenu gi zen chwiryüo no kershvubin mhudyü ka so loti.

¹⁷Lo a-le kenshün zü ja pe nnyo la nme nyu shü lo njüo zü no khülo nrün genyu Npugü kehü Phika gü kanyu ki kazünyu nnyo peha khipe tsünyu shülo.

¹⁸Tson-o a-le tenugi shün shwüshü lo tho pe kerüshvu tsü pe tsügi ben ka shüti. Püshükeda gü le a-ben nyu shochün senryü kebin zü kekhü pe keshü la gü sen ti.

¹⁹Tson-o tenugi no püshükeda gü le keswe zokeshü tsüle a-kendo letse zoti: “Nle keyüla lamvuyatselo zü higü le senkeryü shochün gü le n nthyü nnyü loho.

²⁰Ai nle keyüla layatselo,

²¹Npuü no n lope ntemi dan nyu shochün kepfü gi thyü lalo.

²²Zü higü no nginda nyu yüo tsüno nme chwiryü lo nthyümi no tse lalo.” Tsonshü lo tenugi le, “Akenda le Npugü no tsühontse thyü shülo,” tsonti.

²³Tson-o püshükeda gü le shochün higü thulo njüo zü pe süpe zü kekhü la günyu shülo lati.

²⁴A-le tenu gi no a-gin thyü sa lalo kegwa zü tsü ketsü mhundyü,

²⁵Püshükedda gü le tsügi ben nyu tho pe kerüshvu gü tsü khi lo njüo, sen-o thyükenshün pe Npugü tsüo kershvubin ge shü lati.

²⁶Tson-o a-le kerüshvu zansü tsü jenthün gwa khi lo-o pe kershvubin ge ro shüti. Kenkhin tsin ki a-le tenugi no zü gü tsüti.

²⁷Tenu gi le keyüla layatselo a-gin thyü sa chwiryü a-ginda nmeo a-thyümi le tsela ti. Tson-o a-temi dan nyu shochün kepfü nyu thyü lati.

²⁸Ai a-le kemu ndi yatselo a-ge thame kenjün thyü kemvui lo ale nyuzen logwa.

²⁹Temi nme le a-nu le keyüla la letse rüchün nshvu lo a-nyun tegi kethyü nyu genyu tejvu le hile. Tenu gi no kershvubin mhundyü ka solo-o püshükeda gü le tha higü thyüti.

³¹A-nyepvü nmu kethyü ndi, ai tenu gi le thyüzü lalo, a-le tsügenyu kenjün thyüti.