Read Southern Rengma Naga TSIPWESWÜ 8 Bible Online

TSIPWESWÜ 8 - Southern Rengma Naga bible

TSIPWESWÜ 8

¹Npugü le Mosa ka zoshü,

²“Aaron no makhin tsenyü pe makenben bin ge keshü ka makenben no mhundyüzin benlo nrün genyu pe shülo tse zoshülo.”

³Aaron le a-jozen-o makhin dan pe makenbenbin mhundyü zin ntsun shü.

⁴Npugü le a-joja tsin pe Mosa hikeshü hontse makenben bin gü le a-binka gü a-ra keti suna jon pe thyü.

⁵Npugü le Mosa ka zoshü,

⁶“Israel nyu dan nyu Levinyu khikho lo njüo anyugun thyü kenshün lo,

⁷hihontse lo: thyükenshün zü kezen pe anyugun ge shüo anyugun no anyugun mi a-pentha ge a-hü thula lo anyugun phinya thula. Tsonlo anyugun le nshün lati.

⁸Tson-o anyugun no methu tsebwe nme lo oliv ter pe kerhün kethyü shye pe kerüshvu ka sen mvulo keshvu dan, lo kemu genyu kerüshvu methu tse kecha nme tse khilo.

⁹Tsüselo Israel nyu aphu no kehun lo-o Levinyu no ale kehü Phika gü mhundyü nyu solo.

¹⁰Israel nyu dan no anyugun benshwe pe Levinyu pe ge shüti,

¹¹lo Aaron le Israel nyu dan nyu Levinyu thyükenshün pe jwe kerüche hontse pe atsüo anyugun le atho thyüti.

¹²Lo Levinyu le benshwe pe methu tse hvu pe ge shüti; Levinyu thyükenshün kelo rora thyü nrün genyu, nme pe kemu genyu kerüshvu lo kecha gü pe rope kerüshvu thyüti.

¹³“Levinyu thyükenshün pe jwe kerüche hontse pe atsü, tson-o Aaron lo anyu dan no anyugun ntsen lo.

¹⁴Hihontse Israel nyu dan nyu Levinyu khikho lo-o anyugun le ahon thyüti.

¹⁵Nle anyugun khikho pe thyünshün kela siki anyugun le Phika günyu lotha thyü lokekü thyü loti.

¹⁶Israel nyu peche nyuri aphu sunka ale anyugun nkhenlo laso, anyugun le a npvü ahon.

¹⁷Ale Ijipt nyu nyuri aphu boshvu kela ka Israel nyu kaqvün nyu nyuri gü lo senru lihie nyuri gü thyükenshün pe a npvü ahon thyülo laso.

¹⁸Lo ntsoka ale Israel nyu nyuri aphu sunka Levinyu khilo bin nle,

¹⁹lo ale Levinyu no Israel nyu genyu Phika günyu lotho thyü, lo anyugun le Kenshünbin gü kho nni ritsin ryüo kenkekenmhü no Israel nyu ge ryümvu nrün genyu khin lo tse pe Aaron lo anyu dan tenyen laso.”

²⁰Npugü le Mosa ka johokeshü hontse, Mosa, Aaron lo Israel nyu aphu Levinyu thyükenshün la.

²¹Levinyu le anyu npvü anyu thyükenshünla lo anyugun phinya thu la, tson-o Aaron le anyugun thyükenshün pe jwe kerüche hontse pe Npugü tsüshü. A-le anyugun thyünshün kelo jvü thyüla.

²²Temi dan le Npugü le Levinyu genyu Mosa ka johokeshü aphu thyüla. Tson-o Levinyu le Aaron lo anyu dan hensin ka Phika günyu lotho thyülo kü lo.

²³Npugü le Mosa ka zoshü,

²⁴“Levinyu nmeme tse a-keyhun chen nkipvün so nyu le ale kehü Phika günyu a-tho thyüti,

²⁵lo a-keyhun chen henpvün ka a-thanyu rani lati.

²⁶Tsüsiki a-le Phika günyu thatho ka a-pvünyu Levinyu keche logwa, ai a-no a-npvü lotho nme thyü loshvu. Hihontse nle Levinyu tho ketsen gunti.”