Read Southern Rengma Naga TSIPWESWÜ 9 Bible Online

TSIPWESWÜ 9 - Southern Rengma Naga bible

TSIPWESWÜ 9

¹Israel nyu le Ijipt nkenkela chen hvu gü shye kerigü ka Sinai kazü kesi ki Npugü le Mosa nthon-o a-ka zoshü,

²“Hi shye jonryü pezi nyü, yhüko keche ka bin zen lo-o Israel nyu no nkenkelo tejvü dan aphu then ti.”

⁴Tson-o Mosa le Israel nyu no nkenkelo nga then lotse zoshü,

⁵tsü genyu anyugun le shye keri gü jonryü pezi je Sinai kazü kesi nyu tsü thyü. Npugü lo Mosa ka johokeshü hontse temi dan le tsü aphu thyülo.

⁶Ai tsüka temi peha le simi kesü lao nshünmvu kela genyu, tsünyü nkenkelo nga thenlo mvula. Anyugun le Mosa lo Aaron au ka gü

⁷hihontse zoshü, “Agun le simi kesü kela genyu nshünmvu laso, ai nyuthyüo Israel nyu kecha dan sin-o tha hope Npugü kerüshvu ka agun pe sinmvu la mon?”

⁸Mosa le a-jokenishü, “Ale Npugü kipon tsonketsin hyulo kemvu then khwe tselo.”

⁹Npugü le Mosa ka zoshü

¹⁰Israel nyu temi dan ka zoshülo tse, “Hagun nmvue hagun bon nyenyu lihigü simi kesüo nshünmvula nmvue njwen tsonthon ki gülae a-le nkenkelo nga then nyü yatselo,

¹¹tsüsi shye gü jonryü pezi je tsü nga logwa. Kebu shükemvu tensü lo henkekhü tyüo tsü nga ti.

¹²Ketyüketsü lihie nsen bin-o lonyü gü tinya lo senru gü ru nme-e bose nya. Nkenkelo nga jvu aphu thenlo.

¹³Ai lihigü nshün bin lo njwen tin lamvue nkenkelo nga thenmvu kela güle, atemi letse rüchün sinmvu lati, a-gwenkho tho keshü gü ka a-le tha hope arüshvu mvukela genyu. A-le a-kemu genyu kenjünthyü mvu loshvu.

¹⁴“Tesin hagun dan nyu yhunkebin nyu nme le nkenkelo nga then nyü yatselo, a-le nga tejvü aphu then mvuloshvu. Tejvu higü hile phenyü nyue lo tesin metse aphu ge kemeti.”

¹⁵Npugü le Phika gü Penso kelo nyü nmhuchwe nme le ryü tsühen lola. Kheje ki nmhu gü shwi pe mah hontse.

¹⁷Lihi gwenkho kae nmhu gü le kü lalo Israel nyu le kensenbin rholo lao gü nmhu gü le tsenkeryü binka kensenbin thyüni hü.

¹⁸Temi dan le Npugü johokeshü then kensenbin rhola, lo a johokeshü then-o kensenbin thyülo hü. N mhu gü le Phika gü so kebin then anyugun le kensenbin tsünyu bin hü.

¹⁹N mhu gü le Phika gü so binthon binlo, anyugun le Npugü jozen-o ketu hümvu.

²⁰Khika we n mhu gü le jon keshanyu nti Phika gü soge bin hü; lihi thyü yatse-e anyugun le Npugü le johokeshü then-o kensenbin nyu bin nmvue ketu hü.

²¹Khika we n mhu gü le ngwün gü bin-o lonyü ti gwenzin lahü, tson-o n mhu gü le küla nyemhun anyugun le ketu lahü. Lihi gwenkho kae n mhu gü le kü lalo anyugun le ketu lahü.

²²Tsüle jon hvu, shyeme, chenme, nmvue tsünyethon-e n mhu gü le Phika gü so kebinthen anyugun le ketu hümvu; ai tsüle kü lalo anyugun le ketu lahü.

²³Npugü le joho pe Mosa ketsü then-o anyugun le kensenbin thyü lo rho hü.