Read Southern Rengma Naga MIKAH 1 Bible Online

MIKAH 1 - Southern Rengma Naga bible

MIKAH 1

¹Jotham, Ahaz, lo Hezekia hidan le Juda raja thyükehü ka jo higü lope Moresheth rünyi nyu keryü gü Mika tsüshü. Npugü le Samaria lo Jerusalem genyu hidan aphu pe Mika tsü shü.

²Hi nyü shülo, senyedan; higü nyüshülo, kazünyu yhun kehü nyu aphu! Aphusokekvu Npugü le nmuti. Nyülo! A-le A-kenshün Kerüshvuka nyu bin-o zobin nyo.

³Npugü le a-kenshün Kerüshvuka nyu bin-o ryüjü; a-le tsüryüo kazüthundan gen kedüti.

⁴Tsonlo chün le mah ka zunla kehü hontse kazüthundan le zun lati; tsüdan rincho gen züle tsun tsü kebin hontse kazüketejon ki tsü lati.

⁵Hidan aphu thyüti, Israel nyu le mu lo Sunggigü nren kethyü genyu. Israel le Sunggigü nrenkela genyu segü nmu zü ola? kazü nyidagü Samaria le! Segü le Juda nyu keyüla kemu thyüla? Jerusalem a-npvü!

⁶Tsügenyu Npugü le zo, “Ale Samaria nke kebin pe kendo thyüo, vainlow ketsü bin thyü lati. Ale nyida gü nyu tso dan no kazüketejon gü nyu nsotsü lati, tson-o nyida gü no a-npvü ndo lati.

⁷Tsünyu teromenkezü kegwa dan vüren kebun la, tha khipe a-kershvuka nyu keyüla chün ketyü rüshvu kela dan tsü mah no rola, lo teromen kezü aphu khe kendo lati. samaria le a-keyüla chün ketyü tho genyu tsüdan hyulo, lo ntsoka we shwikerüchün nyu le rüshvu nrün genyu tsüdan pvüo bin peha ki tinla tiso.”

⁸Tsüselo Mika le zo, “Higü genyu ale nyungwamvu lo chechü ti. Anyun kenjünkethyü pe hishü nrün genyu ale apha kenchon lo kenben tsonchüti. Ale mesükerun hontse nra lo Ostric hontse khun ti.

⁹Samaria tejünshvu le pon loho, lo Juda jo tsühontse kenjün thyüti. Kenke le atemi le yhunkehü Jerusalem khinrun ti laso.”

¹⁰Agun le kvulomvu kela pe Gath ki shwikerüchün nyu ka zo nya; anyugun no nkechü hyunya. Beth Leaphra temidan, kemphü nyu yhon-o nshekese pe hishülo!

¹¹Shaphir temidan, kenben lo kejo-o me kazü ki tinla lo. Zaanan ki yhunkehü dan no pecheo anyugun nyida nken chwiryü nya. Hagun le Bethezel temidan le nyungwakemvu khwen nyülo yatselo tsünyu keno ndi so le tse shalo ti.

¹²Maroth temidan le ryüye kelo khwenloho bin, kechamvule Npugü le nmhesa kethyü kenke senryüo Jerusalem kho nni bin laso.

¹³Keru lope kerugari gen dyüshülo. Nle Israel kemu hontse thyüo Jerusalem no muhü.

¹⁴Tsügenyu Juda temidan, Moresheth Gat rünyi zenkekho jo zo lalo. Israel rajadan le Achzib rünyi ki keche hyulo kemvui le.

¹⁵Mareshah temidan, Npugü le hagun khipe hagun shwikerüchün nyu, hagun lola nrün nyu ben ka shüla tiso. Israel sharhi zan chwisa kethyü nyu le tin gü Adullam kazü kü ki kebuti.

¹⁶Juda temidan, hagun le sokehü nyenyu genyu nyungwamvuo hagun pethu lalo. Güda hükendi hontsela lo, kechamvule hagun nyenyu tenzen-o me kazü ki tin lati.