Read Southern Rengma Naga MIKAH 2 Bible Online

MIKAH 2 - Southern Rengma Naga bible

MIKAH 2

¹Gwakemvu rhio chonbin kehü nyu genyu ditsü lakhi kenshvu le bin tiyo! Lonyü thyülolo, anyugun le gwenkho kegwa hyulo ntsin anyugun le rhikelo gwakemvu tsü thyühü.

²Anyugun le low lonyü lo nkhenlo; ka lonyü lo zolo. Kakhwün nmvue kenya genyu nnyunkebwe ndiso.

³Tsügenyu Npugü le zo, “Ale whütse kenke zenryüo hagun gen shü, tsonlo hagun le tsü nrhilo mvu lati. Hagun le kenke nyu kebin hyu loti, tsüsiki hagun le kemakin-o tsonchüsinlo mvu lati.

⁴Tsü gwenkho le ryülo, temidan le hagun rüla zope whütse kenke tsinhi thyü, lo hagun sishakelo lü higü ronti: Agun le nkeshü laso! Npugü le agun kazü sentin la Lo tsü lope agun tenzen-o dothyü tinkelanyu tsüla.”

⁵Tsügenyu, Npugü le kazü khinipe a-temidan tsü nrün gwenkho le keryü ka hagun nme-e a-jün hyulo mvu lati.

⁶Temidan le asenthyüo aka, “Agun senthyü nyalo. Sunggigü le kejokepvü khipe agun tsütitse bin kemvu nti pe senthyü nya.

⁷N wele Israel temi le keswekesü nyu binla seletse rüchün ole? Npugü le nyhenhi kethyü ndila sele? A-le ketsin thyü tson ti ole? A-le kenjütho thyükehünyu ka a-jo bwen hü mvu le?”

⁸Npugü le zoni, “Hagun le shwikerüchün nyu hontse atemi when. Temidan le teri nyu ranio, ka nyu nyunkhinkemvu ndi seletse rüchün hü, ai hagun le anyugun siki phinya khilo ti tse ndabin hü.

⁹hagun le atemi tenu nyu dan, hüpe anyugun kesonyu ka nkenla lo hagun le tsüdan nyenyu kethonthen bin nrün ajochü dan rühu lahü.

¹⁰So-o gülo; hinyu nyunkhinkemvu ndiso. Hagun kemu le bin higü no nkela mvulo keshvu thyü laso.

¹¹“Temi hidan hile kenku lo mekesa nti sen-o hihontse zokehü sidyükeshanyu lonyü bin nyo: ‘Zu lo kenzeütsü hagun genyu kesü thyü titse sidyü zobin nyo.’

¹²“Ai ale hagun Israel temi khe kela dan aphu kequen loti. Tanyüdan le a-bin nyu rani gü kejü hontse ale hagun zenryüo kequen loti. Tanyüchvu kelobin nyu tanyü le kesü thyü kebin hontse hagun kazü le temi kechon no süni loti.”

¹³Sunggigü le anyugun tson khinshe shüo me kazü nyu anyugun zenni chwiryüti. Anyugun le nyida khinrundan borholao chwi lati. Npugü, anyugun rajagü le a-npvü anyugun zen-o chwiryüti.