Read Southern Rengma Naga MIKAH 4 Bible Online

MIKAH 4 - Southern Rengma Naga bible

MIKAH 4

¹Kenkhin ki Kershvuka le kebin kazüthun tsüle aphu nye tetsotsin-o, rincho aphu so tetso lati. Senye kechon le tsünyu ryüti,

²tsüdan temi le zoti, “Ngun Npugü rincho gü ki Israel Sunggigü Kershvuka nyu gü tile. Kechamvule a-le ngun no thyü nyü kebin dan pe n gun senthyü shüti; ngun le a-le kejükelo tsongü nyu güti. Kechamvule Npugü senkethyü le Jerusalem kinyu ryü; Zion nyu a-le a-temi senthyü hü.”

³A-le senye dan jaka kenya kehü pen shüti, a-khoka lo nithenkie kekvu keda kesen nyu dan. Anyugun le zhethon dan pe dyü chala, nywi pe ketsevü thyü lati. Senye dan le teri nyu gü nimvu, nmvue teri genyu gwen ndo loho so.

⁴Temi aphu yhun bwenye tse a-npvü a-vainlow lo kherobin nyu binti, lo temi nme-e athyü nshvu loho. Kekvutsin Npugü le higü zoshü laso.

⁵Senye aphu a-npvü a-tero rüshvu lo tsüdan jozenti, ai agun le kethonthen agun Npu Sunggigü rüshvu lo a-jo thenti.

⁶Npugü le zo, “Ale shaja pe tsüo me kazünyu kenjünthyü kela nyu kokequen nilo nrün jon le ryühü.

⁷Anyugun le terothonyu thyü ka zen-o nithen laso, ai ale nsenkebin nyu zen-o keshün binzen ti, lo anyugun le senye keda thyüti. Ale tsü genrho Zion kazüthun gen bin-o kethonthen anyugun keda thyü ti.”

⁸Lo Jerusalem, Sunggigü le bin-o tanyükhwenyu hontse a-temi nrikehü bin gü, nle nduka hontse Rajaphün nyidagü thyü niloti.

⁹Nle nyuthyüo nra tetso hü nla? Nyugenyu nle tenunyu le kenjünthyü kebin hontse binla? Tsüle nraja ndi lo ntsontsin kehünyu le sikela genyu ole?

¹⁰Jerusalem temidan, tenunyu le nyuzen gükejü hontse kenjünthyüo nralo, kechagenyumvu hagun le nyida gü khelao tegwen ki yhuntin lati. Hagun le Babilon ki güti, ai tsünyu Npugü le hagun shwikerüchün nyu ben nyu hagun keniloti.

¹¹Senye kechon le hagun when titse kequen loso. Anyugun le zo, “Jerusalem nkela mvuloshvu! Agun le nyida higü kenke hyuti!”

¹²Ai senye tsüdan le Npugü nyun ki nyu le bin yo shamvu. Anyugun le shyeni ra nrün genyu kequenlo kehü hontse shaja pe tsüti tse anyugun khokequen kenjü tsü shalomvu.

¹³Npugü le zo, “Jerusalem temidan, güo shaja pe hagun shwikerüchün nyu tsülo! Ale hagun thyüpe methutse kenko tegi tse lo lazo tsen kepvü hontse shüti. Hagun le senye kechon boshwe lo anyugun le me kemvu thyüo hyu kelo kenya tsüpe jwe thyüo pe kazü apentha Npugü ahigü tsüti.”