Read Southern Rengma Naga MIKAH 5 Bible Online

MIKAH 5 - Southern Rengma Naga bible

MIKAH 5

¹Jerusalem temidan, rihüdan, kequenlo! Mele ngun hunlo laso! Anyugun le Israel sharhi dan when bin so!

²Npugü le zo, “Bethlehem Efrata, nle Juda kazü nyu rünyi keshentsin nme, ai ale ngen, nduka nyu hükela kami gen Israel kentsengü zen chwiryüti.”

³Tsügenyu tsügü zenshü nrüngi le a-nyu nnyu kemvuthen Npugü le a-temidan khepe anyugun shwikerüchün nyu tsü lati. Tsüsiki me kazü nyu kebin a-pvünyuju le anyugun temi dan zen-o kerhünni loti.

⁴A-le ryülo, a-le Npugü ki keryü kekvu lo Npugü Sunggigü terün sen-o a-temi ketsenti. A-temidan le nyun nkhimvuo bin loti, kechamvule kazü nyu temi aphu a-keda shati,

⁵lo a-le gwaketho sen ryü ti. Assiria nyu le ngun kazü hüryüo chwida boren yükeryü ka, ngun le ngun sharhi kenkotsindan nipe anyugun zenkerenti.

⁶Anyugun le terikanyü kekvu nyu Assiria, Nimrod kazü gü so kvu loti, lo Assiria nyu le ngun kazü hükeryü ka anyugun ben nyu ngun keni loti.

⁷Israel temi rhünkelonyu le senye kechon genyu Npugü ki nikeshü khüzü hontse, lo tehen gen tsangkenri zü hontse ti. Anyugun le temi gen mvule Sunggigü nngüo yhunti.

⁸Senye dan nyu khekela dan le shünyho le a-chvu füo chün lo shai ki thyühü kehü hontse ti, a-le tanyü dan nyu güo tsüdan gen nchwe küo anyugun tsothürükela hontse, lo kenishwikelo kenrin thame ndi lati.

⁹Israel le a-shwikerüchün nyu so kvulo-o tsüdan aphu nke lati.

¹⁰Npugü le zo, “Tsügwenkho ka ale hagun keru dan zen tinla lo hagun terigari dan nke lati.

¹¹Ale hagun kazü nyu nyida nkela lo chwida aphu borenla ti.

¹²Ale nle sen-o jadu thyü kehüdan nkela tson-o mhundyü ki ryükejü rüla zokehü nme-e bin mvu lati.

¹³Ale nteromenkezü lo tsokesen dan nke lati; nle n- npvü kethyü rüshvusin mvu lati.

¹⁴Ale nkazü nyu nterogi Asherah menkezü süshe lo nnyida dan nke lati.

¹⁵Lo anyunnta sao senye aphu ka ajo zen kemvu dan gen akhün loti.”