Read Southern Rengma Naga MIKAH 6 Bible Online

MIKAH 6 - Southern Rengma Naga bible

MIKAH 6

¹Npugü le Israel zen-o jokekera nyülo. Solo, Oh Npugü, tson-o kekerajo khishü; kazüthun lo rincho dan no nkhwen nyü shülo.

²Hagun kazüthun dan, kethonthen kazükenko thyü kehüdan, Npugü le kekerajo zokebin nyülo! Npugü le a-temi dan nmu-o jokera bin nyo. A-le Israel kenkhin jo senryü jü.

³Npugü le zo, “Atemi dan, ale hagun gen nyu thyüshüla? Ale dihontse hagun khvu kensu thyüshüla? Ajo kenishü.

⁴Ale Ijipt nyu hagun zenchwiryü; ale hagun le dothyükebin ka hagun kenishwishü; ale Mosa, Aaron lo Miriam nishüo no hagun tson tsin.

⁵Atemi dan, Balak, Moab rajagü le hagun nkela nrün genyu tedo rhi lo Balaam Beor nyugü le dihontse a-jo kenishü yo rüchün shülo. Akakia kensenbin Gilgal ki kegun tsoka nyu thyü layo rüchün lo. Tsüdan rüchün shülo ale hagun kenilo nrün genyu dihontse thyü yo shalo gwa.”

⁶Ale tsangge kehü Npugü Sunggigü rüshvu nrün genyu nyu senryü mon? Ano methu nyu kegwatsin dan senryüo rope a-rüshvu tile?

⁷Ale tanyü yie yie nmvue oliv terzü rinyu zü ketsun hontse senryülo Npugü le a-kenyüla tile? Ano anyurigü lope akemu ro thyü tile?

⁸Nmvu, Npugü le kegwa gü pe n gun ka zo laso. A-le n gun ka lonyü kebin le higü: nyule njüyo tsü kethyü, sozin kehü pe tesha kethyü, lo yhun tsenyo-o n gun Sunggigü zen-o kepvüshe kethyü.

⁹Npugü nshvu kethyü tsüle tha kesha nme. Ale nyida gü ko-o, “Nyülo, hagun nyida nyu kequen kehü dan!

¹⁰Temi gwakemvunyu ka nyu nkuo hyukelo kenya le bin. Anyugun le ale ntsükehü kenku kenda sen hü.

¹¹Ketsin kemvu nyu tha ndo lo sülo kehü nyu ale dihontse tsünyu kemu jülo mon?

¹²Hagun dan nyu kenya nyu le rhokedyü nyu kekhün, lo hagun aphu kenkunyu.

¹³Tsügenyu ale hagun kemu genyu hagun nke lo kecha la nrün binzen laso.

¹⁴Hagun le tyüti, ai ketegvü loho-- hagun le nnyon binti. Hagun kanyükarun pvütin ti, ai ntsenlo mvu lati; hagun ntsen kelo lihi-e ale terinyu nke lati.

¹⁵Hagun le shyeni tsipe shüti, ai a-sha gvü loho. Hagun le oliv zü thün ti, ai sen loho. Hagun le terasha zu thyüti, ai tsü loho.

¹⁶Hile thyü ti hagun le Raja Omri lo a-nyugü Raja Ahab, tho gwakemvu then kethyü genyu. Hagun le au do then hü gwenzin laso, tsügenyu ale hagun nkelao temi aphu no hagun sümvu lati. Lihiki-e temi dan le hagun kemeni ti.”