Read Southern Rengma Naga MIKAH 7 Bible Online

MIKAH 7 - Southern Rengma Naga bible

MIKAH 7

¹Hile thamvu so! Ale nnyon kehü nyu nmele terashabin lo vainbin gen a-sha nme-e hyulo kemvu nyu hontse laso. Vain sha aphu lo kherosha tyükegwa aphu lü laso.

²Kazü gü nyu joketsin kesen nyu nme-e ndi, Sunggigü jokezen nyu nme-e ndi so. Temi nmeme tse me dushvu kelo gwenkho khwen bin. Aphu anpvü a-pvünyu hü bin.

³Anyugun aphu gwakemvu thyü shasa. Kedanyu lo jopenron kehünyu le jvüjwe hibin, rhorhi kegwanyu le a-le lokenyü gü pe anyugun ka zo, tson-o anyugun le tedo rhikerhün hü.

⁴Anyugun dan nyu kegwatsin lo joketsin sen sa kehünyu-e jonyü lihikemvu hontsela so. Sunggigü le sidyüjo keshanyu gen bin-o temi dan ka zokeshü hontse, a-le shaja pe temi dan tsü nrün jon le ryü laso.

⁵N kazongü lo npvügüe tenyen nya. Nnu ka jokezo-e petsü salo.

⁶Hi gwenkho ka a-nyu pechenyu ju le a-nyugun pvü lope kepha nyu hontse lo tenunyu le a-nyugun jvü ntsun, lo nyegibwenyu le a-nyünyu zenkega; temi nme shwikerüchün gü le a-npvü a-kakhwünyu temi dan.

⁷Ai a wele Npugü khwe ti; ale Sunggigü tenyen-o a-khwe ti, a-le a kenishüti. A Sunggigü le akehi nyü shüti.

⁸Ngun shwikerüchün nyu le thame ngun shwinyü keloi kon ndi. Ngun le chela, ai ngun le niso lati. Ntsoka ngun le kezün nyu bin, ai Npugü le keben pe agun tsü lati.

⁹Ngun le mu pe Npugü ntsun la, tsügenyu ntsoka gwenkho keshanyu a-nyunkenta nyhen bin mvulo shvubin. Ai kenkhin ki a-le ngun nopen, lo ngun gen thyüzü kela dan thyü njü shü lati. A-le ngun zen-o keben ki chwiryü lati; ngun le yhun bin-o a-le ngun kenikelo hyuti.

¹⁰Tsüsiki ngun shwikerüchün nyu le ngun shwinyüo, ngun ka shün-o, “Npugü hagun Sunggigü le diki bin la?” tse kehü dan le tsü hyuo keja lati. Anyugun le kvulomvu kela lo tsonda nyu kenta hontse kedükela hyuti.

¹¹Jerusalem temidan, nyida gü chwida khweni nrün gwenkho le ryüjü laso. Tsüki tsü hagun kazü gon kenye loti.

¹²Ntemi le npho kipon Assiria, tesinzin Ijipt ki, Eufrates lojvü nyu, zida lo kazüthun nithen ki kebin nyu lihiki kebin nyu le ni ryü lati.

¹³Ai tsünyu keyhun nyu gwakemvu genyu kazü gü le kesi thyü lati.

¹⁴Npugü, nle kejülo kela ntemi dan kekhwen gü thyülo lalo. Anyugun le tehen nyu hü yatse-e kazükegwa le anyugun hunpvü bin. Anyugun no nduka yhun kehü hontse gü Bashan lo Gilead tehen kegwa nyu yhun-o anyugun chvü fütyü lo.

¹⁵Agun genyu nduntho thyüshü, Npugü, nle Ijipt kazü nyu agun zenchwiryü kejü ka thyükeshü hontse.

¹⁶Tsonlo senye dan le tsü hyukeshü ka anyugun kekvu le bin sa kethyü fünyu kejasa lati. Anyugun shese-o anyugun mün kebu lo nyetin khin lati.

¹⁷Anyugun le peri hontseo kazü gen yonti; anyugun le nshvu lo ndün-o chwida ngwen chwiryü ti. Anyugun le nshvuo ngun Sunggigü ki rani ryüti.

¹⁸Nhontse kethyü tero kecha ndile, O Npugü; nle temi rhün kelo dan kemu jüshü. Nle kethonthen nyunta bin hü mvu, ai nle sozin kehü pe hishü kethyü nkenda hü.

¹⁹Nle gwengwa agun shwinjün nishüti. Nle agun kemudan kedüshwelao tsüdan lope zida kentsun ki shü lati!

²⁰Nle nduka agun bon nyu ka zokenjü hontse joketsin kesen lo sozin kehü pe ntemi Abraham lo Jakob tsipwen hishü ti.