Read Southern Rengma Naga NAHUM 1 Bible Online

NAHUM 1 - Southern Rengma Naga bible

NAHUM 1

¹Hile Nineve genyu jolo, Nahum Elkosh temi gü le a-tsemi ki kehyu.

²Npugü le me ntsun kehü nyu nyhen lo hümvu; a-le a-nren kehünyu shaja pe tsühü. A-le a-nyunta-o tsüdan ka khün loni hü.

³Npugü le a-nyunta whütsela hümvu, ai a-le kvusao thyüzü kela nyu no shaja hyumvu tse güla hümvu. Npugü le dikipon tsonchü yo, tsünyu tsangkenbu-terhi le ryü hü; A-tsonkechü ka kemphü le khelukesü thyü chwiryü lahü!

⁴A-le zida ka johoshü lo, tsüle sinla hü! A-le züri no sinla hü. Bashan lojvü le rügula, Karmel kazüthun le nmhola, lo Lebanon ka nyekepun dan le pun rinla.

⁵Kazüthun dan le Npugü khoka kola; rincho dan le a-mhundyü ka zun lahü Npugü le keryü ka kazü le nnun hü: kazü lo a-temi aphu ndün hü.

⁶A-le a-nyunta lolo segü le rhün lomon? Segü le a-nyunkenthün ketetsin kethyü nyu rhün lomon? A-le a-nyunkenthün mah hontse jashü hü: tso dan le a-mhundyü ka ko pe kemphü thyü lahü.

⁷Npugü le gwa: A-le kenjün kethyü gwenkho ka a-temi dan ntsen lohü; A-ki rani keryünyu a-le tsünyu nucha lohü.

⁸Zü datsü keryü hontse a-le a-shwikerüchün nyu nke shü lahü; a-le a-ntsun kehünyu nipe kesinyu shü lahü.

⁹Nle nyu tedo rhipe Npugü ntsun bin la? A-le n-nke kelai le. Temi nme gwengwa nyesin a-ntsun hümvu

¹⁰Tsehü rhükequen kenjü lo npen kesin hontse nle rolati! Hagun kenzeü nyu dan rolati!

¹¹Nineve, ngen temi nme le teda gwakemvu no süpvü chwiryü, a-le teda rhipe Npugü ntsun hü.

¹²Hile Npugü le a-temi Israel dan ka zobin: “Assiria nyu le kvu lo chonsa bin-e anyugun nke la lo ndi lati. A temi dan ale hagun no kenjün thyüla, ai ale tsü thyüni mvuso.

¹³Ntsoka we ale hagun gen Assiria nyu kekvu boshwen lo a-ron hagun phin pvükehü gü tsü duthü latiso.”

¹⁴Higü hile Npugü le Assiria nyu genyu johokeshü: “Anyugun zen sen hülo kegwa senye nme-e ndi lati. Ale anyugun teromen kershvuka dan ka teromen dan nke lati. Ale Assiria nyu misun bin nda bin laso-- anyugun le yhunlo kükemvu genyu!”

¹⁵Nrishüta, jolonyu nmele jolo kegwa sen-o kazüthun gen ryüjü! A-le kvukelo pe sen shü nrün genyu hü laso! Juda temi dan, keho thyü shekerhün thyülo lo hagun le pe Sunggigü tsü titse keswe keda thyü kenjü tsü pe a-tsülo. Gwakemvu nyu le hagun kazü hüni loho. Anyugun nkeshü laso!