Read Southern Rengma Naga NAHUM 3 Bible Online

NAHUM 3 - Southern Rengma Naga bible

NAHUM 3

¹Kenku, lo dukeshvu nyida, kenya kesü thyüo nke lo kechala nrün gü we thyülo tiso!

²Nyüshülo! Thün pe kevü, Kekerüpha khwen, Keru ketin khwe, Terikeru kenmhe khwe!

³Kerukezen temi le when, zhethon le kerü, nmi le nshwen bin! Simin le keren, kesimin swülobu keho le-- temi dan le tsüdan gen pha nsü bin!

⁴Nineve, keyüla gü le shaja hyulo bin. Zegwasa lo me boshvula kegwai kegwa nti, a-le senye dan seme pe dothyü.

⁵Kekvutsin Npugü le zo, “Nineve, ale shaja pe ntsüti! le nno kenben la lo senye dan no nhyu ti, nkejokepvü aphu hyuti.

⁶Ale kemeni kethyü pe ntsü lo nshünkemvu pe nhen lati. Temi dan le nshwikenyü thyüti.

⁷Nkehyu nyu aphu tesen ti. Anyugun le zo-o, ‘Nineve, le nkela sele!’ ” tsonti. Segü le a-shwi njün bin nla? Segü le a-nyun thyü nbwe nyü bin mon?”

⁸Nineve, nle Ijipt nyida Thebes nyiki gwa kethyü le bin ole? A-ko züri nme le chwida hontse a-no bin. Nile züri le a-keno thyü hü.

⁹A-le Sudan lo Ijipt so kekvusen, a-kekvu le a-keni ndi; Libya le a-keche gü.

¹⁰Ai Thebes temi dan pvüo me kazü ki tinla. Tsonda quen aphu ka a-nyenyu vüshvu. Anyugun sharhi dan dyü sen-o kenjün pe a-nyugun kentsen nyu ben nyu shüla.

¹¹Nineve, nko zu tsü nzeü la! Nko n shwikerüchün nyu ben nyu tinla titse ndoti.

¹²N chwida kekhwen aphu kherobin a-sha nyün kebin hontse ti: Senbin chwen kenu shülo, tsonlo a-sha le nmün nyu chetsü ryüti le!

¹³N shüpahü jule tenunyu hontse, lo nkazü le nshwikerüchün nyu mhundyü nyu keno kendi thyü laso. Mah le nkhinrun khincha dan ro lati.

¹⁴Zü pvü pe kehun ndalo, tson-o nchwida thyü nkolo! Nnyo kedü pe a-thün thyülo, lo nnyo nnukelo tsü pe ndalo!

¹⁵Nle lihi thyü bin-e nroshvu nmvue teri nyu n ga lati. Tsekhvu le low tyü kela hontse n nke lati. Nle tsekhvu hontse chon laso!

¹⁶Nle hada kethyü thyü n chon pe tsangneki shyenyü dan nyeki chon laso! Ai ntsoka we tsüdan le tsekhvü le a-sekin sükhun-o nyetin kela hontse ndi laso.

¹⁷Hagun kedanyu le tsang kekun ka tsekhvu dan le kabon gen bin kehü hontse: Ai yhüko le chwiryülo tsüdan le nyetin lao temi nme-e anyugun kegü bin shamvu lahü.

¹⁸Assiria raja gü, hagun ahng dan le silaso, lo hagun dan nyu kegwanyu le kethonthen jütin laso! N temi dan le kazüthun ki tsenchvu tinla, lo temi nme-e tsüdan zen niryüo kaki keshüi ndi.

¹⁹Hagun tejünshvu thyü ngwa keloi ndi, lo hagun kethyü shvue pon lohoso. N kenke rüla nyü kelo nyu aphu kenyüo ben kekhü. Temi peha le n gwakemvu keni kendi nrhilo le!