Read Southern Rengma Naga HABAKKUK 3 Bible Online

HABAKKUK 3 - Southern Rengma Naga bible

HABAKKUK 3

¹Hile sidyükesha gü Habakkuk Kehi:

²O, Npugü, ale ntha rüla nyüloso, tson-o ale nshvu sala sele. Nle thatho keda thyü kehü gü tsü agun gwenkho ka thyüni shüta. Nle nnyunkenta kae, shwinjün shüta.

³Sunggigü le Edom ki bin-o niryü jü; kenshün Sunggigü le Paran rincho dan ki bin-o ryüjü. A-terün le tsang je bin; lo kazü le a-keshwen pe sübin.

⁴A-le tsang kekechwü keben gü zen-o ryüjü; keben le a-ben nyu ben shü, a-kekvu pe kebu kehü bin nyu.

⁵A-le kethyü nipe a-mhundyü shü lo kesi no a-sithen lotse johoshü.

⁶A-le sunshü, lo kazü le nni; a-le nrikeshü nyu senye dan le ndün. kethonthen kebin kazüthun dan le kenjün kho la; Kethonthen binkehü rincho dan le nren tsüla, nduka a-le tsonchü kehü rincho dan.

⁷Ale Cushan temi le nshvu kebin lo Midea nyu le ndün kebin hyu.

⁸Nthyü pe nyunta kela tsüle züri dan lele, Npugü? Nno nthün kela tsüle zida lele? Nle nmhu ge dun; tsangkenbu terhi nmhu gü le nteri gari, nle kvukelo senryüo ntemi ketsü ka.

⁹Nle tholevü pen titse ndolo; thotsi kvushü titse ntsen lo. N tsang kekechwü le kazü shwen khola.

¹⁰Kazüthun dan le nhyu keshü ka ndün la; tsangge zü le tsun tsüryü. Kazü hensin zü le nho, zükentyü le tetso küryü.

¹¹Nthotsi le nmhen gü kethyü lo nnywi le nshwen keshü ka yhüko lo shye le matse sun tinla.

¹²Nle nnyuntao kazü pvüthü; nnyunkenthün nyu nle senye dan kedü:

¹³nle ntemi kenilo titse lo nle kejülo kela raja gü kenilo titse chwi. Nle gwakemvu nyu sharhi gü boshvu lo a-sikethen nyu dan nke shüla.

¹⁴Nthotsi le a-rihü kedagü jenla a-le tsangkenbu terhi hontse agun hükezenla titse keryü ka, kebuo kendinyu nshwe kehünyu hontse keryü ka.

¹⁵Nle nkeru zen-o zida kedüla, lo zü kekvu njwa.

¹⁶Ale tsü aphu nyülo-o ndün; akenshvu pvüo a-müntse le ntü. Amin le nnulo mvula, lo apha nsü lola. Sunggigü le shaja pe agun when kehünyu tsüti tse keryü ka ale matse bin-o gwenkho no keryü khwenti.

¹⁷Kherobin le a-sha ndi lo vain le a-sha nthyü mvula, lo oliv le nshalo mvula lo low nyu shye ndila lo tanyü aphu sila metse lo senru kenkin bin le nrun lae,

¹⁸ale asherhün lo akenyü binti, kechamvule Npugü Sunggigü le akenikelo gü.

¹⁹Npugü le kenko khipe atsü hü. A-le apha thyü pe thyüje pha hontse shüti, lo kazüthun ge nyun nkhi kemvu nyu a ntsen lohü.