Read Southern Rengma Naga ZEFANIAH 1 Bible Online

ZEFANIAH 1 - Southern Rengma Naga bible

ZEFANIAH 1

¹Hile Amon nyu gü Josiah le Juda raja thyükebin ka Npugü le pe Zephaniah ketsü, (Zephaniah le Amariah, Gedaliah lo Kushi dan ka Raja Hezekiah gen gunryü.)

²Npugü le zo, “Ale kazü nyu tha aphu nke lati,

³temi lo nyukhu, tegü lo tsehü aphu. Ale serikemvu dan no chyekela senryü ti. Ale temi aphu nke lao nme-e no bin mvu lati, Npugü Ahigü le zo laso.

⁴“Ale Jerusalem temi lo Juda aphu shaja pe tsüti. Ale tsü ka Baal kershvu tsü nke pe a-kenkhin thyü lati, lo temi nme-e no a-lothyü kehü püshükeda ju-e rüchün mvu lati.

⁵Ale ka soki küo yhüko, shye lo shyenyü rüshvu kehü lihigü-e nke lati. Ale a rüshvuo azan nyu keswe thyü, ai tsüsiki tero Milkon zan ka keswe thyüni kehünyu-e nke lati.

⁶Ale temi rani tinla lo niryüo asithen nimvu kela nyu, aki ryükemvu lo ano anyugun tsontsin shü lotse aka hikemvu nyu nke lati.”

⁷Npugü jon, Sunggigü le thathyü nrün jon le kho nni laso; tsü genyu a-mhundyü nyu matse binlo. Npugü le kershvu tho kethyü hontse a-temi dushvu titse nda bin.

⁸Npugü le zo, “Dukeshvu jon tsünyü ale kedanyu, raja nyenyu lo sinrünyi jvü senkehü nyu aphu gen shaja pe shüti.

⁹Tero kershvu nyu le mehon khikelo pe a npugü ka sülo nrün genyu rühu lo me dushvu kehü nyu tho hontse kehünyu shaja pe tsüti.”

¹⁰Npugü le zo, “Tsünyü hagun le Jerusalem nyu Tsehü Khinrun ka kechü khwen nyü loti. Hagun le nyida keshün denzin kechü khwen nyu lo rincho ki tha boren kethyü khwen nyüti.

¹¹Hagun nyida tesinzin keyhun nyu dan, hagun tsü nyü lolo nyun gwamvuo chülo, kechamvule hada kethyü nyu aphu si lati!

¹²“Tsügwenkho ka ale mahkenben nme khilo-o Jerusalem füti. A-npvü ketegvü lo rünyun-o a-npvü a-ka, ‘Npugü le litson hitson nyu-e thame thyü hümvu.’ tse zokehünyu shaja pe tsüti.

¹³Anyugun kenya pvütin la lo anyugun ka nke lati. Anyugun le ka thyükebin nyu yhun nmvue vain low senkebin zu tsü loho.”

¹⁴Npugü jon kedagü le kho nni laso-- kho nni sa lo nmhensa ryüjü nyo! Tsüle jon gwamvu sati, kechamvule shüpahü kepeche tsin gü-e a-rhodyüo chü soti!

¹⁵Tsüle nyunkenta, kenjün thyü lo nshese kethyü jon, kechakela lo kenke jon, kezen lo dyü kezin jon, khelvu kesü kezün jon,

¹⁶nyida khwen nko lo tetso sa kethyü when-o teri shu khun lo shüpahü nyu le terikhwen shwi kethyü jon.

¹⁷Npugü le zo, “Ale whütse nke kela senryüo temi gen shüo temi aphu yhütyü keponyu hontseo nmhon ti. Anyugun le mupe a ntsunla, tsügenyu. Anyugun le muo a ntsun, tsügenyu anyugun zi le zü hontse tsunti, lo anyugun simin le kazü gen ten bin ti.”

¹⁸Npugü le a-nyunkenthün pe hikeshü nyü anyugun rakagi lo suna le anyugun kenilo mvu lati. Anyunkenthün mah lope kazü apentha nke lati. Whütse kazü nyu yhunkebin nyu aphu no keni thyü lati.