Read Southern Rengma Naga ZEFANIAH 2 Bible Online

ZEFANIAH 2 - Southern Rengma Naga bible

ZEFANIAH 2

¹Kejokemvu senye gü, nnyun ntsenlo,

²nle nye hontse rügu lo sila kemvu ka, Npugü nyunkenta le ngen ryü kemvuka, a-le a-nyunkenthün pe hishü kethyü jon mhundyü.

³Npugü ki niryülo, kazügü nyu a-rüchün tsenyo lo a johokeshü zen kehü dan. Kenjü gü thyülo, lo Npugü mhundyü nyu hagun thyü tsenyolo. Npugü le a-nyunkenta pe hikeshü nyü shaja nrhilo-e sha loho.

⁴Gaza nyida nyu temi nme-e kheloho. Ashkelon khe lati. Khenyüme jon peha ka Ashdod temi hüshwi lati, lo Ekron temi dan anyugun nyida nyu hüshwi lati.

⁵Filistian nyu, zü seka keyhun nyu le thyü loso. Npugü le hagun boshvula titse laso, a-le hagun nme-e nsen mvuo nke lati.

⁶Zida seka hagun kazü dan tsü le ndo pe tanyükekhwenyu then lo tanyü dan bin thyü lati.

⁷Juda temi rhünkelonyu le hagun kazü nkhenlo lati. Anyugun le tsünyu anyugun senru no a-chvü lotyü lo Ashkelon kanyu jüti. Anyugun Npugü Sunggigü le anyugun zen hüti lo anyugun no gwakenye niloti.

⁸Kekvutsin Npugü le zo, “Moab lo Ammon temi dan le a temi kemeni lo nshweo anyugun le tsüdan kazü lola titseo ketekho kebin ale nyü.

⁹Ale rhünbin kehü Israel Sunggigü genyu Moab lo Ammon le Sodom lo Gomorrah hontse nke lati tse swe bin. Anyugun le tsi ketsokü bin nme thyü, lo kethonthen kenke thyü tehen le yhun lati. Atemi rhün kelo nyu le tsüdan hon nke lo anyugun kazü lo lati.”

¹⁰Moab lo Ammon nyugun ketekho lo kemakin lo Kekvutsin Npugü temi kenshwen genyu shaja le tsonti.

¹¹Npugü le anyu gun kerü shüti. A-le kazü nyu tero thyükemhen la, lo senye aphu a npvü pvü a-kazü nyu a-rüshvuti.

¹²Npugü le Sudan temi dan ko boshvu lati.

¹³Npugü le a-kekvu sen-o Assiria nke lati. A-le Nineve no nke pe khekela lo zü kendi kazükesi thyü lati.

¹⁴Tsü le tanyü dan, senru lo nyukhu kecha cha kethyü le kejü bin thyü lati Khinsu dan le nkekela ki tsü yhun lo kafüphe ka khunti. Tegvü dan le kakhin pha nyu bin-o khunti. A-ka nyu sedar sen dan khi lati.

¹⁵Tsühontse kethyü tsüle a-kekvu genyu a-sü thyüo thatsomvu letse rüchün kehü nyida gen thyüti. Tsünyu keyhun nyu le anyugun nyida le kazü nyu keda tsin letse rüchün hü. Tsüle khekela bin thyü pe dihontsela tiyo, tsünyu nyukhu dan le yhunti! Tsü nyu kegü nyu le nshvuo tesen ti.