Read Southern Rengma Naga ZEFANIAH 3 Bible Online

ZEFANIAH 3 - Southern Rengma Naga bible

ZEFANIAH 3

¹Nyida kerhu, me nren lo a-npvü a-temi nshwen kehü Jerusalem le thyü loso!

²A-le Npugü khwenyü mvu nmvue ajvü-e lo mvula. A-le Npugü tenyen mvu lo a-keche-e himvu.

³A-nyu kedanyu le nho kehü shünyho hontse; tsünyu jopenron kehünyu le nnyon kebin hontseo tsenshvu satse thyüru nme ho shü mvu gü lonyü tihü.

⁴Sidyükeshanyu le anyugun le thyü mvulo keshvu khvu pvü lomvu; püshükedanyu le kenshün tho n rhu, lo anyugun kechwi genyu tejvü gü zokecha.

⁵Ai Npugü le ntsokhin nyida nyu bin. A-le kenjü gü a-me njükemvu thyü hümvu. A-le lonyütsen joketsin senryüo a-temi tsükemvu thyü mvu. Tson-e tsünyu kemitsin kemvu nyu le njükemvu thyü lo kejo-e mvu.

⁶Npugü le zo, “Ale senye aphu sha laso; ale anyugun nyida nke lalo anyugun chwida lo tsokhwen dan bola pe binla. Nyida dan le mele yhun mvu laso; tsonda le nrunla nme-e ndiso.

⁷Ale tsü rüchün-o, tsüselo a temi dan le arühvu lo a-jvü zenti, tson-o anyugun le ale pe anyugun senthyükeshü nmhin kemvui sele tse bin. Ai anyugun le hi mhundyü thyükehü hontse gwamvusa tinla.”

⁸Npugü le zo, “Khwentselo, ale soryüo senye dan nkhin nrün jon gü khwentselo. Ale senye dan raja dan no anyugun nyunkenta sha nrün genyu rhilo laso. Kazü apentha anyunkenthün mah lope rolati.

⁹“Tsüsika ale senye dan temi kelula ti, tsonlo anyugun tero kecha dan ka mvuo aka nti hitin lati. Anyugun aphu ajo zenti.

¹⁰Atemi kezen sen-o nithen Sudan ki tin kela nyu-e tha senryüo arüshvu ti.

¹¹Tsü gwenkho ki we hagun a temi dan le a ntsun nren kela genyu kejosin mvue gwa lati. Ale temi lihigü-e ketekho lo kemakin kehü gü hü lati, tsonlo hagun le arincho kenshün gü gen antsun nren sin mvu lati.

¹²Ale mele sümvuo kemeni kehü nyu aka keche hiryü nrün nyu no tsünyu bin ti.

¹³Israel nyu nsen kebin dan le temi nme-e tha thyü zü loho, nku loho, nmvue me kesa rüchün loho. Anyugun le gwa kenye lo nyunkhi loho, nmvue nshvu loho.”

¹⁴Israel dan, lüthyü lo sherhün-o senlo! Jerusalem, nnyun aphu pe nkenyülo!

¹⁵Npugü le nshaja khin laso; a-le n shwikerüchün nyu aphu hü laso. Npugü, Israel Sunggigü le nzen hü laso; ntsokawe nshvu kethyü kon ndiso.

¹⁶Anyugun le Jerusalem ka hihontse zo nrün gwenkho le ryüjü laso, “Nshvu nya, Zion nyida gü! Nben no kvumvu bin nya!

¹⁷Npugü, nsunggigü le nzen hü laso; a-kekvu le kvukelo pe ntsü ti. Npugü le ngen a-kenyü loti, lo a-keso nyu tsü a-le keyhun keshün pe ntsüti. A-le ngenyu lüthyü lo sherhün ti,

¹⁸temi dan le nga lo keho ka sherhün kehü hontse.” Npugü le zo, “Ale kenjü kethyü pe a-keni thyüla lo kejokepvü sentin laso.

¹⁹Gwenkho gü le ryüjüso! Ale shaja pe n-nshwen kehü nyu tsü lati; ale phagwakemvu nyu kenishwilo, lo hüshwikelanyu zen kaki ryü lati. Ale anyugun kekejo kelu pe kerühvu thyüla, tson-o kazü aphu anyugun shwenti.

²⁰Gwenkho le ryüjüso! Ale ntemi kezenkela dan zen niryü ti; ale nthyü pe kazü aphu nyu zankechwi thyü shü tson-o nthyüpe gwakenye ni loti.” Npugü le zo laso.