Read Southern Rengma Naga HAGGAI 1 Bible Online

HAGGAI 1 - Southern Rengma Naga bible

HAGGAI 1

¹Darius le Persia raja thyü kelo chenhvu ka shyetsero gü jon kerinyü, Npugü le Haggai münnyu zoshü. Jo gü pe Juda Ahng gü, Zerubbabel, Shealtiel nyugü lo Peshü kengun gü Joshua, Jehozadak nyugü au tsü shü.

²Kekvutsin Npugü le Haggai ka sozhü, “Temi hidan le hile Kershvuka thyünikethyü gwenkho mvule tse zo.”

³Tsüselo Npugü le sidyükesha gü Haggai münnyu jolo higü khishü:

⁴“A temi dan, a Kershvuka le nrho pe tson bin lo nyuthyüo hagun le ka kegwagwa nyu yhun bin nla?

⁵Hagun ge dihontse bin yo hagun le hyumvu ole?

⁶Hagun le ntsi kechon shüshü, ai keshanyu nti gvülo. Hagun le tyü, ai hagun ginnyü lomvu. Hagun le vain zu tsü, ai nzeü lomvu! Hagun le phiben ai yün lomvu. Lo thatho kethyü nyu le sen mvulo keshvu chün lomvu.

⁷Nyuthyüo hihontse bin yo hagun le shamvu ole?

⁸Ntsoka rincho ki nsin gü tesen bosen ryüo Kershvuka gü thyünilo; tson yatselo ale akenyü ti lo a kendo hontse arüshvu loti.

⁹“Hagun le kechon gvü kelo rüchün bin, ai keshanyu nti gvülo. Lo hagun le gvü pfü kaki ryülo, ale nmhü pe shwela. Nyugenyu ale tson shüla? A Kershvuka le nrhobin lo hagun nmeme tse a-npvü a-ka thyüo ra kebin genyu le.

¹⁰Tsügenyu tsangsri shümvuo thame tsüyhun lomvu.

¹¹Ale tsangken senryü- rincho ge, lonyu, vain low, oliv low, lo kazünyu yhun soryü nshashü kehü aphu ge, temi ge, senru ge lo hagun le no tsüyhun titse kehü aphu ge shü laso.”

¹²Tsontsin Zerubbabel, Joshua lo Babilon ki medothyü hüo rani keryü nyu aphu Npugü anyugun Sunggigü le anyu no nyuthyülo tseyo tsü thyülo. Anyugun le nshvuo sidyükesha gü Haggai, Npugü jolo senkeryü gü jozen lo.

¹³Tson-o Haggai le Npugü jo pe temi dan ka zoshü: “Ale hagun zen hüti- ale tsü zoshwishü bin nle.”

¹⁴Npugü le anyugun nmeme tse thukeyhun pe Kershvuka tha thyü nyülo: Zerubbabel, Juda Ahng gü, Joshua peshü kengun gü, lo medothyü hüo ranikeryü nyu aphu. Anyugun le Kekvutsin Npugü, anyugun Sunggigü Kershvuka gü thyü so,

¹⁵Darius le raja thyükelo chen hvuo shyetsero gü jon nkipezi nyü.