Read Southern Rengma Naga HAGGAI 2 Bible Online

HAGGAI 2 - Southern Rengma Naga bible

HAGGAI 2

¹Chen tsügü shye tsenyü gü jon nkipvün nyü Npugü le sidyükesha gü nthon nishü.

²A-le Haggai no Juda Ahng gü Zerubbabel, peshü kengun gü Joshua lo temi dan ka zoshü lotse shü.

³“Hagun dan nyu temi nme-e Kershvuka gü le dihontse zegwa hüyo rüchün bin le nmvula? Ntsoka hagun le tsü nri keshü le dihontse la? Tsüle tha lihi kemvu.

⁴Ai hagun nme shese nya. Thatho gü thyülo, ale hagun zen kehü genyu.

⁵Hagun le Ijipt nyu chwikeryü ka, ale hagun zenzin hüti tse zoshwishü njü nyo. Ale hagun zen hüzun, tsügenyu nshvu nya.

⁶“Thon mvu tse ale tsang, kazü, lo züda sükenu shüti.

⁷Ale senye aphu süshe lati, lo anyugun kenya sen hika ryü ti, tson-o kenya pe Kershvuka gü kesü thyü shüti.

⁸Kazünyu suna rüka aphu ahon.

⁹Kershvuka keshün gü le a-when gü nye zegwa kvuti, lo ale tsünyu gwakenye kelo lo nyunkebwe pe a temi tsüti.” Kekvutsin Npugü le zoshü.

¹⁰Darius le raja thyü kelo chenhvu gü shye tekü jon nkipezi nyü, Kekvutsin Npugü le sidyükesha gü Haggai ka zonishü.

¹¹A-le zoshü, “Peshükeda gü ka ketso kebin higü shün shülo:

¹²Temi peha le rora thyüo thyünshün kela thyü sime khipe a-bola ketseyho hensin shü senhü. Tson-o a-bola phi le tensü, chvü, vainzu, oliv ter, nmvue ketyüketsü lihi-e kesü lalo tsü le chvü tsügü ko thyünshün lo gwa ole?” Tson ketso keshü ka Peshükedanyu le zoshü, “Nmvule.”

¹³Tsüselo Haggai le ketsoshü, “Keshanyu laka temi nme le simin kesü kela genyu rhula. Tson-o a-le ketyüketsü lihi-e kesüshü yatselo, tsüle anyugun ko nrhu la tile mvula?” Peshükedanyu dan le zoshü, “Ele.”

¹⁴Tsüselo Haggai ale zoshü, “Npugü le zokebin le, temi hidan lo anyugun le thyü keshü lihi-e tsü a-kenme; tsügenyu anyugun le pe kershvubin ge keshü lihi-e nrhu laso.”

¹⁵Npugü le zohü, “Hagun ge nyuthyü shüyo hagun le shamvu ole? Hagun le Kershvuka gü thyüni keso mhundyü,

¹⁶shye thunme le kilogram tsihvu ndo lati ado tse ndo gülo tsime nti hyulo, hagun le tsun nme nyu vainzu liter tsime run loti ado tse binlo henzi nti le bin.

¹⁷Ale keyün kenhi lo tegwen nishüo hagun le no yhun soryü titse kebin dan nke lahü, ai hagun le nyun kelu lomvu.

¹⁸Nthu hile shye tekü gü jon nkipezi, Kershvuka phasin pe shüpen kela jon, Nthu gerho dihontse shütiyo shwi binlo.

¹⁹Shye ndi layatse-e, lo vainsha, kherobin, kheratyü lo oliv bin le nshamvu zun yatse-e, ntsoka gerho ale jochü pe hagun tsüti.”

²⁰Tsünyü shye jon nki pezi nyü Npugü le jolo kenyhun gü pe Haggai tsüshü

²¹Zerubbabel, Juda Ahng gü genyu: “Ale tsang lo kazü sükenu shü tiya bin nle

²²lo rajaphen dan khishela lo anyugun kekvu no kenithyü lati. Ale kerugari lo tsü keranyu dan bokekhün lati; keru dan le si lati lo tsüge kedun dan le khinyu nyu dushvu lati.

²³Tsünyü ale nkhi loti, a gogü, Zerubbabel, lo ale nno azan nyu keda thyü ti. Ale kejükelo gü tsü le nle.” Kekvutsin Npugü le zoshü le.