Read Southern Rengma Naga ZEKARIA 1 Bible Online

ZEKARIA 1 - Southern Rengma Naga bible

ZEKARIA 1

¹Darius le Persia nyu raja thyükelo chen hvu gü shye tetse ka Npugü le jo higü pe Berekiah nyu gü sidyükesha gü Zekariah, a-bon le Iddo gü tsüshü.

²Npugü Kekvutsin gü le Zekariah no temi dan ka zoshü lotse shü, “Npugü, Ale, hagun pvübon nyu ge a-nyunta la,

³ai ntsoka ale hagun ka zobin nle, ‘Rani aki ryülo, lo ale rani hagun ki ryüti.’

⁴Hagun pvübon nyu dan hontse nya. Jon kethon gü kela ka, sidyükeshanyu dan le ajo pe anyugun ka zo-o anyugun no gwakemvu, kemu nyu yhun sin bin nyalo tse shü. Ai anyugun le ajo nyü nmvue zen mvu.

⁵Hagun pvübon nyu lo sidyükeshanyu tsüdan le yhun bin mvu laso.

⁶A gonyu sidyükesha nyu tsüdan ge bin-o ale hagun pvübon nyu dan ka johoshü lo pütsü lolo tse shü, ai anyugun le tsü rüchün mvu kela genyu tsüchün kenjün thyülo. Tsüsiki anyugun le anyugun nyunkelu lo-o Kekvutsin Npugü, ale thyüshü titse rhilo kela anyugun le hyulo kezü shaja gü pe anyugun tsü le tse shalo.”

⁷Darius le raja thyü kelo, chenhvu ka shye tseryü nme gü Shebat shye jon nkipezi nyü kheje ki Npugü le tsemi ki jo nme pe atsüshü.

⁸Ale Npugü lilonyu nme le keru kenhon nme ge dun kebin hyu. A-le ketejon nme nyu myrtle senbin dan nyu sobin, lo a-siki keru kecha kenhon, kemeren lo kechon le bin.

⁹Tsü selo ale a-ketsoshü, “Kedagü keru hidan a-kon le nyula?” tsontsin a-le a jokenishü, “Tsüdan kon le nyuyo ale pe nhi shüti.

¹⁰Npugü le nipe kazü gü nrikeshü dan le.”

¹¹Anyugun le lilo gü ka zoshü: “Agun le kazü apentha nyu gü hyukelo le kazü apentha keche ndi lo mele lolo laso.”

¹²Tsontsin lilo gü le zoshü, “Kekvutsin Npugü, nle Jerusalem lo Juda nyida dan ge chen hentsenyü nnyunta bin laso. Nle shwikenjün pe anyugun hikeshü mhundyü dithen laki anyugun no kenjün thyü bin tila?”

¹³Npugü le nyunthyü kenbwen jozo-o lilo gü jokenishü,

¹⁴lo lilo gü le Kekvutsin Npugü le nyu zo shüyo ano tsüpe zosen shülo tse aka zoshü. “Ale Jerusalem a nyida kenshün gü so lo phin rüchün sa bin nle,

¹⁵lo ntsema tse bwenye kebin senye dan ge ale anyunta sa bin nyo. Ale atemi ge anyunkenta süni kebin ka, senye tsüdan le atemi thyüpe no kenjün thyü kvu laso.

¹⁶Tsügenyu ale shwikenjün pe nyida gü hishü titseo Jerusalem nyu rani ryü laso. A Kershvuka thyünilo lo nyida gü thyü soni loti.”

¹⁷Lilo gü le ano zosen shü lotse zoshü: “Kekvutsin Npugü le zokebin le a-nyida dan le gwakenye ni loti, lo a-le Jerusalem keche gwani shüo nyida gü le a-hon letse nkheti.”

¹⁸Tsemi kecha nme ki muthu tse pezi hyu.

¹⁹Ale a nthon kebin lilo gü ka, “Methutse hidan hile a-kon le nyu la?” tse ketsoshü. Tsontsin a-le a jokenishü, “Tsüle Juda, Israel, lo Jerusalem temi hü kezen kela kekvu dan sun ka bin nle.”

²⁰Tsüsika Npugü le thatho kethyü nyu mizi le kejonvü sen kehü tsinpe ahishü.

²¹Ale ketso shü, “Temi hidan hile nyu thyü ryü bin nla?” Tsontsin a-le a jokenishü: “Anyugun le ryü Juda kazü nkeshü lao a-temi hü kenmhen kela senye dan ketsun lo hüpe shwela nrün genyu le.”