Read Southern Rengma Naga ZEKARIA 10 Bible Online

ZEKARIA 10 - Southern Rengma Naga bible

ZEKARIA 10

¹Tsenbwe ka tsangri shü lotse Npugü ka kehi thyülo. Nmhu nipe no tsangri shüo temi aphu genyu low no jvüri chwi ryülo kehü tsüle Npugü.

²Temi le teromen lo temvünyu nthon hü, ai tsüdan le kenkukenru lo kenrun kenryü zoshü hü. Peha le me min ko zoshü, ai tsüle hagun tson tsinzü kehü gwünzin; anyugun le hagun nyun thyü nbwen kehü tsüle kenrun le. Tsü genyu temi dan le nmhekela tanyü hontse nmhon tin laso. Anyugun sharhi kendi genyu kenjün thyü bin nle.

³Npugü le zohü, “Ale atemi so kekvu sen kebin sinrünyi nyu dan ge anyunta bin nyo, ale shaja pe anyugun tsüti. Juda temi dan le aho, Kekvutsin Npugü, ale anyugun nucha loti. Anyugun le a teri kethyü keru kekvu dan thyüti.

⁴Anyugun dan nyu kekvu kesen, sharhi, lo rihü ketsen nrün temi le soryüo atemi ketsen ti.

⁵Juda temi dan le shüpahü kekvunyu, anyugun shwikerüchün nyu tenpe tsonda ka kenbe nyu kedü la kehü nyu hontse ti. Npugü le anyugun zen kehü genyu anyugun le terithyüo keru ge kebin anyugun shwikerüchün nyu temi dan so-e kvu lati.

⁶“Ale Juda temi thyü nko shüti; Ale Israel temi kenishwi shüti. Ale anyugun shwi njün shüo anyugun aphu zen ka ki niryü ti. Anyugun le ale thame ka-e khela kemvu nyu hontse loti. Ale anyugun Npugü Sunggigü; ale anyugun kehi kenishü ti.

⁷Israel nyu temi le shüpahü nyu hontse nko ti, vainzu tsükelo nyu hontse shekerhün thyüti. Anyugun tsipwen le kvukelo higü hi rüchün-o Npugü le thyükeshü dan genyu anyugun kenyüti.

⁸“Ale a temi ko kequen pe nme thyü lati. Ale anyugun kenishwi shüo nduka hontse anyugun no swülobu keho thyüti.

⁹Ale anyugun no senyedan nyu kezen la-e bin nithen ki-e anyugun le arüchün hüti. Anyugun lo anyu nyenyu le rhün bin-o kengüo kaki raniryü ti.

¹⁰Ijipt lo Assiria ki ale anyu zen kaki ryüo anyugun npfü anyu kazü nyu bin loti. Ale anyugun no Gilead lo Lebanon nyu bin loti; temi no kazü apentha kesü thyüti.

¹¹Anyugun le anyugun zida gwakemvu pfüthü kegü ka, ale zükentyü dan vü lati, lo Nile zükentsun no sin lati, Ketekho kehü Assiria nyu le tsenyo la, lo Ijipt nyu le a-kekvu nmhe lati.

¹²“Ale a temi thyü nko shüti; anyugun le arüshvu lo ajozen ti.” Npugü le zoshü laso.