Read Southern Rengma Naga ZEKARIA 11 Bible Online

ZEKARIA 11 - Southern Rengma Naga bible

ZEKARIA 11

¹Lebanon, n kakhin she shülo, mah no n sedar bin dan rola nrün genyu!

²Chü lo chechülo Cypress senbin dan- Sedar le che laso; Zankechwi kethyü senbin dan nke laso! Chü lo chechülo, Bashan nyu teshobin dan- chünkentsun dan gü laso!

³Kekvukesen nyu le anyun kenjün thyüo nra chwiryü; anyugun zankechwi le tin laso! Shünyho dan kenho nyüshü; Jordan kerho chün nyu anyugun ka tsü nke laso!

⁴Npugü a Sunggigü le aka zoshü, “Dushvula nrün tanyü dan kekhwe gü tho thyü shü.

⁵Anyugun npunyu le tsüdan dushvu la-e shaja thyümvu. Anyugun le tsü thyü jweo, ‘Npugü shwe! Ngun le nnya laso!’ tse zo. Anyugun kekhwenyue tsüdan njün mvu.”

⁶(Npugü le zoshü, “Ale kazü nyu temi nme njün sin bin loho. Ale temi aphu pe anyugun so kekvu kesen nyu ben nyu shülati. Kekvu kesen nyu tsüdan le kazü gü nke lati, lo ale tsüdan ben nyu anyugun kenishü loho.”)

⁷Tanyü heilo lo jwe kehü dan le a jonshe laso, tson-o ale tanyü dushvula nrün dan kekhwe gü thyülo laso. Ale thün kenyhun khilo-o nme pe “Kenyü” lo kecha gü pe “Kengügwa” tse kolo. Tson-o ale tanyü dan nucha bin.

⁸Ale a nrhi kehü tanyü kekhwenyu mishen ge akekheni loho lao, shyeme jaka anyugun aphu khela.

⁹Tsüselo ale tanyü dan ka zoshü, “Ale hagun kekhwe gü thyü sinlo hoso. Si nrün nyu no sila. Nkela nrün nyu no nkela. Nsen kebin dan no khinyunyu nke lalo.”

¹⁰Tson-o ale thün “Kenyü” tse ko kelo gü khilo-o tsü bose lao Npugü le kazü aphu zen kejozen kelo gü khela.

¹¹Tsü genyu tsünyü kejozenkelo gü khela. Tanyü heilo lo jwe kehü dan le a nri bin tson-o ale nyu thyü shüyo tsüge Npugü le thazo kebin anyugun le shala.

¹²Ale anyugun ka zoshü, “Hagun kendo yatselo achün pe atsülo. Ai nmvu yatselo pe bin la.” Tsügenyu anyugun le achün raka shenryü pe atsü.

¹³Npugü le aka zoshü, “Tsüpe Kershvuka kenya khinyu shü lalo.” Tson-o anyugun le amin le tsükho thyükü tse keshü raka shenryü tsü khipe Kershvuka kenya khin nyu shüla.

¹⁴Tsüsika ale “Kengükegwa” tse ko kelo thün kenyhun gü bose la, tson-o Juda lo Israel au janyu kengükegwa borho la.

¹⁵Tsüselo Npugü le aka zoshü, “Tanyükekhwe nyu tho thyü nishü lo, ntsoka le serikemvu nyu nme.

¹⁶Ale a tanyü dan shwi lotse tanyü kekhwe nme pe shü, ai a-le kenke le ryü kejü nyu atanyü dan keche lomvu; nmvue nmhe kelanyu fümvu nmvue jün kela nyu thyü kesherhün shümvu, nmvue sherhün kebin nyu gin thyü shümvu. Tsonkethyü gü mvule tanyü aphu kegwa nyu thyütyü lo anyugun tsen sükho laso!

¹⁷Serikemvu tanyü kekhwe güle nkela. A-le a-tanyü dan khela. Teri le a-kekvu nkeshü lati. A-buthun le tsela lo a-yhütyü njüzin no po lati.”