Read Southern Rengma Naga ZEKARIA 12 Bible Online

ZEKARIA 12 - Southern Rengma Naga bible

ZEKARIA 12

¹Npugü kipon Israel nyu rüla zokeshü, Npugü, tsang sükhun shü, kazü thyüshü, lo kerhün ronzin pe temi tsü keshü gü. A-le zo,

²“Ale Jerusalem thyüpe zu honpen nme hontse shüti; a-hunpfü kebin senye dan le tsülo-o kenzünyu hontse kezekego ti. Lo anyugun le Jerusalem hunpfü kelo ka, Juda nyida kecha dan ko hun loti.

³Ai tsü gwünkho le keryü ka, ale Jerusalem thyü pe tso kensu nme hontse lao senye ligü higü tsü penso titse ndo kethyü gü le jün loti. Kazü nyu senye aphu rihü kerhün-o tsügi wheti.

⁴Tsü gwünkho ka ale keru dan aphu kerüshüo tsüge dun kebin nyu aphu no nnu tin lati. Ale Juda temi dan khelo ti, ai anyugun shwinyü kemvu nyu keru dan no a-yhütyü po lati.

⁵Tsüsiki Juda pfüphun le, ‘Kekvutsin Npugü Sunggigü le kekvu pe Jerusalem nyu yhun kebin atemi dan tsü shü le’ tse anyugun dan nyu zoti.

⁶“Tsü gwünkho ka ale Juda pfüphun thyü pe chün nyu nmvue low le nyün kebin nyu mah hontse shüo, anyugun le anyugun hun pfü kebin senye aphu nke lati. Lo Jerusalem temi dan le nyun bwen-o nyida gü nyu bin ti.

⁷“Ale Npugü, ale kvukelo pe Juda rihü dan tsüri ti, tson-o David tsipwen lo Jerusalem temi dan le kerühvu hyulo nrün no Juda temi nyeki gon kvu loho.

⁸Tsü gwünkho ka Npugü le Jerusalem nyu keyhun nyu ntsen loti, tson-o anyugun dan nyu kvu kemvutsin güe David hontse kvuti. David tsipwen le Npugü tsanggelonyu hontse, lo Sunggigü hontse anyugun tsonri ti.

⁹Tsü gwünkho ka senye ligü higü Jerusalem whenti tse ndo kethyü nyu ale nke lati.

¹⁰“Ale shwikenjün kapu lo kehikethyü kapu pe David tsipwen lo Jerusalem nyu temi kecha dan tsü shüti. Anyugun le jenshvu kela gü nrishüo, a-chechü ti, a-nyu nme nti gü chekechü hontse. A-nyugun le a-nyuri gü le sikela nyu hontse nyunkenjün thyüo chechü ti.

¹¹Tsü gwünkho ka Jerusalem nyu chekechü le gon pe Megiddo ketejon ki Hadadrimmon che kechü hontse ti.

¹²Kazü gü nyu kami nmeme tse a-npfü chechü ti. David tsipwen kami, Nathan tsipwen kami, Levi tsipwen kami, Shimei tsipwen kami, lo kami kecha aphu. Kami nmeme tse a-npfü chechü ti, lo kami nmeme ka pechenyu lo tenunyu bin a-kecha thyüo chüti.