Read Southern Rengma Naga ZEKARIA 3 Bible Online

ZEKARIA 3 - Southern Rengma Naga bible

ZEKARIA 3

¹Tsemi kecha nme ki Püshükengun gü Joshua le Npugü lilo gü mhundyü nyu so kebin Npugü le tsin pe ahishü. Lo Joshua khoka Satan le so-o a-nmu titse gwen ndo bin.

²Npugü lilo gü le satan ka zoshü, “Npugü no n nmu lalo satan! Jerusalem so kehü gü, Npugü no n nmu lalo. Temi higü hile mahnyu nlo kelo sento nme hontse le.”

³Joshua le phi nshünkemvu ben-o tsüka sobin.

⁴Lilo gü le tsanggelokethyü nyu ka zoshü, “Temi higü le ben kebin phi nshünkemvu dan sentin lalo.” Tson-o a-le Joshua ka zoshü, “Ale nkemu sentin laso lo nno ben nrün genyu phi kenshün pe ntsüti.”

⁵A-le lokethyü nyu dan no pekeju phi kenshün nme pe Joshua pe ge shülo tse zoshü. Anyugun le tsü thyüshü, lo Npugü lilo gü le so kebin ka phi keshün gü ko pe a-nben shü.

⁶Tsüselo lilo gü le Joshua ka zoshü

⁷Kekvutsin Npugü le zo: “Nle atejvü then lo ale nno thyü lotse pe ntsü keshü tho dan thyü hü yatselo n no a Kershvuka lo chonrha dan Kentsen gü thyüzin bin ti, lo ale a mhundyü nyu bin kehü tsanggelonyu dan kehi nyüshü kehü hontse nkehi nyüshü ti.

⁸Nyülo, Joshua Püshükengun gü; Nyülo, hagun a-püshükeda nyu dan, hagun le siki kegwa le ryü nrün zansü le. Ale ago gü khishwi shüti, Aaron gü tse ko kehü gü!

⁹Ale tso nme a-mhun tsenyü le kebin pe Joshua mhundyü ka shü bin nle. Ale tsüge thathu shüti, lo khenyüme jon ale kazü higü kemu sentin lati.

¹⁰Jon tsügü le ryülo, hagun nmeme tse a-kajon nyu kozen ryü hagun vainlow lo kherobin le hun kebin nyu kenshvu ndi lo nyunbwen-o shekerhün thyüti.”